Yon 17

1

2

3

4

5

6

7

8

9

10

11

12

13

14

15

16

17

18

19

20

21

¹Be, Yesu go gwaha yineŋbe kotaŋ kaŋ Al Kuruŋ gaha inyiŋ: “Ado, nalube gago forok yihi. Urge deŋem turŋuŋ yaŋ goyen kawan irayiŋ. Gogab ne Urge gare wor deŋge turŋuŋ yaŋ goyen kawan ireŋ.

²Ge beleŋ megen niŋ alya bereya kuruŋ gayen doyaŋ yird yird tareŋ gobe ne nunariŋ. Gogab alya bereya ne nunariŋ goyen geya hugiŋeŋ heŋ heŋ goyen yuneŋ.

³Geya hugiŋ heŋ heŋ gote beleŋbe gahade: al beleŋ Al Kuruŋ fudindebe ge guŋkureŋ po ha yeŋ nurd guneŋ haŋ, irde ne Yesu Kristu gayen ge beleŋ nad nerke wamiriŋ yeŋ nurd nuneŋ haŋ gobe geya hugiŋeŋ heŋ heŋ gote beleŋ.

⁴Nebe megen gar meteŋ nunariŋ gobe pasi irmiŋ. Gwaha matbe saŋiŋge turŋuŋ yaŋ goyen al yikala yirmiŋ.

⁵Niŋgeb, Ado, haŋkabe ge hitte kweŋ tihim geb, megeŋ ga ma forok yiriŋya geya heŋya saŋiŋne turŋuŋ yaŋ hinhem gwahade goyen po nirayiŋ.

⁶“Be, nebe megen niŋ mar hitte mat alya bereya basiŋa yirde nunariŋ mar goyen hitte gebe al gwahade yeŋ kawan po yikala yirde himyen. Mel gobe gere. Ge beleŋ ne nunkeb merege momoŋ yirmeke nurdeb gama irde haŋyen.

⁷Gayenterbe det kuruŋ ge beleŋ nunariŋ gobe ge hitte mat po watiŋ yeŋ nurde haŋ.

⁸Ge beleŋ mere gwahade yinayiŋ ninariŋ goyen yinmekeb fudinde yeŋ nurde haŋ. Irdeb nebe ge hitte mat wamiriŋ gobe fudinde wor po yeŋ nurde haŋ. Mel gabe ge beleŋ nad nerke wamiriŋ goyen wor fudinde yeŋ nurde haŋ.

⁹“Nebe mel gayen faraŋ yurayiŋ yeŋ gusuŋaŋ girde hime. Megen niŋ mar goke ma gusuŋaŋ girde hime. Ge beleŋ ne nunariŋ mar gobe gere niŋgeb, yeŋ ge po teŋ gusuŋaŋ girde hime.

¹⁰Nere alya bereya kuruŋ gobe gere, irde gere alya bereya kuruŋ go wor nere. Niŋgeb mel gare deŋne turŋuŋ yaŋ wor po goyen kawan irde haŋyen.

¹¹Nebe megen gar ma heŋ tihim, ge hitte hurkeŋ. Goyenbe mel gabe megen gar hinayiŋ. Ado, gebe al wukkeŋ wor po, mata buluŋgem moŋ. Gebe tareŋge yaŋ, irde tareŋge goyen ne nunariŋ. Niŋgeb saŋiŋger mel ga doyaŋ yirde hike al buluŋ beleŋ epte ma buluŋ yirnayiŋ. Gogab geya neya uŋkureŋ har gwahade goyen po, yeŋ wor awalikde po hinayiŋ.

¹²Neb mel gaya tumŋaŋ heŋyabe tareŋ nunariŋ gore po doyaŋ yirde petpet yirde himekeb igiŋ hinhan. Irdeb al kura ma timiymiŋ. Goyenpoga al kura bikkeŋ gwaha tiyyeŋ yeŋ asaŋger katiŋ goyen fudinde forok yeŋ yeŋ ge teŋbe al uŋkureŋ po ga mabok hiyuŋ.

¹³“Be, gabe ge hitte hurkutek heŋ hime. Goyenbe amaŋ heŋ himyen gwahade po mel gayen wor amaŋ heŋya hiwoŋ yeŋ mere kuruŋ gago girhem.

¹⁴Mel gabe merege momoŋ yirmeke gama irde haŋyen. Irkeb megen niŋ mar beleŋ haram yirde haŋyen. Gobe neb megen niŋ al moŋ gwahade goyen po, yeŋ wor megen niŋ al moŋ geb, gogo haram yirde haŋyen.

¹⁵Goyenbe mel gayen megen gar mat yade siŋa yirke kanduk kura ma yeneŋ hinayiŋ yeŋ ma gineŋ hime. Gwaha titŋeŋbe al buluŋ beleŋ buluŋ yird yird niŋ pet pet yirde hayiŋ yeŋ gusuŋaŋ girde hime.

¹⁶Nebe megen niŋ moŋ gwahade goyen po, mel gayen wor megen niŋ mar moŋ.

¹⁷Meregebe fudinde wor po. Niŋgeb mereger mel ga saba yirke delger wukkeŋ henayiŋ.

¹⁸Ge beleŋ nad nerke megen gar wamiriŋ gwahade goyen po, ne beleŋ wor mel gayen yad yermeke megen niŋ alya bereya hitte kunayiŋ.

¹⁹Nebe mel gayen manaŋ gere kudiŋeŋ wor po henayiŋ yeŋ nurdeb yeŋ ge teŋ nigeŋ gayen wa guneŋbe gigen kudiŋeŋ wor po hitiŋ hime.

²⁰“Be, gusuŋaŋ girde hime gabe mel gake po moŋ. Kame mel gare mere tagalke meremiŋ nurde ne niŋ dufaymiŋ tareŋ irnayiŋ mar goke wor gusuŋaŋ girde hime.

²¹Gogab, Ado, gebe neya hirekeb ne wor geya har gwahade goyen po, mel gayen wor gwahade po heŋ awalikde hinayiŋ. Irdeb mel gabe deyyat awalik bana hiwoŋ yeŋ gusuŋaŋ girde hime. Irkeb ge beleŋ nad nerke wamiriŋ goyen megen niŋ mar beleŋ fudinde yeŋ nurnayiŋ.

²²Ge beleŋ deŋne turŋuŋ yaŋ iraŋ gwahade po, ne wor mel ga gwaha yirhem. Gogab deyyabe uŋkureŋ har gwahade goyen po, yeŋ wor gwahade po heŋ awalikde hinayiŋ.

²³Mel gore fudinde wor po awalikde hiwoŋ yeŋ nurdeb gebe neya hireŋ, irkeb nebe yeŋya hitek. Gogab al hoyaŋ gore ge beleŋ nad nerke wamiriŋ yeŋ nurnayiŋ. Irde ge beleŋ ne niŋ amaŋeŋ nurde ha gwahade goyen po, mel gayen wor amaŋeŋ nurde yuneŋ ha goyen megen niŋ alya bereya beleŋ nurnayiŋ.

²⁴“Ado, ge beleŋ al ne niŋ nunariŋ mar gobe ne heŋ gasuŋde kuŋ gor hiwoŋ yeŋ nurde hime. Irdeb megeŋ ga ma forok yekeya ne gayen bubulkuŋne wor po yeŋ nurd nuneŋbe deŋne turŋuŋ yaŋ irariŋ goyen mel gare kenwoŋ yeŋ nurde hime.

²⁵Ado, gebe Al Huwak wor po. Megen niŋ marbe ma nurd guneŋ haŋ. Goyenbe nebe nurde guneŋ hime. Irde neya haŋ mar gayen wor ge beleŋ nad nerke wamiriŋ goyen fudinde yeŋ nurde haŋ.

²⁶Ne beleŋ gebe al gwahade yeŋ mel gar haŋ gayen yikala yirde himyen. Irde kame wor gwahade po yikala yirde heŋ. Gogab ge beleŋ bubulkuŋne wor po yeŋ nurd nuneŋ hayen gwahade po, yeŋ wor gwahade po nurd yuneŋ hayiŋ. Irke nigeŋ gayen wor yeŋya hitek,” inyiŋ.