Ayóoba 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ayóoba daldi ne:

²Éy su sama tiis wii doon lu ñuy natt diisaayam? Su sama ay wii wépp doon lees di màndaxe?

³Kon tey mu gëna diis suufoo suufi géej. Moo waral sama kàddu yi ma rëcc.

⁴Da di fetti Aji Man jee ma jam, ba tooke ji nàndal samam xel, mbugalu Yàlla yu raglu làng-déral ma.

⁵Mbaamu àll dina ŋaax te tiim ñax mu tooy a? Am nag dina nàññi te tiim um ngooñam?

⁶Deesul lekk lu soof, loo deful xorom, rawatina lu weex li ci nen.

⁷Sama xel a ko nanguwul, ñam la wu ma seexlu.

⁸Éy kuy amal sama dagaan, ba Yàlla sottal sama yaakaar!

⁹Yal na neex Yàlla mu nappaaje ma, yal na afal loxoom, ne ma tipp.

¹⁰Konoon sama ndàmpaay di li ma gàntalul kàdduy ku Sell ki, te kon ma bég, di fecce biir mitit wu dul dal.

¹¹Ana doole ju ma amati bay muñ? Ana luy sama muj ba may dundati?

¹²Dama diw doj bay àttan lu ne? Am yaramu xànjar laa am?

¹³Ndax amati naa wall, te pexe réer ma mërr?

¹⁴Ku ne lasiim, saña séentu xarit baaxe la, doonte fekkul nga ragal Aji Man ji.

¹⁵Samay xarit a ma wor ni yol moo fekk ŋiis. Dañoo mel ni dex yoo fekk ndox ma jeex,

¹⁶te ba sedd bay tàggoo, ndox mu wayoon ànd caakam yuur, di seey, mu fees dell ak ndox mu nëx.

¹⁷Waaye bu noor biy dikk, mu wow, tàngoor jam, mu ŋiis.

¹⁸Jëggi giléem ay wër um ndox, ba wacc seenu yoon, saaraan ca ndànd-foyfoy ga, réer.

¹⁹Waa jëgg ya bawoo Tema di wër ay yol, tukkikat ya bawoo Saba di séentuy dex,

²⁰ba àgg fa ñu ko fooge woon, yaakaar tas, seen kóolute mujje mbetteel.

²¹Yeen déy, yeenay yooyu wal ci man. Yeena gis sama njàqare, jàq.

²²Dama leena masa ñaan dara, mbaa ma sàkkoo ci seen alal ab ger,

²³ngir ngeen xettli ma ci loxol noon, mbaa ngeen jot ma ci boroom doole bu néeg?

²⁴Xamal-leen ma, man ma ne cell! Ana fu ma juume? Wonleen ma ko!

²⁵Kàddu yu jub da lay yey, ana li ngeen may yedde, lu mu doon?

²⁶Dangeen di jéema sikk samay wax, di jàppe ngelaw kàdduy xol bu jeex?

²⁷Ab jirim sax àttan ngeen koo tegoo bant, seen xarit sax sañ ngeen koo jaay.

²⁸Léegi nag, rikk walbatikuleen fi man, xanaa duma janook yeen di fen?

²⁹Deltuleen gannaaw, bu njubadi am. Dellootileen gannaaw, sama der set na wecc!

³⁰Ana fu ma waxe njubadi? Am damaa xamul lu njekkar di saf?