1Yesu bò Yoda àtɛn su kũ Luda Ninio pɛkɛrɛna, akũ Nini pìi gɛ̀ɛ kãao gbárannan.
2Ibilisi a yↄ̃̀ à gwà gwe ari gↄrↄ bupla. Gↄrↄ kũ̀a adi pↄ́ke blero. Kũ gↄrↄ bupla pìi pàpa, nà tɛni a dɛ.
3Akũ Ibilisi pìnɛ: Tó Luda Nɛ́mɛ n ũ, ǹ pi gbɛ̀ dí li burodi ũ.
4Yesu wèa à pì: À kú Luda yãn ò pì: Pↄ́blen bisãsiri dìgↄ̃ kúo adoro.
5Akũ Ibilisi gɛ̀ɛ kãao musu, akũ à andunia kpatanↄ mↄ̀nɛ pínki a zɛki gbɛ̀n gↄ̃̀nↄ
6à pì: Mani n gba abirenↄ iko pínki kũ a gakurio, zaakũ à kú ma ↄĩmɛ, gbɛ̃ kũ má yei mani kpáa.
7Tó n kutɛ ma arɛ dé, ani gↄ̃ n pↄ́ ũmɛ pínki.
8Yesu wèa à pì: Ò kɛ̃̀ ò pì, ǹ donyĩ kɛ Dikiri n Ludanɛ ǹgↄ̃ doi ado.
9Akũ Ibilisi gɛ̀ɛ kãao Yurusalɛmu, à a zɛ̀ Luda kpɛ́ mìsↄ̃ntɛa à pì: Tó Luda Nɛ́mɛ n ũ, ǹ ↄ gbarɛ n zĩdai la,
10zaakũ ò kɛ̃̀ Luda yãn ò pì: Ani n yã o a malaikanↄnɛ ò n dãkpã.
11Ò pì dↄ: Oni n sɛ́ ń ↄĩ, de ǹsun gɛ̃̀ sí gbɛ̀ɛaro yãi.
12Yesu wèa à pì: Ò pì, ǹsun Dikiri n Luda lɛ́ ǹ gwaro.
13Kũ Ibilisi Yesu yↄ̃̀ à gwà kũ yã pínkio à làka, akũ à a tòn ari zĩkea dↄ.
14Yesu ɛ̀ra à tà Galili kũ Luda Nini gbãnao, akũ a tↄ́ dà bùsuu pìla pínki.
15Àdi yã dańnɛ ń aduakɛkpɛnↄ gũn, baadi pínki dì a sáabu kpá.
16Akũ à gɛ̀ɛ Nazɛra, gu kũ à nɛ́ blèn. Kámmabogↄrↄ zĩ à gɛ̀ɛ aduakɛkpɛn lákũ àdi kɛ nà. À fùtɛ à zɛ̀ de à kyó kɛ,
17akũ ò annabi Isaya takada kpàa. Kũ à pòro, à bò gu kũ ò yã dí kɛ̃nwa ò pì:
18Dikiri Nini kúma, à ma ditɛ mà baaru nna kpá takasidenↄnɛ, à ma zĩ mà gↄ̃nzĩdanɛ kpàkpa kɛ gbɛ̃ kũ ò ń zĩda vĩronↄnɛ, mà wɛ́wɛ̃naa kpàkpa kɛ vĩ̀nanↄnɛ, mà gbɛ̃ kũ ò yĩnanↄ poro,
19mà Dikiri gbɛ̃kɛkɛnnɛgↄrↄ kpàkpa kɛ.
20Akũ à takada pìi kòko à kpà kpanyĩriia, à vùtɛ. Gbɛ̃ kũ ò kú kpɛ́ gũnnↄ wɛ́ fĩa ń pínki.
21Akũ à nà yã'onnɛnaaa à pì: Luda yã dí pàpa gbãra lákũ átɛn ma nà.
22Yã mana kũ à da a lɛ́n bò ń sarɛ ń pínki, òtɛni a tↄ́ nna sí ò pì: Yusufu nɛ́n díroo?
23Akũ à pìńnɛ: Má dↄ̃ sãnsãn kũ áni yáasi dí zumɛnɛ. Tó mↄkↄ̃mmɛ likita ũ, ǹ n zĩda were. Áni omɛnɛ mà yã kũ a mà ma kɛ̀ zaa Kapɛnamu kɛ ma bɛ wɛ̃tɛ gũn la dↄ.
24Yãpuran matɛn oárɛ, annabii dìgↄ̃ bɛ̀ɛrɛ vĩ a bɛ wɛ̃tɛ gũnlo.
25Matɛn oárɛ yãpura, kũ ludambɛ zɛ́ tà Iliasu gↄrↄ, gyaanↄnↄn dasi. Legũ dí maro ari wɛ̃̀ aakↄ̃ kũ mↄ suddoo, akũ nà zↄ̃kↄ̃ↄ gɛ̃̀ Isarailanↄ bùsun pínki,
26ama Luda dí Iliasu zĩ ń gbɛ̃kearo, sé gyaanↄ kũ à kú Zarɛfa, Sidↄ̃ sarɛ.
27Annabi Ɛlisa gↄrↄ sↄ̃, Isarailanↄ bùsun kusunↄn dimmɛ, ama adi ń gbɛ̃ke werekↄ̃aro, sé Siria bùsu gbɛ̃ Naama.
28Kũ gbɛ̃ kũ ò kú aduakɛkpɛ gũnnↄ yã pìi mà, ń pↄ fɛ̃̀ manamana ń pínki.
29Akũ ò bò kũ Yesuo wɛ̃tɛ kpɛ, ò gɛ̀ɛ kãao sĩ̀sĩ kũ ń wɛ̃tɛ kátɛa mìsↄ̃ntɛa, de ò ↄ sↄ̃i à lɛ́tɛ à sín yãi.
30Akũ à bò ń tɛ́ à tà.
31Yesu tà Kapɛnamu, Galili bùsun, akũ àtɛn yã dańnɛ kámmabogↄrↄ zĩ.
32A yãdannɛnaa bò ń sarɛ, zaakũ a yã iko vĩ.
33Gↄ̃gbɛ̃ tãnade ke kú aduakɛkpɛn gwe, akũ à wiki gbãna lɛ̀ à pì:
34É'e! Bↄ́n ó vĩ kↄ̃ ↄĩii, Yesu Nazɛra? N su ǹ ó kakatɛn yá? Má dↄ̃ gbɛ̃ kũ ń de a ũ, mↄkↄ̃mmɛ Luda gbɛ̃ kũ à kú adona ũ.
35Akũ Yesu gì tãna pìinɛ à pì: Ǹ yĩtɛ! Ǹ go gↄ̃gbɛ̃ pìia. Akũ tãna pì gↄ̃gbɛ̃ pìi pã̀tɛ gbɛ̃nↄ tɛ́, à gòa, adi a kĩnnaro.
36Gbɛ̃nↄ bídi kɛ̀ ń pínki, òtɛn kↄ̃ lala: Bↄ́ taka buri yãn gwee? Àdi yã ditɛ tãnanↄnɛ kũ iko gbãnao, akũ òdi goḿma.
37Akũ a tↄ́ dà bùsuu pìla pínki.
38Kũ à bò aduakɛkpɛn, akũ à tà Simↄ bɛa. Simↄ nanↄ da tɛn mɛ̀wãna kɛ manamana, akũ ò a yã ònɛ.
39Yesu zɛ̀ala à gì mɛ̀wãna pìinɛ, akũ a mɛ̀ɛ kɛ̀ sã̀na. Zaa gwe gↄ̃̀nↄ à fùtɛ à pↄ́ble kɛ̀ńnɛ.
40Kũ ifãntɛ̃ gɛ̃̀ kpɛ́n, gbɛ̃ kũ ò gyãre vĩnↄ sù kũńwo Yesunɛ, akũ à ↄ nàna ń baadia, à ń werekↄ̃a kũ ń gyã buri sĩnda pínkio.
41Tãnanↄ sↄ̃ òtɛn bo gbɛ̃nↄ gũn kũ wikio dasi ò pì: Mↄkↄ̃mmɛ Luda Nɛ́ ũ. Ama àdi gíńnɛ ò yã o, kũ ò a dↄ̃̀ Arumasihu ũ yãi.
42Gukɛ̃kↄ̃ana Yesu bò wɛ̃tɛ gũn, à gɛ̀ɛ gusarɛ, akũ gbɛ̃nↄ tɛni a wɛtɛ. Kũ ò bòa, ò ye à ń tóro.
43Akũ à pìńnɛ: Sé mà kpata kũ à bò Luda kĩnaa baaru kpá wɛ̃tɛ kparanↄnɛ dↄ, zaakũ abire yãin Luda ma zĩ.
44Akũ à gɛ̀ɛ àtɛn waazi kɛ Yudea bùsu aduakɛkpɛnↄ gũn.
