1Yan’ko’d ki ’dishe/ mo tani a’di yaki’d mo eya ris ’peŋkuman bampa/ ’baar mo dhali bampa/ si’da/ mmoc̱i gwo mo dhali mmoḵal gwom ’boro’d gom Bampa/ ma Arumgimis mo. Dhali uni ’kume’d i’ce’dka su/ nyaḵki ’ko ki a’di mo.
2Dhali up̱a tiya si’da/ kun woṯẖu/ ’pena rum thus kun nyo/on mo dhali ’peni ’ba’th kun ’koshi uni mo: Mariyam jin yuḵu gway ka Magdaliyya ’peni a’di jin urkunuwa rum thus kun nyo/on pesu/ ka pije/ mo,
3dhala Yuwanna jin ta ash ma Ḵusi jin ta’da mandhu to goma Hirodus mo dhala Susanna mo dhali unin tiya ka ris mo kun c̱i to ’peni tom buni kun mina uni mii ta mo.
4Dhali ka waambuhany ’kwani p̱u’dkin mo mmonṯal ’de/ mo dhali ’kwani ’peni bampa/ gi bampa/ mo p̱u’dkin mo e a’di mo tani a’di ki ṯor uni gwo ki gwom ’bi’th/e mo ki:
5Amanyeḵa ḵa’bany to a’di ya’d ka pije/ mo mmoyeḵa ḵa’bany tom piti mo. Dhali ki a’di yeḵki’d mo tani aḵa’banya tiya ṯa’kkini bway tur mo dhali uni yap̱kunu ki sho’k mo dhali ’dii kun p̱en e momis mo tani loski uni mo be.
6Dhali kun tiya biṯkin mo e mowosh mo. Dhali ki uni can mo tani uni shi’bilin mo hila/ haali/ mo ta toŋkor gom uni mo be.
7Dhali unin tiya biṯkin mo e bwam ma ’de/ mo dhali a’de/ can mo nyaḵki uni mo tani dhali a’di ki koṯẖ uni ’kup̱ mo be.
8Dhali kun tiya uni biṯkina ’cesh kun ’bora’bor mo dhali uni can mo dhali dho’thkin ki iss ’kwanimpa imudhe’d mo e emen gi cwalmana ’de/ mo. Ki a’di o gwo yansan mo tani a’di yuḵki’da yuḵ mo ki: A’di jin ta’d gi bwany’ce mo mmociḵ gwo mo tani dhalki a’di ciḵ gwo mo ma.
9Dhali ki imanciḵ a’di gwo doṯki a’di gwo mo gom ’pemen gi gwom ’bi’th/e yan ta’da ta mo tani
10a’di ki o uni gwo mo ki: E um mo tani um c̱ikunu gwo mo mmomish gwo jin c̱inu ki jim bag mo gom Bampa/ ma Arumgimis mo, hili gom unin tiya mo tani uni ṯoru ki jim ’bi’th/e mo, wakan ki uni gwansan kun mishi mo mo tani mini ’koki mish mo mo dhali uni kun ciḵki gwo mo tani uni mini ’koki mish gwo ’ban mo be.
11Gwom ’bi’th/e a’di a’dihe/ mo be: Aḵa’bany to a’di ta gwo ma Arumgimis mo be.
12Dhali unin tiya kun biṯkin mo e bway tur mo tani uni ita uni gwansan kun ciḵki gwo mo. Yan’ko’d tap̱a ma ruma ’cesh p̱u’dki’d mo dhali ’do gwo ’pena dum buni mo ki uni mini ’koki gam gwo is mo dhali ki uni minu ’koki woṯẖ mo be.
13Dhali unin tiya kun biṯkin mo e mowosh mo tani uni ita uni gwansan, ki uni ciḵki gwo mo tani bu’th a’di ki bwaŋ ’kunyu’d mo hila/. Hili uni gwansan idar ga birman mo. Uni gam gwo is mo ari’ceenne/ mo dhali ki mo p̱u’dki’d jin paluwa pal mo tani uni ṯa’kkin mo be.
14Dhali gom uni gun biṯkin mo e bwam ma ’de/ mo tani uni ita uni gwansan kun ciḵki gwo mo hili ki uni iikin mo e bway buni mo tani uni koṯẖa to gun noni ’twa/ mo dhali mo jin tanu pa gi pa mo dhali to kun se ’kwani ki ’pen mo e moŋ’ko mo, dhali maman buni ’koki is mo be.
15Dhali gwo gom uni gun ṯa’kkin mo eya ’cesh kun ’bora’bor mo tani uni ita uni gwansan kun ciḵki gwo mo mmodhu uni ki ’bore/ mo ka duŋ gana/ mo dhali ka dum ’borga/ mo dhali uni ki dho’th maman ki mo jin ’kuc̱u/ bwa mo ki ’kari’th mo be.
16Wathiŋ kamu/ diki c̱itha lamba/ mo mmokum a’di ’kup̱ ki ’kwa mo walla mmokar a’di e bwaŋ ’kwariny ma ci mo, hili a’di ki kar a’di ap̱o/ ṯirkina/ mo ki uni gwansan kun cic̱ki gu’b mo tani mini p̱ar moŋkush e mo be.
17Haali/ toŋ kamu/ yisa baguwa jin minu ’koki ṯor eya tente/ mo walla jin ’dap̱u ’kup̱ mo jin minu ’koki mish mo dhali guyu/ ki moŋkush mo.
18Hil ki ’bore/ mo ma, gwo jin ciḵa um mo. Haali/ a’di jin ta’d gi to mo tani a’di minu c̱i ki nyanye/ mo dhali ’peni a’di jin dara’d mo tani to jin ṯosha a’di jin tana a’di mo tani minu bu’th ’peni a’di mo be.
19Dhali yan’ko’d kum dhali ikam piti uni p̱u’dkin ’kup̱ ki a’di mo dhali hili uni ’koki ’dish a’di is mo goma waambuhany ’kwani mo be.
20Dhali a’di ṯorkunu gwo mo ki: Kwan dhali ikam pini uni doshkina pije/ mo, ona bwa mo mmop̱ar /e e mo be.
21Hili a’di o uni gwo mo ki: Ata’dam pem dhali ikam pem ta uni gwansan kun ciḵ gwo ma Arumgimis mo dhali mii uni mo be.
22Ka cima kamu/ mo tani a’di seki’da ḵur mo nyaḵki imanciḵ a’di gwo mo dhali a’di ki o uni gwo mo ki: Dhalki ana ’ciṯẖa/ gap̱ ki ’bana kamu/ ma al mo ma. Wakan uni karkina ḵur ’pen mo be.
23Dhali me’d jin hashkina uni mo eya ḵur yi’de/ mo tani a’di ishki e mo. Dhala p̱unthar ’tham p̱u’dki’d ap̱o/ ma al yi’de/ mo dhali uni ’tu’dkina yi’de/ bwa ḵur mo dhali uni ’kokin mo e mo jin ṯagu wu mo be.
24Dhali uni iikin mo mmomer a’di e mo mmo/o a’di gwo mo ki: Tap̱a, Tap̱a, ana ’ce’du/ sho’k mo. Dhali a’di merki e mo dhali ḵucur ’tham ki gwo mo dhali yi’de/ jin bir bakal mo. Dhali uni daḵkan mo dhali mo dosh ki biyuu mo be.
25Dhali a’di ki o uni gwo mo ki: Mane moŋgam gwo is bum mane? Dhali uni ḵo/ki is mo be dhali uni merkin mo mmo/o gwo ka rem ’kup̱ mo ki: Wathi/ yan ta’da ja sa/ haali/ a’di ḵanki ’tham gwo mo dhali yi’de/ mo, dhali uni ha gwom piti e mo be.
26Dhali uni merkin mo e bampa/ gi Paŋ Gadara mo a’di jin di’d ka par ’twa/ ki Pany Jaliil mo be.
27Dhali ki a’di thulki’d ka ’cesh mo tani wathiŋ kamu/ ’peni ’peŋkuman bampa/ jin ta’d ga ruma ’cesh mo gamki a’di ’kup̱ mo. Haali/ isa gush mo tani a’di diki hi’th burrinyeŋ kamu/ i/is mo dhali a’di diki c̱a’b e gu’b mo, hili a’di c̱a’bki’d mo e bwaman moŋ’kup̱aje mo.
28Ki a’di p̱arki’da Yesus e mo tani a’di cuu’d ki ’twa/ jin caaca mo dhali biṯa ’cesh mo mbwambori a’di mo dhali o gwo mo ki dhan ’twa/ jin caaca ki: /e mini mii aha/ katinta mo, Yesus jin ta Ya/ ma Arumgimis jin Cayaa/ e ki Ca mo? Aha/ ’thokina /e mo ki dhalku/ ki ṯocaa/ ’kus mo.
29Haali/ a’di ḵanki’da rum thus jin nyo/o’d gwo mo mmoya ka pije/ mo ’peni wathi/ mo. (Haali/ me’d ka ris a’di bu’thki a’di mo dhali a’di karkunu mo mmoji mo dhali a’di deḵkunu ka jindhiir mo dhala maḵḵiya mo, hili a’di ’ce’dki mondeḵ mo dhali a’di urkin ma ruma ’cesh ka pije/ mo e bwam ma si’b mo.)
30Yan’ko’d Yesus ki doṯ a’di ki: Gway pini yuḵu kata mo? Dhali a’di ki thoḵ a’di gwo mo ki: Karis mo. Haali/ ama’dinya ruma ’cesh uni sekini a’di mo be.
31Dhali uni ’thoki a’di mo mmodiki ḵan uni gwo mo mmo/ii mo e bwany jisa ’kulga/ mo.
32Dhali hili ama’diny ḵuthar caaca shwani ’bambala wosh mo dhali uni ’tho a’di mo mmodhal uni bway mo mmose i uni gwansan mo be. Wakan a’di dhalki uni bway mo be.
33Dhali yan’ko’d aruma ’cesh iikin ka pije/ ’peni wathi/ mo dhali cic̱ mo e bwam ḵuthar mo dhali ama’diny ḵuthar uni yakina ŋwac̱a/ mo ka luŋgu’b mo eya gap̱a al jin ’kula’kul mo mbwaman ma al mo dhali uni loskunu mo be.
34Ki imanhil ḵuthar p̱arki a’di jin miikunu e mo tani uni son mo dhali ṯor a’di e ’peŋkuman bampa/ mo dhali e pa ’baar mo.
35Dhali yan’ko’d ’kwani iikin ka pije/ mo mmop̱ar to jin miiki’d e mo dhali uni p̱u’dkina Yesus mo dhali uni ki gam wathi/ ’peni a’di jin pikin ma ruma ’cesh ka pije/ mo mmoc̱a’b e sho’k ma Yesus mo mmodi ki burrinye/ i is mo dhali mmoc̱a’b ka dum ’boro’d mo dhali uni ’kokin mo mmoḵo/ is mo be.
36Dhali uni gwansan kun p̱arki a’di e mo tani ṯorki uni gwo mo gom a’di jin bu’thkin ma ruma ’cesh mo tani a’di wac̱kunu mo be.
37Dhali yan’ko’d aris ’kwani kun ’kona bampa/ ki jiŋ ’kam mo e Paŋ Gadara mo tani uni doṯki a’di mo mmoya mo ’peni uni mo haali/ uni butha moŋḵo/ is jin caaca kagahara mo. Wakan a’di seki’d mo e bwam ma ḵur mo dhali doḵ ka nyaŋ’ko’d mo be.
38Wathi/ jin yakin ma aruma ’cesh ka pije/ mo ’peni cine/ mo tani doṯki a’di mo mmo’taki nyaḵ ya ki a’di mo. Hili a’di hashki a’di mo mmo/o gwo mo ki:
39Doḵku/ bway pam pini mo ma dhali ṯora ris to jin miikin ma Arumgimis i /e mo. Dhali a’di yaki’d mbway mo mmoṯora ris to gwansani ’baar mo eya ris ’peŋkuman bampa/ gom tony caaga/ jin miikin ma Yesus gom a’di mo be.
40Dhali ka Yesus doḵki’d ka nyaŋ’ko’d mo tani awaambuhany ’kwani hanki a’di mo haali/ uni ’kokin mo mmoc̱or a’di mo be.
41Dhali wathiŋ kamu/ p̱u’dki’d mo jin yuḵu gway ka Yaa/irus mo. A’di ta tap̱a gi gu’b gi montul is mo, dhali a’di ki biṯa ’cesh e sho’k ma Yesus mo mmoŋap̱ a’di mo mmoya bway gu’b piti mo be.
42Haali/ a’di ta’d gi jasi ’bwa/ jin di’d ’deŋ gana/ mo. A’di ’kona yili ’kume’d i’ce’dka su/ mo ki cam piti mo dhali ayim muru’di wu mo be. Ki a’di yaki’d mo tani ’kwani ḵalki a’di ka bor mo be.
43Dhala ’boma kamu/ jin gus ma bas ki yili ’kume’d i’ce’dka su/ mo dhali a’di molu wac̱ mo ki miiŋ kamu/ mo.
44A’di p̱u’dki’di bwamp̱o/ a’di mo dhali ta a’di ’twaman burrinyem piti is ki me’d mo, dhali ki jahanne/ abas ma yim jin guski’d mo tani daḵki’d mo be.
45Dhala Yesus ki o gwo mo ki: Kaja a’di jin tayaa/ is ki me’d mo? Ki uni ’baar mo urki gwo mo tani Buṯerus ki o a’di gwo mo ki: Tap̱a, awaambuhany ’kwani caaca kagahara ḵal /e ki is mo dhali yap̱ /e mo.
46Hila Yesus o gwo mo ki: Jin ṯal ’deŋ kamu/ taki aha/ is ki me’d mo, haali/ aha/ nyiṯẖa ki mom’bi’th yaki’d mo ’peni aha/ mo be.
47Dhali ka ’bom mishki’d ki a’di ’kokunu ki mol mo tani ayim p̱u’dki’d mo dhali deena is kagahara mo dhali biṯa ’cesh mo ibwambori a’di mo dhali a’di ki ṯor gwo mo e bwambori ’kwani ’baar mo mmotana a’di a’di is ki me’d mo dhali mmowac̱kunuwa yim ki jahanne/ mo be.
48Dhali a’di ki owa yim gwo mo ki: ’Bwa/um, moŋgam gwo is pini wac̱ki /e mo be. Yaku/ /e ki moŋḵu’th is mo ma.
49Ki a’di di’d mmoṯor gwo mo tani wathi/ ’peni gu’b gi tap̱a p̱u’dki’d mo dhali o gwo mo ki: ’Bwa/um pini a’di wuki’d mo be. Dhalku/ ki mura amanṯor gwo adu is doḵ/e mo.
50Hila Yesus, mmociḵkina a’di gwo yansan mo tani thoḵki a’di gwo mo mmo/o ki: Dhalku/ is ki ḵo/ mo ma. Gami gwo is mo ’te/ dhala yim minu wac̱ mo be.
51Dhali ki a’di p̱u’dki’d mo e gu’b mo tani a’di diki dhal jan ’deŋ kamu/ bway mo mmocic̱ nyaḵki a’di mo, hili jasa Buṯerus dhala Yohaan dhala Yakuub mo dhali com ma ’ci mo dhali kum ma ’ci mo be.
52Dhali aris uni gun gwokin mo dhali kun miikina pure/ mo goma yim mo tani, hili a’di o gwo mo ki: Dhalku/ ki ko mo ma haala yim yisa wu’d mowa, hili a’di ishi e mo be.
53Dhali uni ki p̱e’th a’di mo mmomisha uni ka yim a’di wuki’d mo be.
54Hili a’di ki budha yim ki me’d mo. A’di ki yuḵa yuḵ mo mmo/o gwo mo ki: Ari nyara/, cuyi mis mo ma.
55Dhali shi/in ma yim doḵki’d mo dhali ayim cuki mis ki jahanne/ mo dhali a’di ḵanki gwo mo ki to minu mii mii mo mmoc̱i ayim mmoshwa mo be.
56Dhali icom ma yim uni ’kokin mo mmomer mo be. Hili a’di ḵanki uni gwo mo mmo’koki ṯor wathiŋ kamu/ a’di jin miikunu mo be.
