Hiop 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mürin, Hiop a üreni chiechian kewe,

²“Oupwe aüselingafichi ai kei kapas. Ren ei oupwe achipaei.

³Oupwe mwüt ngeniei pwe üpwe kapas. Nge wesin ai kapas oua tongeni sopwela le turunufaseei.

⁴Ifa usun, üa siö ngeni aramas? Pwota üpwe chök engila?

⁵Oupwe nenengeniei o mairü, oupwe pwölüela awemi ren pöümi.

⁶Lupwen üa ekieki usun mine a fis ngeniei, üa rükö, chechech a toriei.

⁷Pwota ekewe aramasangau ra manau o tori chinlap, nge ar nemenem a wattela?

⁸Nöür kewe me nöün nöür kewe ra nonomöch me fän meser.

⁹A wor kinamwe lon imwer kewe, nge esap wor niuokus lor. Kot esap awarato wor feiengau.

¹⁰Nöür ätemwänin kow ra tufichin apwopwofochofoch, nöür kewe kow ra nöünöütiu, nge esap mwetela nöür.

¹¹Ra tinawu nöür semirit pwe repwe urumwotfeil usun chök epwi pwin sip.

¹²Ra köl fiti pisekin kaktai me ükülele, ra mweireir ren tikin aangün.

¹³Ra pisekisek lon ränin manauer meinisin, ra mäla o feitiu lon ewe lenien sotup fän kinamwe.

¹⁴Ra üreni Kot, ‘Kopwe feila senikem. Äm aisap mochen silei letipom fän iten manauem.

¹⁵Iö Ewe mi Unusen Manaman pwe sipwe angang ngeni? Met feiöchüch are sia iotek ngeni?’

¹⁶Nge ar feiöch esap nom lon püsin pöür. Iei mine ngang üpwe atoauala seniei än ekewe aramasangau öüröür.

¹⁷Ifa usun, fän fitu a fis pwe än ekewe aramasangau lamp a kunula? Ifa usun, fän fitu a toriir feiengau? Ifa usun, Kot a apwüngüür lon an song?

¹⁸Ifa usun, ra wewe ngeni fetilipwas mi ässila ren asepwäl, ika ngeni ekewe pön wiich mi ässila ren mölümöl?

¹⁹Ämi oua apasa, ‘Kot a anomu liwinin tipisin eman aramas won nöün kana.’ Apwi, epwe ngeni püsin liwinin an föför, pwe epwe silei pwe iei liwinin an tipis.

²⁰Eman chon tipsis epwe püsin küna an feiengau, epwe püsin ün seni ewe kapen lingeringer än Ewe mi Unusen Manaman.

²¹Ifa usun, epwe ekieki usun chon leimwan mi manau me mürin, lupwen manauan a wesila?

²²Ifa usun, mi wor eman epwe tongeni aiti ngeni Kot silelap, ngeni ewe Kot mi apwüngü chokewe mi nom pekitä lon läng?

²³Eman a mäla lon an fokun pöchökül, a fokun kinamwe o nonomöch.

²⁴Inisin a fokun kitinup, nge minen lon chün esap pwasapwas.

²⁵Nge pwal eman a mäla fän weiresin letipan, esap fokun küna feiöch.

²⁶Ir me ruoman repwe konopök fän pwül, nge moso repwe pwölürela.

²⁷Üa fokun silei ämi ekiekingau, pwe oua ekiekin föri ngeniei mine esepwüng.

²⁸Pun oua ais, ‘Ia a nom ie imwen ewe samol? Ia a nom ie imwen ekewe aramasangau?’

²⁹Ifa usun, ousap aisini mwo ekewe chon sai? Ifa usun, ousap aüseling ngeni mine ra apworausa,

³⁰pwe ewe aramasangau esap feiengau lon ewe ränin feiengau, pwe a ngasala lon ewe ränin än Kot song?

³¹Iö a tongeni atipisi ewe aramasangau nge newenewen ngeni? Iö a tongeni liwini ngeni an föför?

³²Lupwen ra uwei ngeni ewe lenien peias, chon mas ra mamasa.

³³Chomong aramas ra tapwela mürin, nge chokewe mi akom mwan resap lea. Epwe peias lon eu lemol a sani lupwen a manau.

³⁴Pwota oua mochen achipaei ren kapas lomotongau? Esap chüen wor och lusun ämi kapas pälüen, nge kapas chofana chök.”