1Zeruja ŋokâ‐ticne Joabe e ŋicwofuŋte maŋzi Abisalomtao fowec i hone tarawec.
2Hone tararâ Tekoa haeo kiŋaŋ sorec‐jopame jaŋe rarâ ŋokac maŋɋârâŋhec moc jowa warembiŋ. Jowa warepie ʒiŋuc âzâcnewec: “Go ki busâqocko jukomec hawari tinac ezemec. Ehuc busâqocte ŋaqi qoruc i hetec huzejec. Erâ go tokic wiac mi ruahuc ŋokac moczi hâmokicne jaŋere erâ dameŋne dameŋne ki busâqoc ehuc juekac irec sâc ezemec.
3Erâ ŋicwofuŋtao rarâ dâŋ gazapemu i âzâcnezemec.” Iŋuc murâ Joabezi dâŋ i ŋokacte micko râewec.
4Eme Tekoa haeonec ŋokac e ŋicwofuŋtao fisirâ ʒâŋe mai‐ticne mâreŋko hetutuckerâ dape qâhâŋ ehuc muwec, “O ŋicwofuŋ, go baficnuc.”
5Iŋuc mume ŋicwofuŋzi wiocnerâ muwec, “Wemo wiaczi weniŋuc egarekac?” Wiocneme ŋokaczi dâŋ bâtikiecnehuc muwec, “No hozec, ŋowe‐nane hâmowec.
6Eme kiŋaŋ naruge nore ŋokâ jajahec jupic. Juku dameŋ mocko gieo rarâ dâŋ mumuc epic. Eme mozi moc bâtâc bacjofazac, aricne. Irec âgonezi âgone qarâ qâhâmowec.
7Eme garikiŋfâc‐nane jaŋe sasawa faharerâ kiŋaŋ naruge no râsi enarehuc ʒiŋuc muŋgopieŋ: Go ɋaticne qâhâmowec ŋic e nâretec okacne qapene hâmozejec. Jaŋe iŋuc eniŋmuo mamacte ʒâŋetuc e wâc bâsiroweniŋmu. Erâ wâc ʒocmimiŋ‐nane hetirikicne i âke hâpohuc ŋowe‐nanere ʒâŋe biŋe me merâfâc i mâreŋte faio bârârâŋneniŋmu.”
8Iŋuc mume ŋicwofuŋzi ʒiŋuc âzâcnewec: “Go ficgao rac eme no dâŋge sâcne mutarapemu.”
9Ŋicwofuŋ e iŋuc mume Tekoa haeonec ŋokac eki dâŋ ʒiŋuc bâtikiecnewec: “Ŋicwofuŋ‐nane, kiŋ i no nahacne â garikiŋfâc‐nane nâŋere faio fozejec. Eme ŋicwofuŋ go â eri ŋeŋege ŋohe ine kiŋ fâsâc ezepirec.”
10Iŋuc mume ŋicwofuŋzi ʒiŋuc âzâcnewec: “Ŋic izi me izi dâŋ i me i gazahuc ba bâuac egarezo eme norao jowa warezemec.”
11Iŋuc mume ŋokaczi muwec, “Ŋicwofuŋ‐nane, go Wofuŋ Anutugere maio mujomiretec socte kiŋ babatara i mi fuazejec â ŋokâ‐nane wâc mi bâsirowenʒepieŋ.” Iŋuc mume ŋicwofuŋzi ʒiŋuc mujomirewec: “Wofuŋ e jujâmbâŋkekacte ŋokâgere qizec susuc moc mâreŋko moc mi wahaocmu.”
12Iŋuc mume ŋokaczi muwec, “Ŋicwofuŋ‐nane, go manatec sâckeme kiŋaŋ naruge no dâŋ mocjaha sawa mac mupe.” Mume muwec, “Sâcne muc.”
13Eme muwec, “Go wemocte wiac iŋucnea Anuture ŋicfâc jaŋerao fuaocte manasu biric emeŋ? Ŋicwofuŋ‐nane, go ŋic ecnetec wisewec e moc mi bârisiekicte go gahac dâŋ iŋuc muhuc kiŋhec tinac ekomec.
14Nâŋâc mâreŋko opâ hoŋkepene rarâ arictac eekac irec sâc mâmâc sasawa hâmoeŋgopeneŋ. Anutuzi ine juju‐nâŋec nâwoc roocte mi muekac, erâ ŋic jâpekicne e jâpeocte mana biric wâc mi eekac.
15Eme no ŋic ŋokac jaŋe hâhâwic henarembiŋte dâŋ ʒi mufua‐garepemurâ ŋicwofuŋ‐nane gorao ʒiŋuc manasuhuc warepac: ‘No dâŋ sasawa ʒi ŋicwofuŋ âzâcnepe e jahac kiŋaŋ naru‐ticne nore nunumu manaocmu mecne.
16Ehuc no nahacne â ŋokâ‐nane nâhe Anuture guruonec bâsirowec‐nâfoocte maŋkehuc jukac ŋic ere meonec batarac‐nâfoocmu.’
17Erâ ʒuhuckerâ ʒiŋuc manasupo: ‘Ŋicwofuŋ‐nane ere dâŋzi maŋwama bâfua‐nareocmu.’ Ŋicwofuŋ‐nane e Anuture aŋelo iŋucne ehuc biaŋne â sâqocne i mana wosâc eekac. Wofuŋ Anutugezi gohec juzejec.”
18Iŋuc mume ŋicwofuŋ e ŋokac ʒiŋuc âzâcnewec: “No wio‐garepe mi hesoŋke‐narezemec.” Mume ŋokaczi muwec, “Ŋicwofuŋ‐nane go sâcne muc.”
19Iŋuc mume ŋicwofuŋzi muwec: “Joabe e dâŋ mukomec i dopeckekac me?” Wiocneme ŋokaczi dâŋ bâtikiecnehuc muwec, “Ŋicwofuŋ‐nane, go jujâmbâŋkekicte dâŋ mukomec i wemocko hesoŋke‐garehuc muraʒic wefuc ezo. Dâŋ ʒi mupemurâ kiŋaŋŋicge Joabezi hâcne fotarie‐narewec. Erâ ekizia dâŋ sasawa ʒi kiŋaŋ naruge nore micko râe‐fârewec.
20E wiac ʒirec hatane moc fuaocte iŋuc ewec. Â bomboŋ‐nane, go ine Anuture aŋelo iŋucne maŋɋârâŋhec juhuc mâreŋko wiac fuahuc fokac i mana‐fâreekic.”
21Eme ŋicwofuŋzi Joabe âzâcnerâ muwec, “No mana‐garekopacte go rarâ ŋicmotec Abisalom e jowa warec.”
22Iŋuc âzâcneme Joabe e ʒâŋe maine mâreŋko hetutuckerâ dape qâhâŋ ewec. Erâ ŋicwofuŋ bubiaŋ manacnehuc muwec, “Go ʒoaŋ ʒira kiŋaŋŋicge nore manatec sâckekac i manakopac. Erâ ŋicwofuŋ‐nane, go kiŋaŋŋicge nore nunumu manahuc mana‐narekic i wâc mana‐jâmbâŋkekopac.”
23Iŋuc murâ Joabe e faharerâ Gesuru mâreŋko rarâ Abisalom jowame Jerusalem haeo warepic.
24Jowa wareme ŋicwofuŋzi muwec, “E taicko ficticnaoa juzejec, nore maŋfuŋko ʒira mi warezejec.” Iŋuc mume Abisalom e ŋicwofuŋte maio mi fuahuc ficticnao sawa juwec.
25Erâ Israe guruo ŋic moc Abisalom iŋucne sahac hawari‐ticnere erâ hohoneriŋkene moc mi juwec. E kike kiririŋ‐ticnaonecteaŋ feku qizec‐ticnao fisikac ira râfu wiac moc mi fowec.
26Erâ e qizec susuc‐ticne boc ŋemâckecneme jara sâc bâtâcne jujec. Bâtâcnerâ ŋicwofuŋte ŋemâc bâbâfuare sâcko râeme ŋemâc‐ticne 200 bâfua jujec.
27E ŋokâfâcne jahec â moc fuambiŋ. Erâ otâ‐ticne moc fuame ʒâŋene Tama muwec. E sahac hawari‐ticne biaŋne jâmbâŋ juwec.
28Eme Abisalom e jara jajahec Jerusalem haeo juhuc sifu ŋicwofuŋte maio mi fuawec.
29Iŋuc juku Joabe soreme ŋicwofuŋtao raocte muhuc dâŋ râeme rawec. Eme Joabe e wareocte mi afeckewec. Ehame harierâ dâŋ râeme rame Joabezi wâc iŋuc jaha mi fisiwec.
30Iŋuc eme Abisalom e kiŋaŋ qaqafâcne jazarâ muwec, “Ŋoŋe nore gie fokac ŋifecnao Joabere padi gie fokac i manaŋgopieŋ. Irec rarâ i hâcne ʒoczi turuŋkepie ʒaoc.” Iŋuc jazame kiŋaŋ qaqafâcne jaŋe rarâ ʒoc turuŋkepie ʒawec.
31Iŋuc epie Joabe e izia Abisalomtao rarâ ʒiŋuc âzâcnewec: “Kiŋaŋ qaqafâcge jaŋe wemocte gie‐nane râepie ʒajec?”
32Iŋuc wiome Abisalomzi dâŋ bâtikiecnehuc muwec, “Manakic, go warerâ nore mickonec dâŋ ʒiŋuc i ŋicwofuŋtao baracmurâ dâŋ râepe fâwec: ‘No wemocte Gesuru mâreŋkonec warepo? Ijaha jupe sâckezac.’ Irec ʒi ŋicwofuŋte maŋfuŋko rape, eme norao bahac fokacko sâcne qâhâmocnuzejec.”
33Iŋuc mume Joabe e ŋicwofuŋtao rarâ âzâcneme ŋicwofuŋzi Abisalom hefârewec. Hefâreme ŋicwofuŋtao rarâ dapecnehuc maŋfuŋnao ʒâŋe maine mâreŋko hetutuckewec. Iŋuc eme ŋicwofuŋzi Abisalom muduckewec.
