Job 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Gei Job ga helekai,

²“Au e leelee logo hai baahi gi God, Au gu deemee di hagakono dogu dangidangi mmae.

³Au bolo gi iloo di gowaa dela e noho iei Mee, gi iloo di ala dela e hana gi baahi o Mee.

⁴Au ga hagi aga dagu gabunga i ono mua, ga hagamodongoohia agu helekai hai baahi.

⁵Au e hiihai gi iloo ana helekai mo dana hai dela e helekai gi dagu heeu.

⁶E hai behee? God ga hai hegau gi ono mahi hagatau e hai baahi mai gi di au? Deeai, Mee e hagalongo gi agu helekai.

⁷Koau dela e donu. Au e mee di hagadonudonu gimaua mo God, gei Mee ga hagamodongoohia aga dogu madammaa dolomeenei gaa hana hua beelaa.

⁸“Au gu halahala God i di baahi gi dua, gei Mee hagalee i golo. Au digi gidee au a Mee i dogu halahala a Mee i di baahi gi dai.

⁹God le e hai ana moomee i bahi i ngeia mo i bahi i ngaaga, gei au e de gidee au a Mee.

¹⁰Malaa deenei, God e iloo ogu ala heehee huogodoo. Maa Mee ga hagadina au, gei Mee ga gidee laa bolo au e madammaa.

¹¹Au e haele i hongo ono ala ne hagi mai gi di au, gei hagalee e geleu gi tei baahi.

¹²Au e haga gila aga ana haganoho i nia madagoaa huogodoo. Au e daudali hua go dono hiihai, gei hagalee go dogu hiihai.

¹³“Gei Mee hagalee e huli dono manawa. Deai tangada e mee di hai baahi anga, be e dugu di mee a Mee dela ne belee hai ai.

¹⁴Gei Mee e haga gila aga dana mee ne haganoho belee hai mai gi di au. Di mee ne haganoho deenei la di mee mai i nia mee e logowaahee ala ne haganoho aga go Mee belee hai.

¹⁵Au gu bolebole huoloo i dogu madagu i mua ono hadumada.

¹⁶God Mogobuna guu lawa di haga bagege au. Ma go God gei hagalee go di bouli dela e madagu iei au, ma e aha maa go di bouli dela gu haga dee gida ogu golomada.