1Gudi'di si nga la? uyé Jesús cherica ti nisa ro' lá Galilea. Laca nuu tu rabi ni Tiberia.
2Yenanda stale binni laabe, purti ma biiya ca ca milagru ni bi'ni be ra bisianda be binni huará.
3Oraque udxi'ba be lu ti dani, ne gurí né be ca discípulu stibe raqué.
4Ma zeda yuba saa pascua.
5Ora undisa lú Jesús biiya nanda stale binni laa, na rabi Felipe: ―Paraa chi sí nu ni go irá binni ri'.
6Uní' be zaqué para gu'ya si be xi na Felipe, purti laabe maca nanna be xi chi guni be.
7Para na Felipe rabi laabe: ―Nin chupa gayuaa denariu pan qué nugaanda nicaa cabe tindaa tindaa cada tobi cabe.
8Oraque na Andrés, bi'chi Simón Pedru, tobi de ca discípulu stibe que, rabi laabe:
9―Rarí nuu ti hombre huiini napa gaayu pan de cebada ne chupa benda huiini', peru xi pe ndi para irá binni ri'.
10Para rabi be laaca': ―Laucuí laacabe. Ne gurí cabe lu ca guixi huiini ni nuu raqué, bia'si gaayu mil hombre.
11Oraque gucuaa be ca pan que ne biluxe bidii si be diuxquixe Dios, bidii be cani ca discípulu stibe qui'zi ca lu ca binni que. Zaqueca bi'ni né be ca benda huiini que, ne ucuaa ca binni que bia' gucala'dxi ca'.
12Biluxe gudó si ca binni que gudxi be ca discípulu stibe utopa ca ni biaana que ti cadi initi gasti'.
13Ne dede bidxá tipa doce dxumi de pan ndahui ni biaana ra biluxe gudó ca binni que.
14Ne ora bi'ya ca binni que milagru ni bi'ni be que la? na ca': ―Ndi nga dxandí dxa profeta ni gueeda guidxilayú que.
15Peru ora gunna Jesús ma caní' stiidxa cabe gueda naaze cabe laa para guni cabe laa rey stícabe la? biree chu de laacabe gudxi'ba stubi lu dani que.
16Ma ziyaazi gubidxa biete ca discípulu stibe uriá nisa que,
17ne biuu ca ndaani ti canuá huiini ne biaba ca nisa que para che ca Capernaum. Ma cacahui, ne ca'ru guedandá Jesús ra nuu cabe.
18Bizulú biete ti bi yooxho ne biasa ola sti nisa que.
19Ma uzá cabe bia' gaayu o xhoopa kilómetru lu nisa que ora bi'ya cabe zeeda za Jesús lu nisa, zeda dxiña ra nuu canuá stícabe que ne bidxibi cabe.
20Peru na Jesús rabi laacabe: ―Naa ndi', cadi idxibi tu.
21Oraque ru uluu cabe laabe ndaani canuá que, ne oraqueca yendá cabe ra ze cabe.
22Sti dxi que nuu ru caadxi de ca binni que cherica nisa que. Ne nanna ca ti canuá si bizuhuaa raqué, ne laca nanna ca qué niné Jesús ca discípulu sti' sínuque stubi ca ze ca'.
23Oraque biiya cabe zuhuaa caadxi canuá de Tiberia gaxha de ra gudó cabe pan biluxe si bidii Señor diuxquixe Dios que.
24Ne ora bi'ya cabe qué guinni Jesús raqué nin ca discípulu sti la? biuu cabe ndaani ca canuá que, ze cabe Capernaum ziyubi cabe Jesús.
25Ne ora yendá cabe ra nuu be cherica nisa que la? rabi cabe laabe: ―Maistru pora beedu rarí'.
26Para na be: ―Nanna dxi'che cadi canayubi tu naa purti biiya tu milagru ni bine sínuque purti gudó to pan dede ra bidxá tu.
27Cadi ucaa ique tu guni tu dxiiña para gapa tu endaró ni iquiiñe si tu ndaani guidxilayú ri', purti qué zandaa ni, sínuque laucaa ique guni tu dxiiña sti Dios para gapa tu enda nabani ni qué zaluxe. Naa nga Hombre Biseenda Dios ne naa udiee ni laatu, purti ma ulí Dios naa gune ni.
28Oraque na ca': ―Ximodo guni du xhiiña Dios ya'.
29Para rabi be laaca': ―Ndi nga dxiiña na Dios guni tu: guni cre tu ni biseenda be.
30Bigueta na ca': ―Xiñee qué uluí' lu laadu ti seña xaibá' para guni cre du lii. Xi milagru ru'nu'.
31Dxi nuu ca bixhoze gola nu ndaani gui'xhi gudó ca pan ni rabi cabe maná que casi cá lu Xqui'chi Dios ra na: “De ibá' bidii be pan gudó ca'.”
32Oraque rabi be laaca': ―Gabe ca' laatu, cadi pan de ibá' ngue bidii Moisés laatu, sínuque Bixhoze nga cudii laatu ni dxandí pan de ibá'.
33Purti pan ni cudii Dios binni la? nga ni biete de ibá', ne rudii ni enda nabani binni guidxilayú.
34Para na ca': ―Cadi guiaana dxiu de udiiu pan ca laadu, Señor.
35Oraque rabi be laaca': ―Naa nga pan ni rudii enda nabani. Tu gueeda ra nuaa', qué ziuu dxi indaana, ne tu guni cre naa, qué ziuu dxi gati nisa.
36Peru ma gudxe laatu neca ma biiya tu naa, qué runi cre tu.
37Irá cani udii Bixhoze naa zeeda ra nuaa', ne tutiisi gueeda ra nuaa' qué ziuu dxi iladxe laa.
38Purti biete de ibá' cadi para gune ni racaladxe', sínuque para gune ni na ni biseenda naa.
39Ne ni racala'dxi be gune la? cadi unite nin tobi de cani rudii be naa, sínuque indisa laaca dxi iluxe guidxilayú.
40Purti racala'dxi be gapa irá ni gu'ya naa ne guni cre naa, enda nabani ni qué zaluxe, ne zandisa laaca dxi iluxe guidxilayú.
41Oraque bizulú ca judíu caní' ca laabe dxidxigá purti na be laabe nga pan ni biete de ibá'.
42Ne na ca': ―Cadi xa ndi nga Jesús xiiñi José que. Lácaxa qué runibiá' nu bixhoze be ne jñaa be. Ximodo na be de ibá' biete be ya'.
43Para rabi be laaca': ―Cadi ma cuchaaga ruaa tu racá.
44Biseenda Bixhoze naa, ne iruti zanda gueeda ra nuaa', pa qué cuidxi be laa. Ne zandisa laa dxi iluxe guidxilayú.
45Chiqué bicaa ca profeta: “Zadxiña dxi guiene irá binni ni rusiidi Dios.” Ngue runi yanna cada tobi ni guna diaga ne iziidi ni na Bixhoze la? reeda ra nuaa'.
46Cadi purti nuu ru tu ma biiya laabe, sínuque naa sia' ma biiya laabe, purti de ra nuu be benda'.
47Ne gabe ca' laatu, tu runi cre naa la? ma napa enda nabani ni qué zaluxe,
48purti naa nga pan ni rudii enda nabani.
49Gudó ca bixhoze gola tu maná ndaani gui'xhi', peru guti ca'.
50Peru naa cuzeete pan ni riete de ibá' ti irá tu go ni qué zati.
51Naa nga pan ni biete de ibá'. Tu go ni la? qué ziuu dxi gati'. Ne pan ri nga cuerpu stinne ni chi udiee para ganda ibani binni guidxilayú.
52Ucuaa yu né ca judíu ni uní' be que, na ca': ―Ximodo udii hombre ri cuerpu sti idó' no.
53Para rabi be laaca': ―Gabe ca' laatu, pa qué go to cuerpu sti Hombre Biseenda Dios ne qué gue tu rini sti la? qué zapa di tu enda nabani.
54Tu go cuerpu stinne' ne gue rini stinne la? ma napa enda nabani ni qué zaluxe, ne zandisa laa dxi iluxe guidxilayú.
55Purti cuerpu stinne nga ni dxandí naquiiñe go binni, ne rini stinne nga ni dxandí naquiiñe gue cabe.
56Tu go cuerpu stinne ne gue rini stinne la? nuu ne naa tobi si, ne laca zaqueca nuaa nia laa tobi si.
57Nabani Bixhoze ni biseenda naa. Naa laca nabane pur laabe, ne zaqueca tu go cuerpu stinne laca zabani pur naa.
58Nga nga pan ni biete de ibá'. Adxé nga pan ni gudó ca bixhoze gola tu ne guti ca'. Peru tu go pan ni cuzeete ri la? zapa enda nabani ni qué zaluxe.
59Irá nga uní' Jesús ra cusiidi ndaani yu'du Capernaum.
60Ora bina diaga cani canazá né laabe ni uní' be que la? na caadxi de laaca': ―Nabé naná ca diidxa cusiidi be ca. Tuu ndi zanda icaa cani.
61Peru nanna be xi caní' ca discípulu stibe ra cuchaaga ruaa ca zaqué, para rabi be laaca': ―Ñee, bininá ca diidxa ca laatu la?
62Xi niná tu pa ñuuya tu zigui'ba Hombre Biseenda Dios ra uyuu chiqué ya'.
63Pa qué gapa cuerpu stitu espíritu la? qué riquiiñe', purti espíritu nga rudii enda nabani laatu. Ca diidxa ni huayué nia laatu ca la? espíritu cani, ne zudii cani laatu enda nabani ni qué zaluxe.
64Peru nuu caadxi de laatu qué runi cre. Uní' be zaqué, purti dede dxi bizulú uzá né ca laabe maca nanna be uná nga ni qué zuni cre laabe, ne tu chi utoo laabe.
65Ne laca na be rabi be laaca': ―Nga runi ma gudxe laatu, iruti zanda gueeda ra nuaa pa qué uchiña Bixhoze laa.
66Ne dede dxi que bigueta stale de cani canazá né laabe que, ma qué ninanda ru ca laabe.
67Para rabi be doce discípulu stibe que: ―Laga laatu ya', laca zabigueta tu la?
68Oraque na Simón Pedru rabi laabe: ―Tu ru ra nuu ñuu du ya', Señor. Lii siou' nga rui' neu laadu ni rudii enda nabani ni qué zaluxe.
69Ma runi cre du ne ma nanna dxichi du lii nga Cristu Xiiñi Dios ni nabani.
70Para rabi be laaca': ―Ñee cadi naa ulié idubi doce tu, ne tobi de laatu sti binidxaba la?
71Rarí cuzeete be Judas Iscariote, xiiñi Simón, purti laa nga chi utoo laabe, ne laa zeeda lade doce que.
