1Iwe, ewe Samol mi Lapalap a pwal songsefäl ngeni chon Israel, pwe a pesei ngeni Tafit pwe epwe föri och mine repwe feiengau ren. A üra, “Kopwe feila o angei iteiten chon Israel me chon Juta.”
2Iei mine ewe king a üreni Joap me ekewe meilapen mwichen sounfiu mi nom ren, “Oupwe feila lemenen ekewe ainangen Israel meinisin seni Tan tori Persepa o angei iteiten ekewe aramas, pun üa mochen silei iteiter.”
3Nge Joap a üreni ewe king, “Amwo ewe Samol mi Lapalap om we Kot epwe awattela iteiten ekewe aramas fän ipükü seni me mwan, lupwen en ai samol me ai king ka chüen manau o küna. Pwota en ai samol ka pwapwaiti ei föför?”
4Nge ewe king a pöchökül ngeni Joap me ekewe meilapen mwichen sounfiu, pwe ra aleasochisi alon. Iei mine ra feila seni fän mesen ewe king, pwe repwe angei iteiten ekewe aramasen Israel.
5Ra feila pekilan ewe chanpupu Jortan o popuetä seni Aroer, pwal seni ewe telinimw mi nom lukalapen ewe lemol, ra feil ngeni Kat tori Jaser.
6Mürin ra tori Kiliat pwal tori Kates lon fanüen chon Hit, ra pwal tori Tan. Nge seni Tan ra pwelila tori Siton,
7ra pwal tori ewe telinimw Tirus mi pöchökül tittin, pwal tori ekewe telinimwen chon Hiw me chon Kanaan meinisin. Mürin, ra feila Persepa lon ewe fanü Nekep lon Juta.
8Mürin tiu maram me rüe rän ra wes le fetalfeil lemenen unusen ewe fanü o liwiniti Jerusalem.
9Iwe, Joap a ngeni ewe king unusen iteiten ekewe aramas. Lon Israel mi wor walupükü ngeröü mwän mi mwoot o sile maun fän ketilas, nge lon Juta mi wor limepükü ngeröü.
10Nge mürin än Tafit angei iteiten ekewe aramas, a mengiringir lon lelukan. Iwe, a üreni ewe Samol mi Lapalap, “Üa fokun tipis ren mine üa föri. Iei mine üa tüngor ngonuk, kopwe amusala ai tipis ngang noum chon angang. Pun ngang üa föri mine a fokun mwäl.”
11Nge mwen än Tafit pwätä lesosor, ewe Samol mi Lapalap a fen üreni Kat nöün Tafit we soufos,
12“Kopwe feila o üreni Tafit pwe iei aloi ngang ewe Samol mi Lapalap. Ülüngat mettoch üa uwato reöm. Kopwe filätä eu me leir pwe üpwe föri ngonuk.”
13Iei mine Kat a feito ren Tafit o üreni, “Ifa usun, ka mochen epwe fis lengita won fanüom lon ükükün ülüngat ier? Ika kopwe sü me mwen chon oputom lon ükükün ülüngat maram, lupwen repwe tapweruk? Ika epwe wor mätter won fanüom lon ükükün ülüngat rän? Iei kopwe ekieki o filätä pälüan, pwe üpwe liwinla o asile ngeni ewe mi tinieito.”
14Mürin, Tafit a üreni Kat, “Ngang üa nom lon riaföü lapalap. Amwo ewe Samol mi Lapalap epwe apwüngükem, pun an ümöümöch a lapalap, nge aisap mochen pwe aramas repwe apwüngükem.
15Iei mine ewe Samol mi Lapalap a tinato mätter won chon Israel seni lesosor tori ewe fansoun mi pwonola. Iwe, a wor ükükün fik ngeröü mwän mi mäla seni Tan tori Persepa.
16Nge lupwen ewe chon läng a aitiela pöün ngeni Jerusalem pwe epwe afeiengaua aramasan, ewe Samol mi Lapalap a lamalamala pokiten ewe feiengau o üreni ewe chon läng mi eäni ewe angangen afeiengau lein ekewe aramas, “Kopwe ükütiu. Kopwe aitietiu poum.” Nge nöün ewe Samol mi Lapalap chon läng a nom ren ewe lenien wichiwich umwun wiich än Arauna ewe re Jepus.
17Iwe, lupwen Tafit a küna ewe chon läng mi niela ekewe aramas, a kapas ngeni ewe Samol mi Lapalap, “Nengeni, ngang üa tipis o föri mine a fokun ngau. Nge met ekei aramas ra föri? Üa tüngor ngonuk pwe kopwe apwüngüei me chon leimwen semei.”
18Lon ewe chök ränin Kat a feito ren Tafit o üreni, “Kopwe feitä ren ewe lenien wichiwich umwun wiich än Arauna ewe re Jepus o senätä eu rongen asor ngeni ewe Samol mi Lapalap.”
19Iei mine Tafit a aleasochisi ekewe kapas Kat a üreni fän alon ewe Samol mi Lapalap o feitä.
20Nge lupwen Arauna a chimwetä, a küna ewe king me nöün kewe nöüwis ra feitä ren. Iwe, Arauna a towu seni imwan, a chapetiu mwen ewe king
21o aisini, “Pwota en ai samol me ai king ka feito rei ngang noum chon angang?” Nge Tafit a üreni, “Üa feito pwe üpwe möni om we lenien wichiwich umwun wiich, pwe üpwe senätä eu rongen asor ngeni ewe Samol mi Lapalap, pwe ewe mätter epwe ükütiu seni ekewe aramas.”
22Mürin, Arauna a üreni Tafit, “Ai samol me ai king, kopwe angei o eäni asor mine a öch me reöm. Ikkei ir ekei ätemwänin kow fän iten asoren kek, pwal ewe pisekin wichiwich umwun wiich me waasen ekewe ätemwänin kow fän iten mwüch.
23Ekei mettoch meinisin ai king üpwe ngonuk.” Iwe, Arauna a pwal üreni ewe king, “Ewe Samol mi Lapalap epwe etiwa om we asor.”
24Nge ewe king a üreni Arauna, “Apwi, üpwe möni senuk won äükükün liwinin. Üsap mochen eäni asoren kek ngeni ewe Samol mi Lapalap ai we Kot mine üsap möni.” Iei mine Tafit a möni ewe lenien wichiwich umwun wiich me ekewe ätemwänin kow won ükükün lime föün moni silifer.
25Mürin, Tafit a senätä eu rongen asor ngeni ewe Samol mi Lapalap o eäni asoren kek me asoren kinamwe won. Iei mine ewe Samol mi Lapalap a aüselinga ekewe tüngor fän iten ewe fanü, nge ewe mätter a ükütiu seni lon Israel.
