1Len ma onoh kahis le ta len ndrabun iri aloh Pasoba anya kasahan, Jises eme edek ili asahan Betani, kon ta Lasarus, iy ale mene imek arile Jises mete-ei iy amak ja.
2Oro ame amekes nadu nyamon sese na Jises. Mata akohok nan nyamon, Lasarus ale manyah udu hawe iri lau nane aimon nyamon hawe Jises.
3Ano Mariya andrei bwisi ndrau ari, suluw irek udu bolon. Suluw doh iri amekes na kandro kei aloh nat. Manahun ma sowan badeh, tinan labai. Iy eme asolou ili kati Jises, ano iy owei abosar na lami batun. Ma manahu bubure suluw nane doh tuhi bolo asiu mara-ei.
4Lau tan ari nyaran Judas Iskariyot, iy hamon kameh iy leheyani Jises ili mine iri lau ndra-in, iy asehek i buku doh,
5“Adeh! Tasah handru iy badih kede-eh amekes i buku doh? Ndrelekei doh nane katehei kili mada ba-en, ya winiyan asahan i luk denariyus ma tonek (300), eme ya kanyohan ki tiri lau lakou bwe.”
6Iy asehek sahou doh, arile iy babudon ta iri lau nane tiri lakou bwe. Tasah iy ndramak ari ta bahana, iy ta atondrok kohoya luk toro ale; iy akohok ta aseben iy amwenen ta saba lakou iy atehei udu bolo kohei doh.
7Jises asehek anya, “Iy kudu gwek, mwasin ta iy katawiy kudu winiya le len iri adeu jo anya kili bolo lek.
8Iri lau tiri lakou bwe kameh len mari ado hawe ado, arile jo kameh winiyan bado hawe ado len mari bwe.”
9Iri Juwis marakon ndratanan Jises ndrame ndrado Betani, iri ame ta atou iy le bwe, iri ame ta anyolom Lasarus ale, iy mene Jises mete-ei iy udu bolo lek tan amak eme awas ja.
10Eme iri lau tinan tiri pris amekes sa-oh ta adi Lasarus ale.
11Ta amak tan le badeh, bwidi iri Juwis ala le ta Jises ma iri atehei budon tiri mari ili le tan.
12Kon aleu asahan len ari ja, iri lau solo-an labai ndrame ta Pasoba ma nyamon tinan, iri ndranuhun Jises badeh, ndradek ndrame Jerusalem.
13Iri ame andrei la-u badou udu mine iri ma aloh ta sekesek i ta Jises i buku doh, “Hosana! Kasekesek iy! Kasore nyaran! Iy badeh, eme ta nyara Laban!” “Kasore kabin badu Isra-el!”
14Jises eme ili ndruni donki ari ma iy sandroh ili manyah udu bwele-en, i buku le iri sahou ta Kindrei ndrasehek udu bolo buk ndrabun:
15“Aha lau badu Sayon, aha sanoh. ‘Aha kanyolom, kabin taha eme ai. Iy eme, iy manyah udu bwele-e donki ari ndramak bamanyah ba-en bwele-en bwena bwe.’”
16Ma bwena handru oro lau tan bala tanan ta saba lakou handru, nane iy amekes, bwe. Udu hamon ja ta Jises iu ili hamon ili kandrah, eme oro barabudon iri sahou marakon nane udu bolo buk ndrabun asehek ili badan, ma iri lakou rayah doh oro ndramekes ndrala tan ale.
17Iri lau marakon ado hawe Jises ndranyolom iy mene aloh Lasarus udu bolo lek tan eme len, ma mete-ei iy nane imek, amak ja. Iri ame, tiyani sahou ili bolo kon mara-ei.
18Eme ma lau solo-an labai ala ta anyolom iy, tasah iri ndranuhun iy mene amekes kalem.
19Eme iri Parasi asehek sahou ndrokowa iri, “Taha kanyolom, budon tataha nane basahan bamwenen bwai. Tasah, lau marakon badu kon munyak ndra-en hamon tan!”
20Oro Grik rayah ado bolo iri nane ala ta salom ta nyamon tinan doh ale.
21Oro ala hawe Pilip, iy badu kon Betsaida udu loboho Galili, oro ame tiye iy, “Ndramak tinan, aso anya katou Jises.”
22Pilip eme tiye Enduru, oro adek ala. Eme uru ala tiye Jises.
23Jises eme tiye toro, “Len dah ndrasahan ta Nadu Ndramak Awas kameh akohok lomadan.
24Jo tiye tado handru, i buku badu kalom ari bataku bala bwele-e munyak bwe, ma iy bamak bwe, badun ari le udu. Arile, i buku iy imek, idah kameh iy asahan ma iy ato-ou salin solo-an labai.
25Iy are lau iy atehei budon ma kohan amwenen in ta munyak dah tinan labai, kohan kameh ano laleyah. Arile, buku are lau iy batehei budon ma kohan amwenen ba-en ta munyak dah bwe, kohan kameh winiyan bano bwe, kameh udu le buku doh.
26Are lau iy anya kamekes gok tek, iy badeh, ki-in le hamon tek, eme ma kon heh jo udu aliy, iy kameh udu hawek ale. Buku are lau iy amekes lahou tek, tama kameh atehei lomadan tinan ili tan.”
27Jises asehek sahou ja i buku doh, “Len dah jo tikisiy handru labai, ya jo kasehek saba lakou? Jo katiye anya, tama, ou winiyan sebenei jo na bolo len dah deh? Ndri-iy ai, tasah jo eme dah ta ili bolo iri sisi-in.
28Tama, ou bwidi nyara lomadam kili tinan.” Jises asehek sahou ano le badeh, boho ndramak ari asehek sahou udu bolo kandrah eme andri i buku doh, “Jo ndrabwidi nyara lomadak ndra tinan ndrano. Idah kameh jo kamekes ja.”
29Iri lau solo-an nane ales ale ado mirihik, anuhun boho ndramak doh. Eme iri lau rayah anya, “Idoh kuruh.” Iri lau rayah ja anya, “Idoh angelo asehek sahou i tan.”
30Arile Jises eme tiye i tiri, “Sahou nane ta aseben jo bwe, sahou ta aseben aha amwenen.
31Na len idah kameh Kindrei atehei lau marakon badu kon munyak a ta sahou; na idah kameh iy tikahei kabin badu kon munyak dah iu.
32Na idah jo udu kon munyak, arile hamon kameh iri tutuni jo ere loken, ma jo kameh aruwi iri lau marakon ame le hawek.” (
33Iy asehek sahou doh ta leheya san, ta iy kameh imek i buku sah handru.)
34Iri lau marakon tiye, “Ahi ndranuhun udu ndra bada kandriyen malen ta Moses mene edeu, ‘Mesaya kameh winiyan bamak bwe, iy kameh udu le buku doh.’ I buku sah handru ou asehek anya, ‘Nadu Ndramak Awas kameh iri tutuni iy ili loken bada kei tondreh’? Nadu Ndramak Awas–Iy are lau handru?”
35Ano Jises tiye i toro, “Aha kameh lomada sun udu hawe aha luluwen sese. Aha kadek ma sun, tasah iy udu ndra hawe aha kahis. Kora-on lulik katubuluhi aha. Are lau iy edek bolo lulik, iy bala tanan ta iy ilih heh handru.
36Aha katehei budon taha marakon kili le ta lomada sun, buku iy udu ndra hawe aha, ma aha kameh asahan nadu lomada sun.” Jises asehek iri sahou doh ano le, iy ruwani iri ado, iy iu aton ta mada iri lau.
37Iri lau marakon nane doh anyolom Jises amekes iri kalem solo-an labai, arile iri ari batehei se budon tiri bala tan bwai.
38Eme ma sahou ta propet Aisaya mene asehek, eme asahan handru: “Laban, are lau handru atehei budon tan in ta sahou tam aso ndrasehek? Ya are lau handru ndranyolom ou amekes iri lahou tinan?”
39Iri winiyan batehei budon tiri bala ta Jises bwe, tasah propet Aisaya ndrasehek:
40“Kindrei ndrabwidi mada iri ndralik, ma iy ndrawahei budon tiri, eme ma iri winiyan banyolom, ma winiyan bala tanan ta kati iri lakou mwasin Kindrei amekes bwe. Kindrei anya, ‘Iri kameh winiyan bame hawek ja bwai, ta bwidi iri kamwenen ja.’”
41Propet Aisaya asehek ta aliy, tasah iy ndranyolom lomada Jises eme ma iy asehek iy.
42Handru, iri tinan tiri Juwis solo-an atehei budon tiri ili tan. Arile iri anoh iri Parasi, ma iri basehek budon tiri bame len bwe. Iri abudon, kora-on iri katikahei iri kame len ta asiu ta atukum tiri Juwis.
43Iri babudon ta iri lakou nane Kindrei aso-ok bwe, iri badeh, aso-ok iri lau ta atudun nyara iri le.
44Jises asehek sahou bohon i tinan, “Buku ari ndramak iy atehei budon tan in tek, badeh, ba-en tek le bwe, badeh, in ta are lau nane iy suni jo eme dah.
45Buku are lau iy anyolom jo, badeh, iy anyolom are lau iy nane suni jo eme dah ale.
46Jo ndrame andri bolo kon munyak i buku lomada sun, ta iy are lau atehei budon tan eme tek, iy kameh winiyan ba-en bolo lulik bwe.
47“I buku iy are lau iy anuhun sahou tek, arile iy ba-en hamon ta aliy bwe, jo winiyan badeu maha-an bala bwele-en bwe. Jo bame ta edeu maha-an ili ta lau marakon badu kon munyak bwe; jo eme dah ta aseben iri.
48Maha-an udu aliy ta are lau iy atehei konan eme tek, ma iy baso-ok sahou tek bwe, sahou le nane jo ndrasehek kameh edeu maha-an i tan na len hamon.
49Idoh handru, tasah jo basehek iri sahou dah na budon tek amwenen bwe. Iri budon dah ta tama, iy nane suni jo eme. Iy tiye jo ta iri lakou ta asehek ma iri lakou ta leheya.
50Jo tanan iri sahou batanau tan badeh, kohan handru udu aliy winiyan bano bwe, kameh ta udu le buku doh. Iri lakou jo asehek badeh, i buku le tama asehek eme tek.”
