1Izelayɛle wolodamai zɔiti pɛ ti ʋaani Davide ʋɔ bɛ Ɠeeɓelɔn, ti ɠɛ ma: «Ada ga zii ɠila, ta ɲama ɠila.
2Kaite Sayile ná-masadai ma ziɛgi zu gi unda, ɗa ɠa è ɠɛni losu Izelayɛle ná-kɔɔiti tuɠɔ. Ɠɔoɠɔ GALAGI minazeɠeni è ʋɛ, é ɠɛ ma: ‹Ɗa ɠa è ɠɛɛzu ga ná-nuɓusɛi Izelayɛle maaɓɛɛ nui, è ɠɛ ga ná-totuɠɔi.› »
3Izelayɛle ɠɛwolaiti pɛ ti ʋaani masagi Davide ʋɔ bɛ Ɠeeɓelɔn. Miná ɠa ti minazeɠe kɛɛni ná yɔɠɔzu Ɠɔoɠɔ GALAGI ɠaazu. Ti gulɔi ziɛni ma, kɛɛ vai zu ga Izelayɛle pɛ ma masagi.
4Davide ná-konagi ɠɛni ga puusaʋagɔ (30), siɛgi zu é zeini la ga masagi. Kona ʋuunaanigɔ (40) ɠa é kɛɛni masadai zu.
5É kona dɔfela ta alu dɔzita ɠɛɛni Ɠeeɓelɔn, Zuda wolodamaiti unda, é kɛ ga kona ʋuusaʋagɔ maazu saʋagɔ (33) masadai zu Zeeluzalɛme, Zuda ta Izelayɛle wolodamaiti pɛ unda.
6Masagi ta ná-kɔɔɠɔ nuiti ti liini Zeeluzalɛme laalɔɠɔma, nii a kɛ ti kɔɔi ʋɛɛ Yeeɓuse nuiti ba, niiti ti ɠɛni zeini naama yooi zu. Naati ti ɠɛni Davide ma: «È la lɛa taai nii zu pɛ! Mazɔlɔɔ anɛɛ gaazuɠole nuiti ta dɛkpu nuiti ta è laaʋili.» Naa ʋolu ɠɛni ga Davide la lɛa taazuʋɛ pɛ.
7Kɛlɛ Davide Siyɔn zoni, taai nii makɛgai ga siɠi gaaɠoozagiti, ti ná laasei pɛɛ ga «Davide ná-taa wolai.»
8Naama voloi, Davide ɠɛni ná-kɔɔɠɔ nuiti ma: «Zɔi é pɔ é ziɛ Yeeɓuse nuiti bu, é leʋe nɔ ga ziɛ yei ʋelei, é zooi wu, toɠa zeeli ti ma, dɛkpu nui ta gaazuɠole nui niiti wɔinzeɠeʋɛ mà.» Miná ɠa faalaalii naa zeɠeni ná ga: «Gaazuɠole nui ta dɛkpu nui ti la lɛa pɛlɛi wu.»
9Davide zeini taazuʋɛ, é ná laasei pɛɛ ga «Davide ná-taa wolai.» É ta ɓɔni taai zɛbɛi ʋa ga pɛlɛiti ta siɠigiti, niiti é ti loni maaɠoolii zu.
10Davide zɛbɛi ɠɛni liizu ga wɔɔlɔa, tama Ɠɔoɠɔ GALAGI Fai-Pɛ-Maliɠii ɠɛni ba.
11Tiil masagi Ɠilame keelaiti teʋeni Davide ma, é sɛdele guluiti teʋe ma, ta pɛlɛ maalɛɛ nuiti, naa ʋɛɛ kɔtu zaɠa nuiti ba. Ti masa pɛlɛi loni Davide ʋɛ.
12Davide kwɛɛni naazu ga Ɠɔoɠɔ GALAGI tɔun toga ga Izelayɛle masagi, ta é ɠɛni ná-masadai ɠaawɔɔlɔzu, ná-nuɓusɛiti maaʋele ma, Izelayɛle nuiti.
13Davide zeɠeai ma Ɠeeɓelɔn, é li zeizu Zeeluzalɛme, é anza ɠiligaa vuluni, ta é tanigaa zei, niiti ti la vuluni ga zɔiti kɛʋele. É doun zunuiti ta doun anzanuiti sɔlɔɔni naati ba.
14Davide ná-doun zunuiti daaseigiti kaa, niiti ti zɔlɔɔni Zeeluzalɛme: Samua, Sɔɓaɓe, Natan, Salɔmɔn,
15Yiɓaal, Elisua, Neefɛge, Yafia,
16Elisama, Eliada, ta Elifeelɛte.
17Siɛgi zu Filiseti nuiti ti mɛnini la ga ti Davide zeiɗa ga Izelayɛle masagi, ti gulɔi ziɛ ma, ti lɛɛni gaiziɛ vai ma. Davide ma wooi mɛnini, é yei kɔɔlaɠai zu.
18Filiseti nuiti ti ʋaani ga kɔɔi, ti ʋu Lefayime ʋɛtugi zu.
19Davide Ɠɔoɠɔ GALAGI ɠaazaɠani, é ɠɛ ma: «Nà zoo nɛi gè li Filiseti nuiti daalɔɠɔma? Ɗa ti lɔ nɛi zèezu ɓaa?» Ɠɔoɠɔ GALAGI gooɠaaʋoteni, é ɠɛ ma: «Li, tɔɔzei zeɠe ma nɔpɛ ge la ba, nà Filiseti nuiti dɔɔzu è yeezu.»
20Davide zeelini Ɓaale-Pelasime, é vɔni ti ma miná. Davide ɠɛni ma: «Ɠɔoɠɔ GALAGI zeɠe wɔɔʋɛ sìli nuiti ta-ɠɔɔɓɔgi ʋa tùɠɔ, eɠɛʋelei ziɛi a ɗa kaaɠai ɠolo la.» Naa ɠa é kɛɛni, ti ná laasei pɛɛni ga Ɓaale-Pelasime (nii poluʋɛ ga «Maliɠii nii é zeɠe wɔɔzu»).
21Filiseti nuiti ti ta-ɠɔɔɠɔ ganigiti tooni ya miná, Davide ta ná-kɔɔɠɔ nuiti ti naati seɠe.
22Filiseti nuiti ti ɠaleni ma ʋolu ga kɔɔi, ti ʋu Lefayime ʋɛtugi zu.
23Davide Ɠɔoɠɔ GALAGI ɠaazaɠani ʋolu. Naa gooɠaaʋoteni, é ɠɛ ma: «Mina ti laaɠomi. Ɠula ga ti ʋolu ʋelei, ɗa zeelizu ti ma guluiti tetemaʋɛ.
24Siɛgi zu è nu ɠɔɠɔ lugi mɛnisu da guluiti saama, zuvilɛ, è ʋa, mazɔlɔɔ názu ɠa gè losu da è luɠɔ, nii a kɛ gè vɔni Filiseti nuiti ma.»
25Davide naa ɠɛɛni, nii Ɠɔoɠɔ GALAGI boni ma. É vɔnini Filiseti nuiti ma, é ɗa ti ɓɛ, é zo Geeɓa, é zeeli Geezɛɛl.
