Yoobu 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yoobu u nɛɛ,

²i nɛn ɡɑri nɔɔwɔ. Ì n wurɑ i mɑn swɑɑ dɑki, i mɑn nukuru yɛmiɑsiɑwɑ mi.

³I de n ɡɑri ɡere. Nɑ̀ n ɡɑri ɡeruɑ nɑ kpɑ, ko i kpĩ i mɑn yɛ̃ɛ.

⁴Tɔnuwɑ nɑ weeweenu koosimɔ? Nɡe mbɑn sɔ̃nɑ kon tɛmɑnɑ.

⁵I mɑn mɛɛrio, kpɑ biti yu bɛɛ mwɑ kpɑ i bɛɛn nɔsu kɔre.

⁶Nɑ̀ n nɛn wɑ̃ɑru bwisikɑ, nɑ rɑ nɑndewɑ, nɛn wɑsi yi n diirimɔ.

⁷Mbɑn sɔ̃nɑ Gusunɔ u rɑ de tɔn kɔ̃so u n wɑ̃ɑ, kpɑ u n dɑm mɔ sere kɑ win tɔkɔrɔ.

⁸U rɑ bibu mɑ kpɑ be, bu mɑɑ se bu mɑ. Kpɑ u n be kpuro mɛɛrɑ bɑ n kuurɑmɔ win nɔni sɔɔ.

⁹Bɔri yɛndɑ wɑ̃ɑ ben yɛnusɔ, bɑ ǹ bɛrum mɔ. Gusunɔ kun mɑɑ bu sɛɛyɑsiɑmɔ pɑi.

¹⁰Sɑɑ kpuro, ben kɛtɛ kinɛru tɑ̀ n ben nɛɛ yɔɔwɑ yi rɑ mɑwɑ. Yi ku rɑ nukuru yɑri.

¹¹Bɑ rɑ ben bibu deri bɑ n duki mɔ̀ nɡe yɑ̃ɑnu, kpɑ bɑ n dweebu mɔ̀,

¹²bɑ n bɑrɑ kpɑ̃nu kɑ mɔrɔkunu soomɔ, bɑ n womusu mɔ̀, kpɑ bɑ n nuku dobu mɔ̀, bɑ n ɡuunu soomɔ.

¹³Bɑ rɑ ben wɑ̃ɑru diwɑ nuku dobu sɔɔ, kpɑ bu ɡbi subɑru sɔɔ.

¹⁴Wee bɑ rɑ rɑɑ yellu Gusunɔ sɔ̃ bu nɛɛ, ɑ ɡɛɛro min di, sɑ ǹ kĩ su wunɛn swɛɛ ɡiɑ.

¹⁵Wɑrɑ rɑ n Gusunɔ Dɑm kpuroɡii su kɑ sere nùn yoru diiyɑ. Arufɑɑni yerɑ̀ sɑ kon mɔ sɑ̀ n nùn kɑnɑmɔ.

¹⁶Tɔn ben bweseru, bɑ ǹ doo nɔɔru mɔ ro? Adɑmɑ nɛ, nɑ ǹ tɔn kɔ̃sobun bwisi kɛ̃ru kĩ.

¹⁷Kɑ mɛ, ɑ rɑ wɑ mi tɔn kɔ̃sobun yɑm bururɑm mu ɡbimɔ? A rɑ wɑ bɑ nɔni sɔ̃ɔre? Gusunɔ u rɑ bu sɛɛyɑsie win mɔrun sɔ̃?

¹⁸A rɑ wɑ bɑ sɑ̃ɑ nɡe yɑkɑsu, ǹ kun mɛ nɡe doo sɑkosu si woo ɡɑ kɑ doonɑ?

¹⁹Bɛɛ i ɡerumɔ i mɔ̀, tɔn ben bibun bweserɑ Gusunɔ u rɑ sɛɛyɑsie. Adɑmɑ nɛ, nɑ nɛɛ, ben tiiwɑ n weenɛ u sɛɛyɑsiɑ, kpɑ bu ɡiɑ mɑ beyɑ bɑ torɑ,

²⁰kpɑ ben tii bu ben kɑm kobu wɑ. Nɡe mɛyɑ bɑ koo kɑ Gusunɔn mɔru dendɑ bu wɑ.

²¹Domi bɑ̀ n ɡu bɑ kpɑ, ben bɑɑye kɑ ye yɑ koo ben bibu deemɑ.

²²Sɑ ko kpĩ su Gusunɔ keu sɔ̃ɔsi, wi, wi u sɑ̃ɑ win ɡɔrɑdobɑn siri kowo?

²³Gɑbun wɑ̃ɑrɑ rɑ dorewɑ, bɑ n wɑ̃ɑ bɔri yɛndu sɔɔ. Kpɑ bɑ n wɑsi bwɑ̃ɑ do, bɑ n dɑm mɔ nɡe ɑluwɑɑsi sere bu dɑ bu kɑ ɡbi.

²⁵Adɑmɑ ɡɑbu bɑ rɑ ɡbiwɑ wɑhɑlɑ sɔɔ, bɑ kun doo nɔɔru wɑ bɑɑ fiiko.

²⁶Be kpurowɑ bɑ koo ɡbi, kpɑ bu ko kɔkɔnun dĩɑnu.

²⁷I bɛɛn tii lɑɑkɑri ko, nɑ bɛɛn bwisikunu yɛ̃ kɑ kɔ̃sɑ ye i mɑn mɑnimɔ.

²⁸Domi i nɛɛ, mɑnɑ tɔn bokon yɛnu ɡɑ wɑ̃ɑ, ɡè sɔɔ tɔn kɔ̃sobɑ wɑ̃ɑ.

²⁹Adɑmɑ i ǹ be bɑ sɑrɔ swɑɑɔ bikiɑre? I kĩ i sikiwɑ ye bɑ bɛɛ sɔ̃ɔwɑ tɔn kɔ̃son sɔ̃?

³⁰Wɑhɑlɑ yɑ̀ n tɔn kɔ̃so deemɑ u rɑ yɑriwɑ ye sɔɔn di. Bɑɑ Gusunɔ ù n kɑ nùn mɔru kuɑ, u rɑ kisirewɑ ye sɔɔn di.

³¹Ǹ n mɛn nɑ, wɑrɑ u koo mɑɑ nùn ɡerusi. Wɑrɑ u koo nùn win kɔ̃sɑ kɔsie.

³²Domi ù n ɡu, siki wɔruɔrɑ bɑ kɑ nùn dɔɔ. Kpɑ bɑ n siki te kɔ̃su.

³³Tɔn dɑbirɑ tɑ koo win ɡoru swĩi bu kɑ dɑ siku yerɔ. Kpɑ u kpin yee burɑru wɑ temɔ.

³⁴Ǹ n mɛn nɑ, nuku yɛmiɑ birɑ̀ i mɑn kuɑ. Bɛɛn ye i mɑn wisɑ mi kpuro, yɑ ǹ sɑ̃ɑ dee dee. Weesɑ i mɔ̀.