ISƆBU 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Kɛ̀ Isɔbuu bɛ́i nkɛ dɔ̀:

²Kɛ dò nkɛ̀ bɛ̀ do bɑ̀tɛ n kó mɛhɑ́ɑ́rìmɛ̀, kɛ̀ bɛ̀ bo bennɛ́ n sémmɛ̀ tɛbiètɛ̀

³Mɛ cɛ̃́ɛ̃́kù bo pɛ̃ɛ̃tɛ́ dɑ̀mɛ́ɛ̀rì nùù kó mubirímú kó kucɛ̃́ɛ̃́kù, dɛɛ̀ te kɛ̀ n nɑ̀ɑ́ nkɛ í yɛ̃́ n yɛ̃ mmù.

⁴Kuyie mmuwɛ̃rímú mumɔu yiɛ̀ nkó ipie nyiì ǹ tùɔ̀ti kɛ̀ ì dɔ̀mmɛ̀ tɑ m miɛkɛ. Dɛkɔ̃m̀bɔ̀dorikpɛrɛ Kuyie nduɔ̀nní dɛ̀ dɛmɔu duò n yĩ́nkɛ̀ nkɛ bɛhɑ̃ɑ̃pɔ̀mbɛ̀ kɔ̃mɛ.

⁵Sɑ̃mmɑrímú bo nwúó ntimúsùùtì o ììkɛ̀ kɛ́ncómmú kɛ kuɔ̀nnɑ̀ɑ̀? Yɑ́ɑ̀ fɛnɑ̀ɑ̀fɛ̀ bo nwúó ntimútì kɛ́ncómmú kɛ kuɔ̀ nnɛ̀ dikònnɑ̀ɑ̀?

⁶We mbo nɑ kɛ́di dɛsɛɛrɛ dɛ̀ɛ̀ í ɑ̃ mukɔ́kúɔ́? Kunɑɑtí bomu mɛkoyennɔtimɛ mɛpɛ́ímɛ̀ miɛkɑɑ̀?

⁷N do ɔ̃ɔ̃ í ndɔ́ kɛ́dɛ́útɛ́ dɛ̀, dɛɛ̀ nɛ́ tú n kó mudiì kɛ̀ n dɛ̀ pɛ̃̀ mmɛdiɛ̀.

⁸Kɛ̀ Kuyie ndo bo yie nkɛ́dɔɔ̀ n kù bekɛ tì, kɛ̀ kù do yie nkɛ́dɔɔ̀ mbɑɑ tì.

⁹Kɛ̀ Kuyie ndo bo yie nkɛ́ n yɛ̃tɛ, kù nɑ nyòutɛ ku nɔ̀ùtɛ̀ kɛ́ n deè.

¹⁰Dɛ̀ nɑ nni mbɑ̀ńtɛ̀, diwɛ̀ì nɑ nni nkùɔ bɑ́ nɛ̀ n fɛ̃́ṹtímɛ̀ í mɛ ndeumɛ̀, kɛ̀ m mu n yí yetɛ Kuyie nkùù dò mpɑ́íí ku nɑ́ɑǹtì.

¹¹N wɛ̃rímú tú ɔ̃mmu kɛ̀ m bo nsɔkɛ́ kɛ bɑɑ? N yó nsɔkɛ́ kɛ bɑɑ bɑ m mɛ nkumɛ̀mu kɛ dèè?

¹²N kpeńnì ditɑ̃́rì kɔ̃mɛ mmɑɑ̀? Yɑ́ɑ̀ n kɔ̃̀ntì kpeńnìmu disɔɔwũɔ̃̀ kɔ̃mɛ?

¹³N kó mɛteèmmɛ̀ kpɛrɛ nɑɑ́ mpútì nweɑ̀? N tɛ̃́nkɛ í mɔkɛ dipĩ́nkɛ̀rì mɑrɑ̀ɑ̀?

¹⁴Wèè fɛ̃́ũ̀rì ò dò nho nɛ́pobɛ̀ nhò dɔ́mu, bɑ́ kòò tɛ̃́nkɛ í dé muwɛ̃rímú mumɔu yiɛ̀ nwe.

¹⁵N nɛ́pobɛ̀ n yóumu dikondɑɑ kó mɛniɛ nhɔ̃ɔ̃ yĩ́mɛ̀, kukó nkùù kó mɛniɛ nyí kɑrì mɛ kɔ̃mɛ.

¹⁶Fɛtɑɑfɛ̀ ɔ̃ɔ̃ ni diyɔ̃ɔ̃̀ kɛ̀ mɛnɛ́sĩ̀mmɛ̀ mɛɛ̀ kù tɑ kɛ̀ mupɑ̃̀ɑ̃ mboomu ndɑ́ɑ́tí.

¹⁷Kɛ̀ kuyiìnkù yɛ̀nní kùu kṹṹ, kɛ̀ diyiè nɑ̀ɑ́tɛ́ kùu kpeío dɛndɛ bɑ̀mbɑ̀.

¹⁸Kɛ̀ bɛkɑ̃tìpotɑmbɛ̀ɛ yóu bɛ cɛ kɛ́ ndɛ̀ dɑurí kɛ kù tũ̀, kɛ deètì dikpɑ́ɑ̀ tɛdɔntɛ̀ kɛ yɑ̀ɑ fetinɛ̀.

¹⁹Temɑɑ ɛì kó bɛpotɑmbɛ̀ do i mbúɔ́ Sebɑɑ ɛì kó bɛpotɑmbɛ̀ do ĩkú iì ĩ́nkɛ̀.

²⁰Kɛ̀ bɛ yɛ̀mmɛ̀ cɑ̀ɑ̀rɛ̀ nɛ̀ ikó mbɛ̀ do tɑ̃́ ì, bɛ̀ tùɔ̀koo dìì mɔ̀nnì bɛ̀ í yɑ̀ bɛ̀ do dɔ́ dɛ̀, kɛ̀ dɛ̀ɛ bɛ̀ di.

²¹Di kpɛrɛ mɛ ndo nnɛ̀ mí, di yɑ̀ tìì n tùɔ̀kɛní kɛ̀ di kɔ̃m̀bùɔ̀tì tiì do, kɛ̀ kufɔ̃wɑɑ́ ndi pĩ.

²²N di mɔɔmu kɛ̀ n tu di m pɑ̃ dɛ̀mɑrɑ̀ɑ̀? N yɛ̃ mmu di nɔ́ɔ́tɛ́ dɛ̀mɑrɛ̀ di kpɑ̀tì miɛkɛ kɛ́ m pɑ̃ɑ̃̀?

²³N yɛ̃ mmu di n dɛɛtɛ́nɛ̀ n dootitɔbɑ̀ɑ̀? N yĩmu dí n fietɛ bɛyɛibɛ nɔu miɛkɑɑ̀?

²⁴N wénkùnnɛ ti, n yóó yĩ́mu nyúóó, n nɑ́kɛ́nɛ̀ m bɛ́i ntì kɛ yetɛ́.

²⁵Tinɑ́ɑǹtì tìì tu timɔ́mmɔnti tì í kɔùrì di n wɑ́tìrì ìì wɑ́tii tukúnɛ̀ bɑ?

²⁶Di n wɑ́tírì ɔ̃̀nti ĩ́nkɛ̀? Di wúó n nɑ́ɑǹtì kɛ̀ tì dò nkuyɑɑkù nku mí nhosénnìwèɑ̀?

²⁷Di í yóó yetɛ di bo tɑ̃ɑ̃́mɛ̀ tɛ́tɛ́ dɛciribirɛ kpɛ́í, di í yĩɛ̃kɛ di bo fítɛ́mɛ̀ di nɛ́po.

²⁸Wɛ̃ɛ̃tɛnɛ̀ní m bíɛ́kɛ̀ di mmɔ̀nnì m bo nɑ kɛ́nɑ́kɛ́ siyɑ́ɑ̀bìsí di ììkɑ̀ɑ̀?

²⁹Yóunɛ̀ di bo nni mbekùnɛ̀mɛ̀, dɔɔ̀nɛ̀ dɛ̀ɛ̀ wetí, míì kpɑɑ́ kɛ tú onɑtì.

³⁰Siyɑ́ɑ̀bìsí bomu n nùù miɛkɑɑ̀? Yɑ́ɑ̀ n nɔ́ndɛnfɛ̀ í bɑɑ̀tì tiyɛiti?