Atuwɑ 13:5-24

⁵Siɣisilu tɑɑ kpɑɑnɑ kɑloolɑɣɑ kɛ́. Ɩlɛnɑ ɩsɑɣɑʋ nɑ́ɑ́ footiɣi lɛlɑɑ nɑ ɩ́ tʋɣɩ-wɛɣɛ fɛɛlɛ.

⁶Siɣisuɣu kentiɣinɑ yʋlʋ wei ɩ tɔntɛ wɛ teu tɔ. Ɩlɛnɑ ɩsɑɣɑtʋ nɑ́ɑ́ kʋ́ ɩsɑɣɑʋ.

⁷Lɛlɑɑ yɑɑkɩ pɑ təɣɩ toŋtʋnɑɑ, pə́cɔ́ pɑ fɛɩ pʋlʋ. Ɩlɛnɑ lɛlɑɑ nɑ́ɑ́ yɑɑkɩ pɑ təɣɩ kʋnyɔntʋnɑɑ nɑ pɑ́ hɑɣɑɑ.

⁸Wɛnɑʋ kɛ yʋlʋ lɑɣɑsəɣənɑ ɩ weesuɣu. Amɑ kʋnyɔntʋ nɑ́ tɑ́ nyɩ́ təlɛ.

⁹Siɣisilu wɛ kɛ́ ɩsɩɩ fətəlɑ wei ɩ nɑɑkɩ teu tɔ. Ɩlɛnɑ ɩsɑɣɑʋ nɑ́ɑ́ wɛ ɩsɩɩ fətəlɑ wei ɩ fiɣinɑɑ tɔ.

¹⁰Kɑlɑmpɑɑnɩ tike kɛ pɑ kʋsəɣənɑ yoou. Amɑ mpɑ pɑ nɩɩkɩ lɑɣɑtʋ tɑsʋɣʋ tɔɣɔlɛ ləmɑɣɑsɛɛ nyə́mɑ.

¹¹Toŋ wei yʋlʋ tɑ lɑɑ hikuɣu tɔ ɩ pɑsəɣɩ kɛ́. Amɑ toŋ wei yʋlʋ hikiɣi pəcɔ pəcɔ tɔ, ɩnɩ ɩ sɔɔsəɣənɑ.

¹²Yʋlʋ tɛɛlʋɣʋ pʋlʋ nɑ pə́ tɑ́ lɑ́ lɔŋ tɔ, ɩ lɑŋlɛ wɑkələɣɩ kɛ́. Amɑ ye ɩ nyɩɩlɑ pʋlʋ nɑ ɩ́ lɑ-wɩ ɩlɛ ɩ lɑŋlɛ hʋlʋmɩ sɔsɔm.

¹³Ye pɑ kpɑɑlɑ wei nɑ ɩ́ tɑ́ nɩɩ ɩ leki kɛ́. Amɑ wei ɩ tɔkəɣɩ nti pɑ tʋ-ɩ tɔ ɩ wɑɑkɩ kɛ́.

¹⁴Ləmɑɣɑsɛɛ tʋ kʋsɛɣɛsətʋ hɑɑkɩ weesuɣu kɛ́. Ntɩ tə cɔləɣənɑ yʋlʋ kɛ səm kɑtɔsɩ.

¹⁵Yʋlʋ lɑɣɑtʋ́ kɛ yəlɑɑ tʋɣʋnɑ. Amɑ ɩsɑɣɑʋ weesuɣu nɑ́ wɛ kɑtɛ.

¹⁶Nyʋɣʋ tɑɑ mɑɣɑsəm nyə́mɑ mɑɣɑsəɣɩ pɑ tɑɑ kɛ́ nɑ pə́cɔ́ pɑ́ lɑ pʋlʋ. Ɩlɛnɑ kʋmɛlɛməŋ nɑ́ɑ́ yɑsəɣɩ pɑ kʋmɛlɛntʋ.

¹⁷Tɔm kpɑɑllʋ ɩsɑɣɑʋ hotiɣi wɑhɑlɑ tɑɑ kɛ́. Ɩlɛnɑ kʋpɑŋ nɑ́ɑ́ wɑɑsɩ.

¹⁸Wei ɩ kisiɣi sɛɣɛsʋɣʋ tɔ, ɩ pəsəɣɩ kʋnyɔntʋ kɛ́ nɑ pɑ́ tʋʋ-ɩ. Ɩlɛnɑ wei pɑ kɑləɣənɑ nɑ ɩ́ sumɑ tɔ ɩ nyʋɣʋ kʋlɩ.

¹⁹Ye yʋlʋ ɩ́ nyɩɩlɑ pʋlʋ nɑ ɩ́ hiki-wɩ pə wɛ-ɩ leleŋ kɛ́. Amɑ kʋmɛlɛməŋ nɑ́ nyənəɣɩ ɩsɑɣɑtʋ lɔʋ kɛ ɑcɑɑlətʋ kɛ́.

²⁰Ye n təŋəɣɩ ləmɑɣɑsɛɛ nyə́mɑ n lɑkɩ ləmɑɣɑsɛɛ kɛ́. Amɑ kʋmɛlɛməŋ təŋlʋ nɑ́ pəsəɣɩ ɩsɑɣɑʋ kɛ́.

²¹Ɩsɑɣɑtʋ təŋəɣɩ tə lɑtɑɑ kɛ́. Ɩlɛnɑ pə́ lɛɛtəɣɩ tɑmpɑnɑ təŋlɑɑ kɛ kʋpɑntʋ.

²²Yʋlʋpɑŋ yekinɑ ɩ lʋlʋɣʋ nyə́mɑ kɛ ɩ kpɑncoou kɛ́. Ɩlɛnɑ siɣisilɑɑ nɑ́ɑ́ tɔɣɔ ɩsɑɣɑʋ nyəŋkʋ.

²³Kʋnyɔntʋnɑɑ kʋŋ pɑ tɑwɑ tɑɑ kɛ́ sɔsɔm. Ɩlɛnɑ muɣullɑɑ səkɩ.

²⁴Wei ɩɩ mɑkɩ ɩ pəyɑɣɑ tɔ ɩ tɑ sɔɔlɩ-kɛɣɛ. Amɑ wei ɩ sɔɔlɑ ɩ nyəŋkɑ tɔ ɩ mɑkɩ-kɛɣɛ.