San Juan 6

1

2

3

4

5

6

7

8

9

10

11

12

13

14

15

16

17

18

19

20

21

¹Xi cavatju yëjë xcusun vëhë ne, cavetju Jesús quiji me ngunda vëhë tsëhë laguna Galilea, xi hacuaha hmí rë laguna Tiberias.

²Hane jemu xutacjín camahani xi quijitjengui me Jesús ta, tsëhë xi cavëë me cjuarcun xi casahmi Jesús cojo xuta hmu rë.

³Hane Jesús ne, quijiniji me ngu ndetjún, hane ngajan cavéjña me cojo xuta ladu rë me.

⁴Hane Pascua, suhi xi sahmi xuta tjë rë Israel ne, hacuaha ha camatiña.

⁵Hane xi vutsejen Jesús xi jemu xuta cjín nduvatjengui rë me ne, sehe cachja me cojo Felipe cuitjin: ―‍¿Jani cuanguen chaan niñu xi sinë xuta xi cuacun vë? ―‍Cuatjin cachja Jesús.

⁶Cuatjin cachja me xi cjuahachuva me Felipe ta, tsëhë xi Jesús ne, ha vëë me mé xi sahmi me.

⁷Ngajan xi Felipe ne, cuitjin cafayangui me: ―‍Sa xi chaan niñu cojo tujún xi chji rë xuta jo cientu nixtin ne, hisca chutaain xi sacú tsë tsë sinë jima ngu xuta vë. ―‍Cuatjin cafayangui Felipe.

⁸Ngajan xi ngu xuta ladu rë Jesús, Andrés hntsë Simón Pedru ne, cuitjin cachja me cojo Jesús:

⁹―‍Nguehe secun ngu cha lihndi xi yaha hñú niñu cojo jo chu ti. Peru ¿mé chutaha vë xi sinë xuta xi cuarcumu cjín me? ―‍Cuatjin cachja Andrés.

¹⁰Ngajan xi Jesús ne, cuitjin cachja me: ―‍Tinújun cojo xuta vë ne, catiyuju me. ―‍Cuatjin cachja me. Quihndë ne, ngajan cahndë́ vëhë ne, jemu jyë cahndë́ tjin ndiji. Hya xi camá ne, ngajan caviyuju sacuaha hñú mil xihin.

¹¹Ngajan xi Jesús ne, cafaha me niñu jan, hane, xi cafë casua me nacuechji rë Nina ne, sehe cavatëcja me niñu jan ngajñi rë xuta xi siu jan. Hacuanitjin ni casahmi me cojo chu ti jan. Casua me ha tucutjin xi meje sinë xuta jan.

¹²Hane hya xi ha catsë rë xuta xi cajinë me ne, sehe cachja Jesús cojo xuta ladu rë me jan cuitjin: ―‍Quihndë ne, chjayun yëjë xi cavángui vë ne, cojo sa xi hacuiin chajá hisca hitsë. ―‍Cuatjin cachja Jesús.

¹³Hane xi cafaya xuta ladu rë Jesús yëjë ni xi cavángui tsëhë hñú niñu xi cajinë yëjë xutacjín jan ne, catsinguitsë me tejó chajne.

¹⁴Hane xi cavëë xuta cjuarcun xi casahmi Jesús jan ne, cuitjin cachja me: ―‍Cjuaquixi xi me vihi profeta xi cuinduva ngasunhndë. ―‍Cuatjin cachja xuta jan.

¹⁵Peru Jesús ne, ha vëë me xi ha tu hora sa xi cjuaha xuta me cojo ngujyë camahani xi suaxa rë me xi cuma titjun me. Vëhë xi Jesús ne, cavetjuxin nga me, quiji suvá ni me hisca rcu ndetjún.

¹⁶Quihndë ne, xi quiji hora jan ne, quijijne xuta ladu rë Jesús tjehen laguna.

¹⁷Hane xi cavisehen me ngu barcu ne, cavuya canduva nga me ngunda vihi tsëhë laguna xi cjue me nandya Capernaum. Hya xi camá ne, camajñu, peru Jesús ne, cjëë cjuetjengui me xuta ladu rë me jan.

¹⁸Hane hora vëhë ne, xi jercu tu hñu camahani tivanga tjo ne, sacuaha xi sexu nandá tsëhë laguna jan.

¹⁹Ha xcun xi ha quiji me xi cuacun jan cojo barcu sacuaha hñú o sa jyun kilómetro xcun nandá jan ne, cavëë me xi nduva ntsacu Jesús xcun nandá, tisahmitiña me tsëhë barcu. Hane xuta ladu rë me jan ne, catsacjun me camá.

²⁰Peru Jesús ne, cachja me cuitjin cojo xuta ladu rë me jan: ―‍Ngahan vi. Xicarcuun. ―‍Cuatjin cachja me.

²¹Ngajan xi xuta ladu rë Jesús jan ne, cojo yëjë ni cjuasua ne, cafahatsja me Jesús cahntsua barcu. Hane ha tu ñahñu cafehe barcu cojo rë me nangui quixí, cahndë́ hiscan cjui me.

²²Hane xi camá nchujun jan ne, xutacjín xi caviyuju ngunda vëhë tsëhë laguna jan ne, catsinguitsjen me xi ngujña ne, ngu tu tu barcu tacun jan. Hacuaha vëë me xi Jesús ne, quijiin me cojo xuta ladu rë me barcu vëhë ta suvá ni xuta ladu rë Jesús quiji me.

²³Peru ngujo barcu xi canduva tsëhë nandya Tiberias ne, cafehe tiña hiscan xi cajinë xutacjín jan niñu hora xi cafë casua Nai naja nacuechji rë Nina.

²⁴Hane xi cavëë xutacjín jan xi hacuiin Jesús hacuiin xuta ladu rë me siu cuaha me jan ne, sehe cavisehen me barcu xi sehe cafehe jan, quiji me nandya Capernaum xi cuanguise me Jesús.

²⁵Hane xi casacu rë xuta xi cuacun jan Jesús ngunda vihi tsëhë laguna jan ne, cavinenguise me cuitjin: ―‍Maestro, ¿janihya canduvun nguehe ni? ―‍Cuatjin cavinenguise xuta xi cuacun jan.

²⁶Ngajan xi Jesús ne, cuitjin cafayangui me: ―‍Cuichjá cojo nuju cjuaquixi ta ngayujun ni ngayun ne, nduvuntjengun ná, peru hacuiin ngatsë rë xi cahyun cjuarcun xi casahme ta ngatsë rë xi cachinu niñu jan hisca xi catsë nuju.

²⁷Nihñu ngatsë rë xichine, peru hacuiin xichine xi vetsun ta xichine xi hacuiin vetsun hacuaha hisca sua cjuahñu xatsë. Vëhë xichine xi suá nuju ngahan xi Quihndi rë Xuta Jain ngahan, ngahan xi sahme cjuarcun cojo sa xi cumatsejen xi cjuaquixi jain xi Nina Nahmi naha catsingatju ná me. ―‍Cuatjin cafayangui Jesús.

²⁸Ngajan xi xuta xi cuacun jan ne, cuitjin cavinenguise me cojo Jesús: ―‍¿Hacutjin ndatjin nihñi, cojo sa xi nihñi hacutjin xi chuya rë Nina? ―‍Cuatjin cavinenguise xuta jan.

²⁹Hane Jesús ne, cuitjin cafayangui me: ―‍Cuitjin meje rë Nina xi nihñu: catamangu tacún cojo ná, ngahan xi catsingatju ná me. ―‍Cuatjin cafayangui Jesús.

³⁰Ngajan xi xuta jan ne, cuitjin cavinenguise me Jesús: ―‍¿Mé cjuarcun nihñu xi sacú chutsijín, cojo sa xi cumangu tacuín cojo nuju? ¿Mé xi nihñu?

³¹Yëjë ni xutachanga naja ne, cajinë me niñu xi camá cojo scuan maná ngajan ngu xín camahani tsëhë nandya, sacuatjin camahindu xcun xujun rë Nina xi chja cuitjin: “Nina ne, tsëhë ngahnga catsingatju me niñu xi cajinë xuta.” Cuatjin camahindu. ―‍Vëhë cjua xi cavinenguise xuta xi cuacun jan Jesús.

³²Ngajan xi Jesús ne, cuitjin cachja me cojo xuta jan: ―‍Cuichjá cojo nuju cjuaquixi ta hacuiin Moisés xi casua me niñu xi nduva tsëhë ngahnga ta Nahmi naha xi sua nuju me niñu jain xi nduva tsëhë ngahnga.

³³Niñu xi sua Nina ne, vëhë niñu xi nduvajne tsëhë ngahnga hacuaha sua rë xuta cjuahñu. ―‍Cuatjin cachja Jesús.

³⁴Hane xuta xi cuacun jan ne, cuitjin cafehya me cojo Jesús: ―‍Tatá, tuhun niji niñu vëhë nchunchujun ni. ―‍Cuatjin cafehya xuta jan.

³⁵Ngajan xi Jesús ne, cuitjin cachja me: ―‍Ngahan xi sacuaha niñu jan xi sua cjuahñu ngahan. Xuta xi cuisehen me ladu naha xi mangucacun me cojo ná ne, ña tsë rë xahasen rë me cjuandaja, sacuaha xi ha quihndë cumavajin rë me cumaxindaain rë me ngundiya nga.

³⁶Ngahan ne, ha cachjá cojo nuju ta ha tichutsujun xcusun xi sahme peru manguaain tacún cojo ná.

³⁷Yëjë ni xuta xi Nahmi naha casua ná me ne, cuinduvatjengui ná me. Hane me xi cuinduvatjengui ná ne, hatuxa tsitjungueen me ta,

³⁸tsëhë xi ngahan ne, xi canduvajne tsëhë ngahnga ne, hacuiin xi sahme sacuatjin xi meje ná ta sacuatjin xi meje rë me xi catsingatju ná.

³⁹Hane me xi catsingatju ná vë ne, meje rë me xi hisca ngu xuta tsëhë yëjë ni me xi casua ná me ne, tsichajan me ta tsicúya me cjuahñu nixtin xi chjaháchuva rë sa nima sa xuta cojo cjuatacun rë.

⁴⁰Hacuaha Nahmi naha ne, meje rë me xi yëjë ni xuta xi vijnercu me yo ngahan xi Quihndi rë Nina ngahan hacuaha cumangu cacun me cojo ná ne, sacú rë me cjuahñu xatsë. Hane ngahan tsicúya me cjuahñu nixtin xi tsichuva Nina sa nima sa xuta. ―‍Cuatjin cachja Jesús.

⁴¹Vëhë xi xutaxa rë yungun xi cuacun jan ne, cavetsihin cavisiajmihma me tsëhë Jesús ta, tsëhë xi cachja Jesús ta: “Ngahan sacuaha niñu xi nduvajne tsëhë ngahnga ngahan.”

⁴²Cuitjin cavisiajmihma me: ―‍¿Hacuiin cha Jesús vihi, xi quihndi rë José? ¿Hacuiin ha hyan nahmi rë cha hacuaha ha hyan naa rë cha? ¿Hacutjin má xi quihndë ne, chja cha xi tsëhë ngahnga canduvajne cha ni? ―‍Cuatjin cavisiajmihma me.

⁴³Ngajan xi Jesús ne, cuitjin cachja me cojo xutaxa rë jan: ―‍Camá ni cuinújunhmú cojo xingun xingu xingu ngayun.

⁴⁴Xuta xi cuma cuisehen me ladu naha ne, suvá ni xuta xi cuisecoo Nahmi naha, me xi catsingatju ná. Me vëhë xi cuma cuisehen me, hane ngahan tsicúya me cjuahñu nixtin xi tsichuva Nina sa nima sa xuta.

⁴⁵Cuitjin camahindu xcun xujun rë Nina xi catsihindu profeta: “Suvá Nina scuxaha me cjuatacun rë yëjë ni xuta.” Cuatjin camahindu. Hane xuta xi vetaharcu cjua rë Nina hacuaha Nina vuxaha me cjuatacun rë ne, visehen me ladu naha.

⁴⁶’Hacuiin xi ha tjin yo xi cavutsejen rë Nahmi naha ta suva ni ngahan xi tsëhë Nina canduva ne, ngahan xi cahvë Nahmi naha.

⁴⁷Cuichjá cojo nuju cjuaquixi ta yo xi mangucacun cojo ná ne, tjin rë cjuahñu xatsë.

⁴⁸Ngahan xi sacuaha niñu xi sua cjuahñu ngahan.

⁴⁹Yëjë ni xutachanga nuju ne, cajinë me niñu xi camá cojo scuan maná ngajan ngu xín camahani tsëhë nandya, peru cavechú nixtin xi cahme me.

⁵⁰Peru niñu xi nduvajne tsëhë ngahnga xi chjá ngahan tsëhë ne, sa xi yo sinë niñu vëhë ne, cueyaain.

⁵¹Ngahan xi quicun ngahan ne, ngahan xi sacuaha niñu xi canduvajne tsëhë ngahnga jan ngahan. Sa xi ngu xuta sinë me niñu vëhë ne, handasa cueya me ne, peru hasen rë me ne, cjue xcun Nina. Niñu xi suá ngahan vë ne, hacui yojo naha xi suá cojo sa xi xuta ngasunhndë ne, sacú rë me cjuahñu xatsë. ―‍Cuatjin cachja Jesús cojo xutaxa rë.

⁵²Hya xi camá ne, xutaxa rë jan ne, cavetsihin cavisiajmicjan me tsëhë Jesús ngajñi rë me cojo xicjin me, cuitjin cachja me: ―‍¿Hacutjin cuma sua cha xi cuajyihi vë yojo rë cha xi xinëë ni? ―‍Cuatjin cachja xutaxa rë jan.

⁵³Hane Jesús ne, cuitjin cachja me cojo xuta xi cuacun jan: ―‍Cuichjá cojo nuju cjuaquixi ta sa xi ngayun xinuu yojo naha ngahan xi Quihndi rë Xuta Jain ngahan hacuaha siuun jni naha ne, tsajin nuju cjuahñu xi cjuaquixi.

⁵⁴Xuta xi jinë me yojo naha hacuaha hvi me jni naha ne, tjin rë me cjuahñu xatsë, hacuaha ngahan tsicúya me cjuahñu nixtin xi tsichuva Nina sa nima sa xuta.

⁵⁵Cuatjin cuma ta, tsëhë xi yojo naha ne, vëhë comida xi cjuaquixi, hane jni naha ne, vëhë nandá xi cjuaquixi.

⁵⁶Me xi jinë yojo naha hacuaha hvi me jni naha ne, visehen me yojo naja, hacuaha ngahan ne, visehen yojo rë.

⁵⁷Nahmi naha, me xi hatuxa tjin rë cjuahñu ne, catsingatju ná me, hane ngatsë rë me vëhë xi tejña cjuahñu ngahan. Ha chuva vëhë ni ne, xuta xi jinë ná ne, cuejña me cjuahñu ngatsë naha.

⁵⁸Cuatjin sahmi niñu xi canduvajne tsëhë ngahnga. Hacuiin tangun cojo niñu xi cajinë xutachanga nuju ta cavechú nixtin xi cahme me. Ha ndaja xuta xi sinë me niñu xi chjá ngahan ne, handasa cueya me ne, peru hasen rë me ne, cjue xcun Nina.

⁵⁹―‍Cuatjin cachja Jesús hya xi cavicuya me xuta ngu yungun ngajan nandya Capernaum.

⁶⁰Hya xi camá ne, jemu cjín xuta ladu rë Jesús xi cuitjin cachja me hya xi cahndë me cjua jan: ―‍¡Jemu choho visiajmi me! ¡Scaain naja cojo cjua vëhë! ―‍Cuatjin cachja me.

⁶¹Peru Jesús ne, ha vëë me cojo cjuatacun rë me xi cuatjin visiajmihma xuta ladu rë me xi cuacun jan. Vëhë xi cachja me cuitjin: ―‍Sa xi meje cuetjunxun tsëhë ndiya naha ngatsë rë cjua xi cachjá cojo nuju vë ne,

⁶²¿mé ningatuhun tacún sa xi chutsujun xi cúya cjuë́neje nga ngahnga hiscan xi cavitejña titjun, ngahan xi Quihndi rë Xuta Jain ngahan?

⁶³Hasen rë Nina ne, vëhë xi sua cjuahñu. Peru ngu xuta ngasunhndë ne, hatuxa cumaji sahmi me cuatjin. Yëjë ni cjua xi ngahan cachjá cojo nuju ne, vëhë sua machaya nuju tsëhë Hasen rë Nina cojo tsëhë cjuahñu xi sua.

⁶⁴Peru tjin yahnga ngayun xi manguaain tacún cojo ná. ―‍Cuatjin cachja Jesús ta, tsëhë xi hisca ntsacu cavetsihin ne, ha vëë me yo xuta xi cumanguaain cacun cojo rë me hacuaha ha vëë me yo xi sahmi rë me entregadu.

⁶⁵Hacuaha cachja sa me cuitjin: ―‍Vëhë xi cuatjin cachjá cojo nuju xi xuta xi cuma cuisehen me ladu naha ne, suvá ni xuta xi cuichja Nahmi naha xi cuisehen. ―‍Cuatjin cachja Jesús.

⁶⁶Ngatsë rë vëhë xi jemu cjín xuta ladu rë Jesús ne, quiji ngaxtun me, hacuaha ha quihndë catsujyiin me cojo Jesús.

⁶⁷Ngajan xi Jesús ne, cavinenguise me xuta ladu rë me xi tejó jan cuitjin: ―‍¿Hacuiin cojo ngayun meje cuangunxun? ―‍Cuatjin cavinenguise me.

⁶⁸Hane Simón Pedru ne, cuitjin cafayangui me: ―‍Ngayun nai naha, ¿yo cuanguintjenguin?, ta ngayun ne, tjin nuju cjua xi sua machaya niji tsëhë cjuahñu xatsë.

⁶⁹Hacuaha ngayin ne, mangutacuín cojo nuju hacuaha hyin xi tsëhë jain Nina ngayun. ―‍Cuatjin cafayangui Simón Pedru.

⁷⁰Ngajan xi Jesús ne, cuitjin cachja me: ―‍Handasa ngahan suva cavaxejen nuju ngayujun ni xi tejó ngayun, peru ngajñi nuju ne, jiyajñi ngu xi ha jiya xitsehen xahasen rë. ―‍Cuatjin cachja Jesús.

⁷¹Jesús ne, tichja me tsëhë ngu cha tsëhë ngajñi rë xi tejó xuta ladu rë me, ngu cha xi hmí rë Judas, quihndi rë Simón Iscariote. Cuatjin cachja me ta, tsëhë xi cha vëhë sahmi cha me entregadu cojo condra rë me.