Atuwɑ 27:12-25

¹²Nyʋɣʋ tɑɑ mɑɣɑsəm tʋ loosiɣi wɑhɑlɑ kɛ pooluŋ, ɩlɛnɑ ɩ́ ŋmɛlɩ. Amɑ kʋmɛlɛməŋ nɑ́ lɑkɩ ɑwusɑ, ɩlɛnɑ pə́ nɩɩkɩ-wɛ.

¹³Ye nɔɣɔlʋ ɩ́ səŋɑɑ sɩ mʋʋlʋ ɩ́ tɔɣɔ-ŋ kəmlɛ, mʋ səŋlʋ cɑpɑ kɛ tɔlʋmɑ kɛ n tɑ nyɩ mʋʋlʋ tɔ pə tɔɔ.

¹⁴Wei ɩ́ kpɛ́ɛ́sɑ ɩ tɔɣɔntəlɛ nɑ sɛɛtʋ kɛ tɑnɑŋ ɑhulɑ tɛɛ, tə pəsəɣɩ mpusi kɛ́.

¹⁵Alʋ tɔm tʋ wɛ kɛ́ ɩsɩɩ tɛʋ lʋm cɑkʋɣʋ tiili nɑ pə́ tosiɣi kʋtɑmsɑ tɔ.

¹⁶Sɩ ń səŋsɩ ɑlʋ ɩsɩɩ mpʋ tɔ, pə wɛ kɛ́ ɩsɩɩ yʋlʋ cɑɑkʋɣʋ sɩ ɩ́ kpɑ heelim yɑɑ nim kʋhohoom nɑ niŋ tɔ.

¹⁷Nyəɣəlʋɣʋ kɛ pɑ sɑləɣənɑ kʋ lɛŋkʋ. Ḿpʋ́ɣʋ́ yʋlʋ nɑ ɩ tɔɣɔntəlɛ pɑ cɑɣɑlɛ lɑɣɑsəɣɩ lɛlʋ yɑɑsi.

¹⁸Wei ɩ pɑɑsəɣənɑ tʋɣʋ ŋku pɑ yɑɑ sɩ fiki tɔ, ɩnɩ ɩ tɔkənɑ kʋ pee. Ḿpʋ́ɣʋ́ təmlɛ tʋ wei ɩ pɑɑsəɣənɑ ɩ cɑɑ tɔ ɩ nyʋɣʋ kɑ́ kʋlɩ.

¹⁹Ɩsənɑ yʋlʋ nɑɑkɩ ɩ ɩlɛɛmʋɣʋ kɛ lʋm tɑɑ tɔ, mpʋ tɔtɔɣɔ yʋlʋ nɑɑkɩ lɛlʋ tɑɑ kɛ́ ɩnɩ ɩ mɑɣɑmɑɣɑ ɩ yɑɑsi.

²⁰Ɩsənɑ ɑtɛtəlɛ nɑ pʋ́ʋ́ɣʋ́ sɔsɔɔŋkʋ ɩɩ nyəɣəsəɣɩ sətɑɑ tɔ. Mpʋ tɔtɔɣɔ yʋlʋ ɩsɛ ɩɩ nyəɣəsəɣɩ kʋnyɩɩləm.

²¹Kɔkɔ kɛ pɑ mɑɣɑsəɣənɑ wʋlɑ nɑ liɣitee nyəɣəlʋɣʋ sɩ pɑ nɑɑ kʋ teu. Mpʋ tɔtɔɣɔ pɩɩ hʋʋnɑ yʋlʋ nɑ pə́ kɛɛsənɑ ɩsənɑ pɑ yɔɣɔtəɣɩ ɩ tɔm tɔ.

²²Pɑɑ n kɑ sɔ kʋmɛlɛŋ kɛ sɔʋlɛ tɑɑ nɑ kʋ́ yɔkɩ tənɑŋnɑŋ, n kɑɑ wɔɣɔsɩ kʋ kʋmɛlɛntʋ kɛ kʋ tɔɔ.

²³Pɑɑsənɑ nyɑ́ kɑləkʋ kɛ teu nɑ ń cɛkənɑ pɑɑ nyɑ́ tɔtɛ nte.

²⁴Pə tɑɣɑ pʋlʋ, liɣitee ɩɩ cɑkɩ tɑm tɔɔ. Pəyele kɑwulɑɣɑ ɩɩ təŋəɣɩ lʋlʋɣʋ kʋlʋmʋɣʋ kɛ tɑm.

²⁵Kʋ tɔlɑ nyɩɩtʋ kɛ tɛtɛkəlɛ tɑɑ, nɑ kʋfɑtʋ ɩ́ nyɔɔkɩ ɩlɛ n kʋ pɔɔŋ tɑɑ nyəntʋ.