Iob 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ma Iob i ga tata ma i ga biti:

²Amutal a valongore bulu kaugu tinata, Ma na da ra tinata na varmaram pire mumutal.

³Amutal a tul tar iau pi ina tata, Ma ba iau tar tata par, io, una varkulumai.

⁴Dave, iau tata na urur ure ra tarai laka? Ma ta ra ava ina ki vovovon?

⁵Amutal a gire iau, ma amutal a kaian, Ma amutal a karat liman tana.

⁶Ba iau nuknuk tana iau kaian mat, Ma i dadadar ra pakagu.

⁷Ta ra ava vang a umana tena varpiam dia laun, Ta ra ava dia laun vue mangoro na kilala ma dia dekdek ma dia rangrang?

⁸A umana natu i diat diat a tavua bulu pire diat, Ma kadia umana bul mur ta ra luaina mata i diat.

⁹Dia ki bulu ta ra kubakuba i diat, Ma ra virit kai God pa i tadav diat.

¹⁰Kadia bulumakau, a tomotoina, i varvangala bulu vatikai; Ma kadia tana na bulumakau i kakakava bulu.

¹¹Dia tulue kadia umana bul da ra kikil na sip, Ma ra umana natu i diat dia malagene ma ra gugu.

¹²A pagol ma ra kudu dir maravut diat ta ra kakailai, Ma dia gugu ta ra nilai ra tataru.

¹³Dia ki na uviana ta kadia kilala na nilaun, Ma dia vana ba ta ra ruarua na tulungen ma ra malmal.

¹⁴Dia biti tai God: Una vana kan avet, Tago pa ave mainge ba avet a matoto ure kaum lavur nga.

¹⁵To ia ra Dekdek Muka upi avet a toratorom pirana? Ava bar avet a vatur vake, ona avet a araring tadav ia?

¹⁶Dave, pa dia kure vang ra nga ba diat a uviana tana? A ninunuk kai ra umana tena varpiam i ki vailik kan iau.

¹⁷Aivia ra pakana di pun ra lamp kai ra umana tena varpiam? Ba ra varmonong i tadav diat? Ba God i vakadik diat ta kana kankan?

¹⁸Ba dia da ra mapina kunai a vuvu i purpuruke, Ma da ra pal i ra vit a ngala na vuvu i kapkap vue?

¹⁹Amutal biti: God i vung vake kana balbali ure ra umana natuna. Boina ba na bali ia iat, upi na kairane.

²⁰Boina ba ra kiau na matana na gire kana vinirua, Boina ba na mome ra kankan kai ra Dekdek Muka.

²¹Kana mangana ninunuk ava ure diat ta ra kubana ba i tar mat, Ba di kutu pit kana umana gaigai na nilaun?

²²Dave, i tale ta tikai pi na tovo vamatotone God, Tago i ki na varkurai ure diat dia ki arama?

²³Ta tikai i mat ba i lagar boko, Ba i ki na malmal ma i ki bulu,

²⁴Kana umana pal a tava dia buka leke ma ra polo na u, Ma ia iat pa i bilua.

²⁵Ta ra tikai i mat ba i kankadik ra tulungeana, Ma pa i ga tia kairane ta bo na kini.

²⁶Dir par di punang dir ta ra pia, Ma ra umana kalolo dia kakakao taun dir par.

²⁷Ea, iau nunure ra nuknuk i mumutal, Ma ra umana magit amutal nuknuk kakaina ure iau tana.

²⁸Amutal biti laka: Akave ra kuba i ra luluai? Akave ra kubakuba i ra umana tena varpiam?

²⁹Dave, pa amutal ga tir ra umana tena vinavana laka, Ma pa amutal ga kapupi kadia varvai,

³⁰Ba ra tena varpiam i langalanga ta ra bung na varmonong, Ma i pila ta ra bung na kankan?

³¹To ia i varvai kapa pirana ure kana mangamangana? To ia i kure vakaina ure ra umana kaina magit i ga pait ia?

³²Ba di puak ia ma ra variru tadav ra tung na minat, Di mono bat ra babang na minat.

³³A pia ta ra male i kalakalami pirana; A tarai par dia murmur ia, Ma ra kor dia lualua tana.

³⁴Ta ra ava amutal vamaram vakuku iau? Kamumutal lavur tinata na balbali a vaongo ko.