1Gbɛ̃nↄ ↄ kpà dasi, de ò yã kũ à kɛ̀ ó tɛ́ baba takada gũn zɛ́azɛa,
2lákũ gbɛ̃ kũ ò de yã pìi sèedadenↄ ũ kũ a baarukparinↄ òwɛrɛ nà zaa káaku.
3Tera sà makũ sↄ̃, lákũ ma wɛ́ pɛ̀ yã pìnↄi nà dodo zaa a naana, ma è à mana mà kɛ̃nnɛ zɛ́azɛa, ma gbɛ̃ bɛ̀ɛrɛde Tiofilu,
4de ǹ yã kũ ò dànnɛ sãnsãn dↄ̃.
5Yudea bùsu kína Hɛrↄdu gↄrↄ sa'ori ke kun, a tↄ́n Zakari. À kú Abia sa'orinↄ gã̀a gũmmɛ. A nanↄ tↄ́n Ɛlizabɛti. Haruna burimɛ dↄ.
6Ń pla ń pínki mana Ludanɛ. Òdigↄ̃ kun taari sari, ò Dikiri doka kũ yã kũ à dìtɛnↄ kũna.
7Ama ò nɛ́ vĩro, zaakũ Ɛlizabɛti bi paramɛ, akũ ń gbɛ̃nↄn pla ń pínki zĩ kũ̀.
8Gↄrↄ kũ sa'onaa kà ń gã̀aa, Zakari mɛ́ àtɛn sa'ona Ludaa zĩ kɛ.
9Lákũ sa'orii pìnↄ dì kɛ nà, ò kàpaa kpà, akũ kàpa Zakari kũ̀ de à gɛ́ turaretiti kpata Dikiri kpɛ́n.
10Turaretitikpatana gↄrↄ pari kàkara kpɛ́lɛlɛa ń pínki, òtɛn adua kɛ.
11Akũ Dikiri malaikaa bò a sùa, à zɛ̀ turaretitikpataki ↄplai.
12Kũ Zakari a è, à kɛ̀ gìri, vĩna a kũ̀.
13Akũ malaikaa pìi pìnɛ: Ǹsun tó vĩna n kũro Zakari. Luda n wɛ́kɛ sì, n nanↄ Ɛlizabɛti ni nɛ́ i gↄ̃gbɛ̃ ũ, ǹ tↄ́ kpánɛ Yahaya.
14N pↄ ni kɛ nna, ǹ yáa dↄ, gbɛ̃nↄ ni pↄnna kɛ a ina yã musu dasi,
15zaakũ anigↄ̃ de Dikirinɛ gbɛ̃ zↄ̃kↄ̃ ũmɛ. Ani wɛ̃ ke í gbãna ke miro, Luda Nini nigↄ̃ kúa zaa a da gbɛrɛmmɛ.
16Ani tó Isarailanↄ arɛ dↄ Dikiri ń Ludaa dasi,
17ani do Dikirinɛ arɛ kũ Luda Nini gbãna kũ Iliasu vĩ yão. Ani tó denↄ lɛ́ kɛ do kũ ń nɛ́nↄ, ani tó sãyãmarisaridenↄ gbɛ̃ mananↄ ↄ̃ndↄ̃ sɛ́. Ani tó gbɛ̃nↄ gↄ̃ kú soru gũn Dikirinɛ.
18Akũ Zakari pì malaikaa pìinɛ: Deran mani yã pì yãpura dↄ̃ↄ? Zaakũ mare zĩkũnaan ma ũ, akũ ma nanↄ zĩ kũ̀ dↄ.
19Akũ malaikaa pìi wèa à pì: Makũmɛ Gibirilu ũ, madìgↄ̃ zɛna Luda arɛ. Àkũ mɛ́ à ma zĩ mà yã pì onnɛ, mà baaru nna pì kpánnɛ.
20Ǹ ma, n nɛ́nɛ ni natɛ, ĩni fↄ̃ ǹ yã oro ari yã pì gɛ́ kɛo, kũ ńdi ma yã kũ ani kɛ a gↄrↄa síro yãi.
21Gↄrↄ kũ̀a sↄ̃ òtɛn Zakari dã. A gìkɛnaa Luda kpɛ́n bò ń sarɛ.
22Kũ à bò, adi fↄ̃ à yã ò kũńworo, akũ ò dↄ̃̀ kũ à wɛ́gupu è Luda kpɛ́n. Lákũ a nɛ́nɛ nàtɛ nà, akũ àtɛn yã ońnɛ kũ ↄo.
23Kũ Zakari sa'ogↄrↄ pàpa, akũ à tà bɛ.
24Abire gbɛra a nanↄ Ɛlizabɛti nↄ̀ↄ sì, akũ à a zĩda ùtɛ ari mↄ sↄↄro à pì:
25Dikiri yã dí kɛ̀mɛnɛ, à ma wɛ̃nda gwà, à ma bo wé'iyãn.
26A mↄ suddode gũn Luda malaika Gibirilu zĩ̀ Galili lakutu kũ òdi pi Nazɛra gũn.
27À gɛ̀ɛ nↄkpare bũnu kũ a tↄ́n Mariama kĩnaa. À gↄ̃kpamma vĩ Dauda buri ũ. A tↄ́n Yusufu.
28Kũ malaikaa pìi gɛ̃̀ a kĩnaa, à pìnɛ: Fↄↄ arubarikade! Dikiri kú kũnwo.
29Mariama bídi kɛ̀ manamana yã pìia, à laasun lɛ̀ à pì: Fↄↄ bire mì de deraa?
30Akũ malaikaa pìi pìnɛ: Mariama, ǹsun tó vĩna n kũro, zaakũ Luda gbɛ̃kɛ kɛ̀nnɛmɛ.
31Ǹ ma! Ĩni nↄ̀ sí ǹ nɛ́ i gↄ̃gbɛ̃ ũ, ǹ tↄ́ kpánɛ Yesu.
32Anigↄ̃ de gbɛ̃ zↄ̃kↄ̃ ũ, oni a sísi Luda Musude Nɛ́. Dikiri Luda ni a ká a dizi Dauda kpatan,
33anigↄ̃ kí ble Yakubu burinↄa gↄrↄ sĩnda pínki, a kíblena nigↄ̃ lakana vĩro.
34Akũ Mariama pì malaikaa pìinɛ: Mádi gↄ̃gbɛ̃ dↄ̃ zikiro, abirekũ ni sí kɛ deraa?
35Malaikaa wèa à pì: Luda Nini ni summa, Luda Musude gbãna ni danla. Abire yãi nɛ́ kũ ĩni i pì kunna nigↄ̃ adona, oni a sísi Luda Nɛ́.
36N danɛ Ɛlizabɛti nɛ́gↄ̃gbɛ̃ nↄ̀sina se a zĩkũnaa gũn. Nↄgbɛ̃ kũ ò dìtɛ para ũ pì kú kũ nↄ̀ mↄ suddoo tera.
37Zaakũ Luda kĩnaan pↄ́ sĩnda pínki dì sí kɛn.
38Akũ Mariama pì: Dikiri zↄ̀bleriin ma ũ. À kɛmɛnɛ lákũ n ò nà. Akũ malaikaa pìi tà à a tòn.
39Gↄrↄ kũ̀a Mariama fùtɛ à gɛ̀ɛ lakutu kũ à kú Yudea bùsu gusĩsĩden gↄ̃̀nↄ.
40À gɛ̀ɛ Zakari bɛa, akũ à fↄ kpà Ɛlizabɛtia.
41Kũ Ɛlizabɛti Mariama fↄↄ pìi mà, a nɛ́ vĩ̀ a gbɛrɛ gũn, akũ Luda Nini sù Ɛlizabɛtia,
42à wiki gbãna lɛ̀ à pì: Arubarikademɛ n ũ de nↄgbɛ̃ sĩnda pínkila. Arubarikaden nɛ́ kũ à kú n gbɛrɛn ũ dↄ.
43Bↄ́n ma ũ, kũ ma Dikiri da sù ma gwaa?
44Gↄrↄ kũ ma n fↄkpammanaa mà dé, nɛ́ kũ à kú ma gbɛrɛn vĩ̀ kũ pↄnnaomɛ.
45Arubarikademɛ n ũ, mↄkↄ̃n kũ n yã kũ Dikiri ònnɛ sì, kũ ani kɛ.
46Akũ Mariama pì: Matɛn Dikiri tↄ́ sɛ́ lei ma swɛ̃̀ɛ gũn,
47ma pↄ tɛn kɛ nna Luda ma Surabariia,
48zaakũ à ma yã dà, makũ a zↄ̀bleri kũ mádi ká pↄ́ke ũro. Zaa tera ari gↄrↄ sĩnda pínki oni pimɛnɛ arubarikademɛ,
49zaakũ Luda gbãnade yã zↄ̃kↄ̃ↄ kɛ̀mɛnɛ. A tↄ́ kú adona.
50Àdi wɛ̃nda dↄ̃ gbɛ̃ kũ òdi a vĩna kɛnↄnɛ ari ń buria.
51À a gã̀a pòro, à a gbãna mↄ̀ńnɛ, à zĩdabirinↄ fã̀kↄ̃a kũ ń laasunnↄ.
52À gbãnadenↄ bò kpatan, à talakanↄ sɛ̀ lei.
53À pↄ mananↄ kpà nàdɛrinↄa ò kã̀, ama à ↄgↄdenↄ gbàrɛ ↄkori.
54À kpà a zↄ̀bleri Isarailanↄi, ń yã dí sãaguro.
55À wɛ̃nda dↄ̃̀ Ibrahĩnɛ kũ a buri pìnↄ lákũ à ò ó dizinↄnɛ nà.
56Mariama vùtɛ kũ Ɛlizabɛtio lán mↄ aakↄ̃ bà, akũ à ɛ̀ra bɛ.
57Ɛlizabɛti nɛ́'igↄrↄ kà, akũ à nɛ́ ì gↄ̃gbɛ̃ ũ.
58Kũ a fárandidenↄ kũ a danɛnↄ mà lákũ Dikiri a wɛ̃nda gwà nà, ò pↄnna kɛ̀ kãao.
59A gↄrↄ sↄraakↄ̃de zĩ ò sù tↄ̃̀ zↄ̃ nɛ́ pìinɛ, de ò a de Zakari tↄ́ kpánɛ,
60akũ a da pì: Oi! Oni a sísi Yahayamɛ.
61Ò pìnɛ: Gbɛ̃ke kú n danɛnↄ tɛ́ kũ à tↄ́ bire vĩro.
62Akũ ò yã ò a denɛ kũ ↄo, de ò dↄ̃ deran à ye ò tↄ́ kpánɛ nà.
63Zakari anlo gbɛ̀ka, akũ à kɛ̃̀a: A tↄ́n Yahaya. Yã pìi bò ń sarɛ ń pínki.
64Gwe gↄ̃̀nↄ a nɛ́nɛ sɛ̀ lei, à lɛ́ bò àtɛn yã o, àtɛn Luda sáabu kpá.
65Akũ vĩna ń fárandidenↄ kũ̀ ń pínki, akũ Yudea bùsu gusĩsĩde gbɛ̃nↄ tɛn yã pì o ń pínki.
66Akũ gbɛ̃ kũ ò yã pìi mànↄ kũna ń nɛ̀sɛɛ gũn ò pì: Bↄ́n nɛ́ pì nigↄ̃ de a ũ ziaa? Zaakũ Dikiri ↄ kúa.
67Luda Nini sù a de Zakaria, akũ à annabikɛyã ò à pì:
68Ò Dikiri Isarailanↄ Luda sáabu kpá! À sù à a gbɛ̃nↄ bò.
69À Surabari gbãnade bòwɛrɛ a zↄ̀bleri Dauda buri tɛ́,
70lákũ à ò a annabinↄ gãi nà zaa gìkɛna.
71Ò pì ani ó sí ó ibɛrɛnↄa, ani ó bo gbɛ̃ kũ ò zã̀ógu pìnↄ ↄĩ.
72Lɛmɛ à ó dizinↄ wɛ̃nda gwà lɛ, a bàka kunna kũńwo yã dí sãaguro.
73À la dà ó dizi Ibrahĩnɛ
74à pì áni ó bo ó ibɛrɛnↄ ↄĩ, áni ó gba zɛ́ ò doarɛ vĩna sari,
75de ó kunna gↄ̃nɛ adona gbɛ̃ mananↄ ũ ari ó wɛ̃̀ndi lɛ́n.
76Mↄkↄ̃n sↄ̃ ma nɛ́, oni n sísi Luda Musude annabii, zaakũ mↄkↄ̃n mɛ́ ĩni do Dikirinɛ arɛ ǹ zɛ́ kɛkɛnɛ.
77Ĩni tó a gbɛ̃nↄ dↄ̃ lákũ ani ń sura ba nà, lákũ ani ń durunnanↄ kɛ̃ḿma nà.
78Zaakũ ó Luda sùru vĩ, bonaa musu ani su ó gwa lán gudↄnaa bà,
79de à gu pu gbɛ̃ kũ ò kú gusira gũnnↄnɛ kũ gbɛ̃ kũ ò kú ga lɛ́inↄ, de à ó gbá da aafia zɛ́n.
80Nɛ́ pì zↄ̃kↄ̃ kũ̀, à gↄ̃̀ kãgbãnade ũ. A kú gbárannan ari gↄrↄ kũ à bò Isarailanↄnɛ gupuraa.
