Text copied!
CopyCompare
Lagano da Isambi da Mndewa na Mkombola Wetu Yesu Kilisto - YOHANA.

YOHANA. 12

Help us?
Click on verse(s) to share them!
1Vigasigale mazua sita kuvikila Pasaka, Yesu kachola Betania hakae ya Lazalo, munhu ija yazusigwe kulawa mkudanganhika.
2Wamtelekela mandia ga ichungulo, Mata kakala yowataza kugomela. Lazalo kakala imwe wa wanhu wakalile hameza na Yesu.
3Abaho, Maliamu kasola nyhupa ya mavuta ga kunung'hila ga hela bwando gatendigwe na nado, kamwitila Yesu mmagulu, abaho, kamuhangusa na mvili zake. Mnung'ho unogile wa gamavuta gaja ga kunung'hila wenela mng'anda yose.
4Mwanahina imwe wa Yesu, yokemigwa Yuda Isikalioti ayo yamuhonzile Yesu, kalonga,
5“Habali mavuta gano ga kunung'hila sambigaguzigwe zipatikane hela za kuliha kitumetume cha mulao umwe giladi wagweleligwe wakumbulu?”
6Kalonga vino si kamba kowonela bazi wakumbulu, ila kwavija kakala m'bavi. Heyo iyo yakalile yopapa umkoba wa izihela na kakala yokwiba kulawa himo.
7Ila Yesu kalonga, “Mulekeni! Lekeni yageke mavuta ago mbaka zua da mazisi gangu.
8Wakumbulu munao mazua gose, ila nie sikala namwe mazua gose.”
9Wayahudi bwando wahulika kamba Yesu kakala mkiwambo cha Betania, avo wachola kuja siyo tu kumulola Yesu ila vivija kumulola Lazalo, ayo Yesu yamzusile kulawa mkudanganhika.
10Avo wakulu wa wakulu wa nhambiko weka zundo da kumkoma Lazalo vivija,
11kwavija sama ya gaja gatendigwe kumwake, Wayahudi bwando wawalema hewo na kumtogola Yesu.
12Zua da ikabili, wanhu bwando wezile Kulusona lwa Pasaka wahulika kamba Yesu kokwiza Yelusalemu.
13Avo wasola mitambi ya mitende walawa wachola kum'bokela, kuno wenula dizwi, wolonga, “Yatogolwe Mulungu! Mulungu mmoteze ayo yokwiza mtwaga da Mndewa! Mulungu mmoteze Mndewa wa Islaeli!”
14Yesu kamvika mwana mhunda, na kukwela uchana yake, kamba Nyandiko Zing'alile vuzilonga,
15“Sambiudumbe, gweye kiwambo cha Sayuni! Mndewa wako kokwiza, yapapigwe mumgongo wa mhunda mdodo.”
16Wanahina zake hawagatangile gano kipigiti kija, ila Yesu viyayenzigwe, wakumbukila kamba Nyandiko Zing'alile zilonga gano na avo gatendigwa gano sama yake.
17Wanhu wakalile na Yesu kipigiti viyamkemile Lazalo kulawa mdipanga na kumzusa kulawa mkudanganhika wagendelela kugapeta gaja galawilile.
18Wanhu bwando wachola kum'bokela, kwavija wakala wahulike kamba katenda mzonza uno.

19Abaho, Mafalisayo wakiilongela, “M'vona, tuhumwa! Lola, ulumwengu wose womkweleleza heyo!”
20Mmwanza wa wanhu waja wacholile Yelusalemu kutambika kipigiti cha Ulusona lwa Pasaka wakala Wagiliki.
21Wachola ha Filipo, yakalile mwenekae wa Betisaida ako Galilaya, wamulongela, “Mndewa, tolonda kumona Yesu.”
22Filipo kachola kumulongela Endelea, na awo wabili wachola kumulongela Yesu.
23Yesu kawalongela, “Kipigiti cha nie, Mwana wa Munhu, kuyenzigwa kivika.
24Nowalongela ikweli, kamba nzele ya ngano hailagale hasi na kudanganhika, yosigala kuwa imwe. Ila ihadanganhika, yolela nzele bwando.
25Awo wounogela ugima wao wowagiza, na awo wowihila ugima wao muulumwengu uno wowika kuugima wa digunge.
26Munhu yoyose yolonda kunisang'hanila kolondigwa yang'holeleze nie, kuja kunili na mtumigwa wangu vivija kowa hiko. Tataangu komuhishimila munhu yoyose yonisang'hanila nie.
27“Moyo wangu una giogio, nongeze? Nilonge, ‘Tata, sambiuleke mbuli zino zinivikile?’ Bule, kwavija niza sama ya mbuli zino.
28Tata, udiyenzi twaga jako!” Abaho, dihulikwa dizwi kulawa kuulanga, “Nidiyenzi, na nodiyenzi kabili.”
29Wanhu bwando wakalile haja wadihulika dizwi dija, na wanhu wayagwe walonga ukala mdumo. Wayagwe walonga, “Msenga wa Mulungu wa kuulanga kalonga nayo!”
30Ila Yesu kawalongela, “Dizwi dino dihulikwe si sama yangu nie, ila sama yenu mweye.
31Kino hicho kipigiti cha kutaguswa kwa ulumwengu, na kipigiti kino mtawala wa ulumwengu uno kowingigwa.
32Nihenuligwa uchana kulawa muisi, nomkwega kila munhu kumwangu.”
33Mkulonga gano kalagusa ifa ilihi yondayadanganhikile.
34Adija ididale da wanhu dimulongela, “Malagizo getu gotulongela kamba Kilisto kokala milongo yose. Avo gweye kolongaze kamba Mwana wa Munhu kolondigwa yenuligwe uchana? Mwana ino wa Munhu iyo yalihi?”
35Yesu kawalongela, “Mulangaza wowa namwe mkipigiti kidodo. Gendeleleni kutembela mnzila imulinayo kipigiti mulangaza ung'hali namwe, giladi ziza sambidiwavike. Kwavija Munhu yotembela mziza hakutanga koyochola.
36Utogoleni mulangaza kipigiti u hamoja namwe, giladi muwe wana wa mulangaza.” Yesu viyeshile kulonga gano, kasegela kachola kuifisa.

37Hamoja na kutenda mizonza ino yose hameso gao, hawamtogole,
38avo gaja gayalongile Muhokozi Isaya galawilila kweli, yolonga, “Mndewa, yalihi yautogole usenga wetu? Mhiko ya Mndewa igubuligwa ha munhu yalihi?”
39Hawatogole, kwavija vivija Isaya kalonga,
40“Mulungu kagagubika meso gao, na kuzibumbuwaza nzewele zao, avo meso gao sambigalole, na sambiwavitange mnzewele zao, giladi sambiwanihindukile, niwahonye.”
41Isaya kagalonga gano kwavija kayona yenzi ya Yesu na kumulonga heyo.
42Avo wanhu bwando mmwanza wa wakulu wa Wayahudi wamtogola. Ila sama ya kuwadumba Mafalisayo hawamtogole hakimwagaia, kwavija wadumba sambiwawawinge kulawa mng'anda ya nhambiko.
43Wanogelwa na nhogolwa za wanhu kubanza nhogolwa za Mulungu.
44Yesu kenula dizwi kalonga, “Munhu yoyose yonitogola nie hanitogola nie niiyeka, ila vivija komtogola ayo yanhumile.
45Munhu yoyose yonyona nie vivija komona ayo yanhumile.
46Nie niza muulumwengu kamba mulangaza, avo munhu yoyose yonitogola sambiyasigale mdiziza.
47Kamba munhu yoyose yahahulika usenga wangu na kuuleka baho, simtagusa. Kwavija nie sizile kuutagusa ulumwengu ila kuukombola.
48Kwavija awo wonilema nie na kuulema usenga wangu, kabaho yondayawataguse. Mbuli zinilongile zowa mulamula hana idizua da ikimambukizo.
49Kwavija silongile kamba vinilondile nie mwenyego, ila Tata yanhumile iyo yandagize gaja ga kulonga na vija vondanigalonge.
50Na nivitanga kamba ndagizi zake zogala ugima wa digunge. Avo kinilonga nie kicho Tata chayanongele nilonge.”