Job 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Chayno niptin Job niran:

²«Cananpis jagayashallami yapay rimashaj. Tayta Dios castigamaptinmi llaquicuycä.

³¡Musyaycöman Tayta Diosta maycho tariytapis, chauraga tiyashan cajman imanöpapis chayaycöman!

⁴Chayarga paytanami willapäman imapita cayno caycashätapis. Yarpaynëchöpis aypallami caycan imata ninäpäpis.

⁵¡Pay imata nimashanta cutichinäpäpis tantiyämanmi!

⁶Payga ¿munayniyoj caynintachuraj jorgapämanga? Manami; chaypa ruquenga ima nishätapis wiyamanmanmi.

⁷Pipis paywan parlanmanmi juchaynaj runaga. Chaymi nogatapis ‹juchaynaj canqui› nimanman. ¡Imaycamapis librina canäpaj cachaycamanman!

⁸«Ichanga washapa Diosta ashiptëpis manami canchu. Cay-läpa ashirpis manami tarëchu.

⁹Norte caj-läpa imata ruraptin ashirpis manami ricächu. Sur caj-läpa ticraycurpis manami ricächu.

¹⁰Paymi ichanga musyaycan imano goyashätapis. Juchäta ashiptinpis gori limyuyashanömi quëdashaj.

¹¹Nogaga paypa yupillanpami purishcä. Pay ricachimashan nänillapami aywashcäpis.

¹²Paypa laynincunallatami, rimashancunallatami cumlishcä. Manami quiquë munashallätachu rurashcä.

¹³«Tayta Diosga imatapis rurayta yarparga jinan örami rurarin. Rurananpaj yarpaycashantaga manami pipis rucachinchu.

¹⁴Payga imatapis rurayta munashantami ruramanga. Imata rurayta yarpashantapis llapantami camacächenga.

¹⁵Chaymi fiyupa manchacö. Yarparcushpalläpis fiyupami mancharë.

¹⁶Ima-aycapäpis munayniyoj Tayta Diosmi fiyupa manchariycächiman.

¹⁷Chaypis chacayga manami upällachimangachu; yanauyaycaj chacaypis manami pitucarcamangachu.