1Yoube da amane sia:i,
2Na sia:be nabima! Na da amo dogo denesisu fawane dilima adole ba:sa.
3Dilia na sia:ma:ne, logo doasima! Amasea, na sia: da dagosea, dilia da hanaiba:le, ba:sola:le gagama!
4Na sia:ga gegesu da osobo bagade dunu ilima hame. Be na momabo hou da bai bagade gala.
5Nama ba:ma! Dilia fofogadigi ouiya:le ha:gi nama sosodomu da defea.
6Na da nama hamoi hou amo bu dawa:sea, na da dawa:su hamedei amola na da yagugusa.
7Abuliba:le Gode da wadela:i hou hamosu dunu esaloma:ne yolesisala:? E abuliba:le ili da:i hamone amola bagade gaguiwane esaloma:ne yolesisala:?
8Ilia da ilia mano amola ilia aowalali ilia asigilabe ba:musa: sosodo esafulu.
9Gode da ili diasu amoga gugunufinisisu hou hame iasisa. Ilia da beda:didigisa hame esalumu.
10Dafawane, ilia bulamagau da galuli amola mae se nabawane mano lalelegesa.
11Ilia mano da sibi mano defele, hehenaiya hehedela lafiadala.
12Ilia sani baidama amola fulabosu amo dudududabe amoga gafosa.
13Ilia olofole agoane esalu, se mae nabawane bogosa.
14Wadela:i hamosu dunu da Godema ili udigili yolesima:ne sia:sa. Gode da ilia esala hamomu ilegesa. Be ilia amo ilegei dawa:mu hame hanai.
15Ilia da Godema hawa: hamomu da hamedei liligi agoane dawa:sa. Ilia Godema sia:ne gadosu da ilia hou hame fidima:beyale dawa:lala.
16Ilia da ilila: gasaga didili hamosa sia:sa. Be na da ilia asigi dawa:su hou amo hame lale gamu.
17Dilia da wadela:i hamosu dunu afae ea hadigi ha:ba:doi dagoi ba:bela:? Wadela:i hamosu dunu afae da gugunufinisisu hou ema doaga:be ba:bela:? Gode da ougiba:le, wadela:i hamosu dunu afae amoma se dabe ibela:?
18E da wadela:i hamosu dunu amo gisi foga mini asi defele, ili fulabole fasibala:? O gulu isuga mini asi defele, ili fulabole fasibala:?
19Dilia da amane sia:sa! Gode da mano ea ada wadela:le hamoiba:le, amo manoma se dabe iaha. Hame mabu! Gode da wadela:i hamosu dunu, ilima fawane se dabe imunu da defea. E da ilia wadela:le hamoiba:le, ilima se dabe iaha, amo olelemu da defea.
20Wadela:i hamosu dunu ilia da ilia hamobeba:le fawane se dabe lamu da defea. Ilia Gode Bagadedafa Ea ougi bagade hou ba:mu da defea.
21Ninia esalusu da dagosea, ninia mano da hahawane esaloma:bela:le dawa:ma:bela:?
22Dunu afae da Gode Ema hou olelema:bela:? Hame mabu! Gode da dunu amo da baligili gadodafa heda:i, ilima fofada:sa.
23-
24Dunu mogili da dagumuiwane esalea bogosa. Ilia da hahawane se mae nabawane esalu, amalu bogosa.
25Mogili ilia da hahawane hame esalu, bogosa. Ilia da esalea amola bogosea, eso huluane hihiwane gala.
26Be dunu huluane da defele bogole, uli dogosa. Ili huluane da daba:ga dedeboi dagoi ba:sa.
27Dilia dogo ganodini ougi dialebe, amo na dawa:.
28Dilia da agoane adole ba:sa, ‘Mimogo dunu amo da wadela:le hamosu, amo ea diasu da wali habila:?’
29Dilia da lalusu dunu amo bisili sia: sa:ibela:? Ilia ga asi misini, sia:ne iasu dilia hame nabibala:?
30Gode da ougiba:le, se dabe bidi iasea, E da wadela:le hamosu dunuma se dabe hame iaha.
31Dunu afae da wadela:le hamosu dunuma diwaneya udidimu, o ilia wadela:le hamobeba:le se dabe imunu da hamedafa gala.
32-
33Dunu eno da ilia bogoi da:i hodo amo bogoi uli dogoiga gaguli ahoasea, dunu osea:idafa da ilima asigiba:le, mogodigili fa:no bobogesa. Amola osobo da ilia da:i da:iya gebewane dialebe ba:sa.
34Be dilia! Dilia da na dogo denesima:ne, hamedei sia: fawane sia:sa. Dilia nama adole iasu huluane da ogogosu sia: fawane.”
