1Eme Israe ŋic jaŋe Heboroŋ haeo Dawidirao tumaŋne‐fârerâ ʒiŋuc âzâcnembiŋ: “Manakic, nâŋe gore soc â biuc.
2Juwicnao Saulo e ŋicwofuŋ juhame jaha go Israe momori ʒikao bânie‐jarehuc mocwâc bârisiec‐jopahuc jumeŋ. Ehame Wofuŋzi ʒiŋuc gazawec: ‘Go Israe ŋicfâc‐nane soŋaŋ‐jopahuc fekicne‐jeŋic juzemec!’”
3Irec Israe micne sasawa jaŋe Heboroŋ haeo Dawidirao tumaŋne‐fârembiŋ. Eme ŋicwofuŋ Dawidizi ira Wofuŋte maio jaŋehec ʒâʒâfic eme jaŋe wokemaŋ ruacnehuc Israe ŋic jaŋere ŋicwofuŋ âkendâŋnembiŋ.
4Eme Dawidi e jara‐ticne 30 bazurâ ŋicwofuŋ gie‐ticne fuŋkewec, ehuc jara 40 ŋicwofuŋ juwec.
5E Heboroŋ haeo jara 7 â mosa 6 Judaŋic jaŋere ŋicwofuŋ juwec. Â Jerusalem haeo ine Israe ŋic â Judaŋic qâturec‐jopahuc jaŋere ŋicwofuŋ juha jara 33 tarawec.
6Eme ŋicwofuŋ â ŋicfâcne jaŋe Jerusalem haeo mâreŋ rune Jebusi ŋic jopaniŋte rambiŋ. Rapie Jebusi ŋic jaŋe Dawidi ʒiŋuc âzâcnembiŋ: “Go ʒira mi warezemec. Ʒâŋe tiŋtuŋ â kike dembahec jaŋe aka hegareniŋmu hâcne.” I ʒiŋuc manahuc mumbiŋ: Dawidi e sâcne mi wareocmu.
7Iŋuc muhapie Dawidi e sifu Zioŋ ficsanaŋ i rauckewec. Eme hae ŋondeŋ i hâcne Dawidire hae qizec mujumbieŋ.
8Eme ʒoaŋ ira Dawidizi ʒiŋuc muwec: “Moc e Jebusi ŋic jopazo muocmuo ine damu‐ticne kaoŋnehec izi ŋic kike dembahec â ʒâŋe tiŋtuŋ jopazejec. Dawidizi ŋic iŋucne jaŋere râsi sanaŋ juekac.” Eme irec hâcne ʒiŋuc mujumbieŋ: “Tiŋtuŋ â kike dembahec jaŋe Wofuŋte ficko mi raʒinʒepieŋ.”
9Eme Dawidi e ficsanaŋ ira ŋeŋe juju ehuc irec ʒâŋe Dawidire Hae muwec. Ehuc Milo haeonec fuŋkerâ hae bahame râreckerâ kikie efârewec.
10Erâ Dawidi e Anutu Tâpiri Ɋuŋɋasaŋ Wofuŋzi ehec juwecte tâpiri sâkohec jurahuc juwec.
11Eme Tiro ŋicwofuŋ Hiramzi Dawidirao kiŋaŋŋic sorec‐jopawec. Ehuc jâmâzâc jâc wiac râecnewec. Erâ kamunda â qânâzi fic bapa ŋic râec‐jopame jaŋe rarâ Dawidi fic moc bacnembiŋ.
12Iŋuc epie Dawidizi ʒiŋuc mana tarawec: Israe ŋic jaŋere ŋicwofuŋ jupemurâ Wofuŋzi hume keteŋ enarewec â Israe ŋicfâc‐ticne jaŋere erâ Wofuŋzia uucmaŋ‐nane bafaharewec.
13Eme Dawidi e Heboroŋ haeonec Jerusalem haeo fisirâ juhuc ʒuhuckerâ ŋonâŋfâc‐ticne gâcne mamare rocjopawec. Iŋuc rocjopame naru motecfâcne gâcne ʒuhuckerâ fuambiŋ.
14Jerusalem haeo fuambiŋ jaŋere ʒâŋe ʒiŋuc: Samua, Sobabe, Nataŋ â Salomo,
15Ibiha, Elisua, Nefege â Jafia,
16Elisama, Eliada â Elifele.
17Israe ŋic jaŋe Dawidi wokemaŋ ruacnerâ ŋicwofuŋ‐jeŋic âkendâŋnembiŋ, Filisa ŋic jaŋe biŋe iŋuc manarâ e bâfuarâ qaniŋte fisimbiŋ. Eme Dawidi e biŋe‐jeŋic manarâ ficsanaŋko raʒiwec.
18Ehame Filisa ŋic jaŋe fisirâ Refaim wâneŋko forambiŋ.
19Eme Dawidi e Wofuŋ wiocnehuc muwec: “No Filisa ŋic râsi sâcne fisi‐jarepemu me? Go nore meo sâcne râec‐jopacmu?” Iŋuc wiome Wofuŋzi ʒiŋuc âzâcnewec: “Sâcne fec, eme no Filisa ŋic gore meo râec‐jopa‐jâmbâŋkepemu.”
20Iŋuc muhuc âzâcneme Dawidi e mâreŋ ŋondeŋ moc, ʒâŋene Baali‐Perazim, ira fisirâ Filisa ŋic bawahac‐jopawec. Ehuc muwec, “Wofuŋzi bânie‐narehuc opâ rumi iŋucne erâ kisâfâc‐nane âke rârâec‐jopawec.” Irec hâcne mâreŋ ŋondeŋ irec ʒâŋe Baali‐Perazim muwec.
21Eme Filisa ŋic jaŋe nemuɋâŋ wiac‐jeŋic ijaha hetararâ wisepie Dawidi â ŋicfâcne jaŋe rorâ rambiŋ.
22Eme Filisa ŋic jaŋe mocwâc fisirâ Refaim wâneŋ i sâcke‐fârerâ fombiŋ.
23Fohapie Dawidizi Wofuŋ mu wioc ecneme Wofuŋzi muwec, “Go ferâ izia mi jopazemec. Go getâc‐jopahuc rarâ râpe‐jeŋicko binawec jâc domakackopec fisi‐jarezemec.
24Erâ jâc botâŋko kike fânâŋ tinac fuame manarâ izia ʒika fuŋkezemec. Wofuŋ no Filisa momori jopapemurâ bânie‐garepemu hâcne.”
25Eme Dawidi e Wofuŋzi mutâcnecnewec irec sâcko ewec. Erâ Filisa ŋic Geba haeonec jopa jopa raku Geʒera haeo fisiwec.
