1मिनु अय्युबमी
2“इन नोफा दाइश्शा, आं लोव़ नेनीन। मेको आं कली इन गेशो लेम्तीके बाक्ब।
3गो लोव़ पङानु, आं कली फाल्शा नेनीन। गो लोव़ थुमु नोले आं कली शुक्शी पने चाप्नीनी।
4मार, आं थुं मनुथु पशो लोव़ बेक्शा लाइब मुर आन कली ममाइ। मारदे गो फाल्शा बाक्चा माल्नुङा?
5आं कली कोव़यीनी। मिनु सिक्सी पने। मारदे हना गो ग्रांग्रा दिचा ङा तांइसीनुङ। इन शोव़ सुम्सीन। अय्युब ४०:४
6गो आं कली ‘मार दुम्बा’ दे मिम्नुङ। मिनु ग्रीचोक पा हिंनुङ। आं रां नेल्ल थुर थुर पा ख्रिंख्रि पाइब।
7परमप्रभु यावे आ अरेशो मटीब मुर मारदे ब्रोंइना ब्रोंइन बाक्नीमी? मारदे मेकोपुकी खूशो दुम्मानु यो बोल्यो नु सक्ति पाइश्शो दुम्नीमी? येरमीया १२:१
8मेको आन तमी तौ मेकोपुकी नु बाक्नीमी। मिनु मेकोपुकीम आन चच युइ नेल्ल ताइनीम।
9मेको आन खिंम महिंथु बाक्नीम। परमप्रभुम मेको आन कली सजाइ मगेब।
10मेको आन बी ब्यफ सोशा बोशा दुम्नीम। बी नेल्ल गिक्नीमी, गेनायो मशाम्नीम।
11मेको आन आल आन कली क्यारश भेडा आन पाठा खोदेंशो पा ग्यारथ सोइक्नीम। मिनु मेको आन आइक्च आल सिल पना पन प्रेक्शो बाक्नीम।
12मेकोपुकी खैजडी नु बीना ताप्शा कुम्सो पाइनीम। मिनु बांसुरी ताप्शा ग्येरसीनीम।
13मेकोपुकीम आन नाक्त ग्येरशा सोइक्नीम। मिनु मेको आन थुं नाइश्शा बेक्शो मुर आन बाक्तीक लाइनीम।
14मेकोपुकीम परमप्रभु कली आंइ रे पा ङोन लन। गो इन लांम गाक्चा मदाक्नीकी, देंनीम। अय्युब २२:१७
15‘नेल्ल क्येङा ठेयब सक्ति पाइश्शो सु बाक्म? गो मारदे मेको आ गेय पचा माल्नीकी? गो मेको कली पुंइशा मार ताइनीकी ङा?’ देंनीम। प्रस्थान ५:२; २ राजा १८:३५; भजन संग्रह १२:५; दानीएल ३:१५
16परमप्रभु यावे आ अरेशो मटीब आन सोशा बोशा लशो, मेको आंम आन पतीके ममाइ। मिनु आन मिम्शो तुइश्शा, गो ग्रांग्रा दीनुङ। अय्युब २२:१८
17परमप्रभु यावे आ अरेशो मटीब आन बत्ती गिश खेयप काम्सीबा? मेको आन पियाम गिश खेयप हिंचा ङा श्येत जुक्बा? शुश खेयप मजुक्ब। परमप्रभु आ गाइश्शोमी मेको आन कली गिश खेयप श्येत गेबा? शुश खेयप मगेब।
18गिश खेयप फशेम बेरशो पराल खोदेंशो दुम्नीमी? मेकोपुकी गिश खेयप फश गिवारम बेरपाइश्शो भूस खोदेंशो दुम्नीमी? शुश खेयप मदुम्नीम। भजन संग्रह १:४
19गेपुकीम ‘परमप्रभुमी मेको आन मरिम्शो पतीके आन तमी तौ आन कली खेक्शा वोइक्ब’ देंनीनी। मोदेंशो मदुम्ल। तन्न मेकोमी मेको नेल्ल आन कली सजाइ गेवल। मिनु मेकोपुकीम तुइक्तमेक्ल। अय्युब २०:१०; प्रस्थान २०:५
20मेकोपुकीम आंमा आन कली खतम दुम्तीक तामेक्ल। मेकोपुकीम नेल्ल क्येङा ठेयब सक्ति पाइश्शो आ गाइश्शो तुइक्तमेक्ल।
21मुर आन ब्रोंइतीक नुम नोले मेको आन खिं कोव़ने चाप्नीमी ङा? मेको आन ब्रोंइतीक नुप्ब।
22मुरुम परमप्रभु कली जोक्तीक तुइक्तीक लोव़ शेंने चाप्नीमी ङा? मेकोमी इर बाक्ब आन कली यो निसाफ पाइब। उपदेसक ५:७
23का निक्शी मुर आन माल्शो नेल्ल गाप्शा बेक्नीम। मेको काइ महिंथु रिम्शा बाक्नीम।
24मेको आन रां दोम्शो बाक्नीमी। मेको आन रुशेम मासी बाक्ना बाक्न बेक्नीम।
25का निक्शी चहिं श्येतम ब्रीशा, आन थुं कशो दुम्शा बेक्नीम। मेकोपुकीम गेनायो ग्येरचा मतामे।
26मिनु मेको नेल्ल काथा थिम्चा पुंइसीनीम। मिनु लुस्पुमी मेको आन कली सुम्नीम। अय्युब ३:१८-१९
27गेपुकी मार मिम्ना मिम्न बाक्नी, गो मेको रिम्शो पा तुइक्नुङ। मेको आं पर्बम दूली मिम्तीक लोव़ बाक्ब, दे गो तुइक्नुङ।
28गेपुकीम ‘मेको सासन पाइब आ खिं ते बाक्म? मेको परमप्रभु यावे आ अरेशो मटीब मुर आन ताम्बु ते बाक्नीमी?’ दे हिल्लो पाइनीनी।
29मार, गेपुकीम लां गाक्ब आन कली गेनायो हिल्लो मपनी? गे मेको आन देंशो मतुइक्नीनी?
30शुश हिंचा ङा श्येत दुम्मेनु, परमप्रभु यावे आ अरेशो मटीबपुकी ब्रोंइचा ताइनीम। मिनु परमप्रभु आ गाइक्ची नाक्त मेकोपुकी प्रोंइचा पुंइसीनीम।
31सुइम मेको आन कली दोस मगेनीम। सुइमी मेको आन मरिम्शो पशो आ पा ङा क्येक्क मलेत्नीम।
32मिनु मेको बेक्शा, कुरशा तुरसुम लाइक्चा पुंइसीनीम। मिनु मेको आन तुरसुम खाल पाइब वोइक्नीम।
33तुरस ङा खप यो मेको आन कली रिम्शो बाक्ब। मिनु शुश मुर मेको आन नोले खोइक्नीम। मिनु हिक्ने मचाप्चा ङा पा शुश मुर मेको आन क्येङा ङोंइती लाम्तेक्म।
34गेपुकी इन देंशो फश लोव़म दोपा आं कली लेम्नीनी ङा?” दे अय्युबमी सोफार कली लोव़ लेत्ता बाक्त।
