1Manang Joab nike tawrengnag David ni Pilung i Absalom nrib gel,
2ma aram me mol’og nge yib be’ ni bpin nrib gonap ni mapar u lan yu Tekoa. Nap’an ni taw, me ga’ar Joab ngak, “Ngam dake gabe mowaw; mu chuw nga madan e mowaw rom, ma dab kum rowey piyan lolugem. Mu ngongol ni bod be’ ni bpin nike n’uw nap’an nike mowaw.
3Ma aram magyan ngak fare pilung ngamog ngak e n’en ni nggog ngom ni ngamog.” Ma aram meyog Joab ngak e n’en ni ngeyog.
4Me yan fare pin ngak fare pilung, me yan i siro’ ngak ni be tayfan, me ga’ar, “Mu ayuwegneg, Gur e en ni Pilung!”
5Me fith fare pilung, ni ga’ar, “Mang e ga ba’adag?” Me fulweg ni ga’ar, “Siro’, i gag be’ ni bpin ni gu ba gafgow, keyim’ figirngig.
6Immoy l’agruw i pagel ni fakag, me reb e rran miyow tugthin u lan e flang, ko gin ndariy be’ riy ni nge pithigrow, me li’ bagyow bagyow nge yim’.
7Siro’, chiney e urngin pi girdi’eg ma kar togopluwgad ngog ma yad be yog ngog ni nggu pi’ fare pagel ni fakag ngorad, ya ngar thanged e fan rok ni bochan e ke thang e fan rok walagen. Fa’anra yad ra yodroy, ma gu ra par ni dakriy e pagel ni fakag. Yad ra thang e ta’are n’en nma lagan’ug ngay me par figirngig ni dakriy fak ni pagel ni ngki tunguy fithingan.”
8Me fulweg fare pilung, ni ga’ar, “Mu sul nga tafnam, me gag e bay gu gonpiy rogon e ran’nir.”
9Me ga’ar fare pin, “Gur en Pilung, demturug e n’en ni ga ra rin’, ma chon e tabnaw rog nge gag e gamad e ra aw e kireb riy ngomad; gur nge tabnaw rom nib pilung e bfel’ e romed.”
10Me fulweg fare pilung, ni ga’ar, “Fa’anra k’aring be’ e marus ngom, mag fek i yib ngog, ma dakuriy bi’id nra magawon nigem.”
11Me ga’ar fare pin, “Gur en Pilung, wenig ngom mu meybil ngak SOMOL ni Got rom, ni re girdi’ rog nsusun e nge falbiyen e kireb rok fare pagel ni fakag e dabi rin’ reb e kireb nib gel e oloboch riy ni nge thang e pogofan rok e bin kaba’ e pagel ni fakag.” Me fulweg David, ni ga’ar, “Kug micheg u fithingan SOMOL ni be par nib fos, ndariy bochi ban’en nra buch rok fakam.”
12Me ga’ar fare pin, “Gur en Pilung, wenig ngom, mu pageg nga’a yug kugog ta’abn’en.” Me fulweg fare pilung, ni ga’ar, “Mu non.”
13Me ga’ar fare pin ngak, “Mangfan ni kam rin’ ban’en ni erfane kireb ngak e girdi’ rok Got? Dawor mu pag e en nri fakam nge sul ko fa gin ni bay riy ni bod e kalbus, ere n’en ni kafin mog e aram e n’en nike kireb nagem.
14Gadad gubin ni go’ bay da m’ad; gadad bod e ran nike map’ nga daken e but’, ni dabkiyag i kunuy bayay. Mus ngak Got ma de faseg e pi’in karm’ad, machane en pilung e ra gonpiy rogon reb i kanawo’en me sul be’ ni pumo’on ni ba’ u bang ni bod ba kalbus.
15Gur en Pilung, chiney e fan ni kagub ni nggu non ngom e bochan e be k’aring e girdi’ e marus ngog, ma aram mug ga’ar u lanin’ug e nggu non ngom ni gomang e yugum rin’ e n’en ni gu be ning.
16Ug leamnag ni ga ra motoyil ngog ngam ayuwegneg rok fa’en ni be guy rogon ni nge thang e fan rok fakag nge gag ni aram e nge therbegmow u daken fare nam ni pi’ Got ngak pi girdi’en.
17Siro’, ug leamnag ni n’en ni ga ra michig e ra aywegeg ni dabi buch ban’en rog, ni bochan en pilung e bod e engel rok Got ma rayag ni ki’eg e fel’ ko kireb. Ngi i par rom SOMOL ni Got rom!”
18Me fulweg fare pilung, ni ga’ar, “Nggu fith ba de’er ngom, ma thingar mog ngog e riyul’.” Me ga’ar fare pin, “Demturug e n’en ni ga ra fith ngog, Gure en Pilung.”
19Me fith ngak, ni ga’ar, “Mog i Joab e ke pow’iy yem ko bine’?” Me fulweg fare pin, “Ngugog u fithingan urngin e tin nib thothup, Gure en Pilung, ri dariy kanawo’en ni gu ra pag ndab gu fulweg e de’er rom. Rriyul’ ni fare tolang ko salthaw rom i Joab e keyog ngog e n’en ni nggu rin’ nge n’en ni ngugog.
20Machane ke rin’ ni bochan e nge yal’uweg e re pa’ i oloboch ney. Gure en Pilung e gab gonop ni bod e engel rok Got ma gamnang urngin e tin be buch.”
21Me ga’ar David ni Pilung ngak Joab, “Kug duwgiliy ni nggu rin’ e tin ni ga ba’adag. Mman mu pining fare pagel i Absalom ngam fulweg ngaray.”
22Me paraw Joab nga but’ u p’eowchen David ni aram e ke tay fan, me ga’ar, “Pilung, i Got e ngi i fal’eg wa’atham! Chiney e kug nang ni gub fel’ u wun’um, ya kamog e kefel’ ko tin ni kug wenignag ngom.”
23Me sak’iy nge yan nga Geshur nge non ngak Absalom nge un ngak ngar sulow nga Jerusalem.
24Machane me yog David ni Pilung ndabi un Absalom ko par u lan e naun rok ni tafen e pilung. Ya ga’ar David ni Pilung, “Dabug ni ngug guy owchen.” Me par Absalom u naun rok nde yib nga p’eowchen e en ni pilung.
25Ga’ngin yu Israel ndariy ta’abe’ riy nib gilbuguwan nga feni pichoay ni bod rogon Absalom; ya dariy tharan u lolugen nge mada’ nga bugul i ay.
26Rib dub’ag piyan lolugen, mra reb e duw ma ri ta’ab yay nike th’ab, ya kayigi n’uw ma ke tomal. Ma yan i taw tomalngin ko lal e pawn nrogon ko thabthabel nike yog e en ni pilung ni ngan maruwel ngay.
27Absalom e dalip e pagel ni fak nge reb e bpin nrib pidorang ni Tamar fithingan.
28L’agruw e duw ni par Absalom u Jerusalem nde guy owchen David ni Pilung.
29Me pi’ e thin nge yan ngak Joab ni nge yib i guy, ya ba’adag ni nge yan Joab i guy e en ni pilung ni fan ngak; machane dabun Joab ni nge yib. Me pi’ e thin bayay nge yan ngak, ma ku de yib Joab.
30Me ga’ar Absalom ngak e pi tapigpig rok, “Mu sapgad, woldug rok Joab e mmigid ko girog, ni be tugul e barley riy. Marod ngam ted e nifiy ngay.” Miyad yan ngar ted e nifiy ko fa gi woldug.
31Me yan Joab ko naun rok Absalom me ga’ar, “Mangfan nike tay e tapigpig rom e nifiy ko woldug rog?”
32Me ga’ar Absalom, “Gu pi’ e thin ngeb ngom ni ngamub ya nggu l’oegem ngak e en ni pilung ngam wenig ngak ni fan ngog ni nge lungum, ‘Ke ga’ar Absalom mangfan ni gu chuw u Geshur nggu sul ngaray? Fa’an mang e gu par u rom ma kabfel’.’” Me ul ul Absalom ngay nge ga’ar, “Gu ba’adag ni ngam man mu non ngak e en ni pilung nge yag ni gu wan gguy, ma fa’anra bay e kireb rog, me thang e pogofan rog.”
33Me yan Joab i weliy ngak e en ni pilung. Me pi’ fa en ni pilung e thin ni nge yib Absalom i guy, me yib i paraw nga but’ u p’eowchen e en ni pilung. Me faray e en ni pilung owchen Absalom.
