1Gↄrↄ kũ̀a Siza Ogↄsutu bò kũ yão, à pì ò a bùsu gbɛ̃nↄ naro ń pínki.
2Narona káaku kũ ò kɛ̀n gwe gↄrↄ kũ Kiriniu de Siria bùsu gbɛ̃ zↄ̃kↄ̃ ũ.
3Gbɛ̃ sĩnda pínki gɛ̀ɛ a bɛ wɛ̃tɛn, de ò a tↄ́ da takadan.
4Yusufu sↄ̃, à bò Nazɛra, Galili bùsun, à gɛ̀ɛ Dauda bɛ lakutu Bɛtilihamu, Yudea bùsun, kũ à de Dauda buri ũ yãi.
5À gɛ̀ɛ de ò a tↄ́ da takadan gwe kũ a nↄkpamma Mariama kũ à nↄ̀sinaao,
6akũ gↄrↄ kũ ò kú gwe, a nɛ́'igↄrↄ kà,
7akũ à a nɛ́ dauduu ì. À biza fĩ̀fĩa, à a wùtɛ pↄ́kãdenↄ pↄ́blebↄn, kũ odi gu le nibↄnↄ kipakiaro yãi.
8Sãdãrinↄn kú bùsu dokↄ̃nↄ pìi gũn, òtɛn i sɛ̃̀ntɛ, òtɛni ń sãnↄ dãkpã gwãani.
9Akũ Dikiri malaikaa bò à sùḿma, Dikiri gakuri gupura kũ̀ à lìkańyĩ, akũ vĩna ń kũ manamana.
10Malaikaa pìi òńnɛ: Ásun tó vĩna á kũro, zaakũ ma su mà baaru nna kpáárɛmɛ, gbɛ̃ sĩnda pínki pↄ ni kɛ nna manamana.
11Ò Surabarii ìárɛ Dauda wɛ̃tɛn gwãaniala, àkũmɛ Arumasihu ũ Dikiri ũ.
12Sèeda kũ ani tó à a dↄ̃n dí: Áni nɛ́kpãntɛ̃ e wútɛna pↄ́kãdenↄ pↄ́blebↄↄ gũn, biza fĩfĩa.
13Kãnto ludambɛ gbɛ̃nↄn kú lɛɛlɛ kũ malaika pìio dasidasi, òtɛn Luda sáabu kpá ò pì:
14Ò Luda tↄ́ sɛ́ lei zaa musu, gbɛ̃ kũ ń yã kɛ̀nɛ nnanↄ aafia le zĩtɛ.
15Kũ malaikaa pìnↄ gòńla ò tà ludambɛ, akũ sãdãrinↄ òkↄ̃nɛ ò pì: Ò gɛ́ Bɛtilihamu, de ò yã kũ à kɛ̀ɛ pì e, yã kũ Dikiri tò o dↄ̃̀.
16Akũ ò fùtɛ ò gɛ̀ɛ likalika, ò bò Mariama kũ Yusufuooa kũ nɛ́kpãntɛ̃ pìio wútɛna pↄ́kãdenↄ pↄ́blebↄↄ gũn.
17Kũ ò a è, ò yã kũ ò òńnɛ nɛ́ pì musu ò.
18Akũ yã kũ sãdãrinↄ òo pìi bò gbɛ̃ kũ ò mànↄ sarɛ ń pínki.
19Mariama yã pì kũna a nɛ̀sɛɛ gũn pínki, àtɛn laasun lɛ́a.
20Sãdãrinↄ ɛ̀ra ò tà, òtɛn Luda tↄ́ bo, òtɛni a sáabu kpá yã kũ ò mà akũ ò è yãi, zaakũ à kɛ̀ lákũ ò òńnɛ nà.
21A gↄrↄ sↄraakↄ̃de zĩ nɛ́ tↄ̃̀zↄ̃gↄrↄ kà, akũ ò tↄ́ kpànɛ Yesu, tↄ́ kũ malaikaa ò zaade odi a nↄ̀ síro.
22Kũ ń gbã̀bogↄrↄ kà, ò a sɛ̀ ò gɛ̀ɛ à mↄ Dikirinɛ Yurusalɛmu lákũ Musa doka ò nà.
23Zaakũ à kú Dikiri doka takadan ò pì, ò daudunↄ kpá Dikiria.
24Ò sa'opↄ kũ ò dìtɛ Dikiri doka takadan kpà, ò pì potɛ̃nɛ mɛ̀n pla ke lukulukunɛ bↄ̀rↄ mɛ̀n pla.
25Gbɛ̃ke kú Yurusalɛmu, a tↄ́n Simɛↄ. Gbɛ̃ manamɛ, à Luda vĩna vĩ, à wɛ́ dↄ Isarailanↄ surabanaai. Luda Nini kúa,
26akũ à pìnɛ ani ga Dikiri gbɛ̃ kũ òdi pi Arumasihu enaa sariro.
27Luda Nini dònɛ arɛ, akũ à gɛ̃̀ Luda ↄnn. Kũ Mariama kũ Yusufuo sù kũ ń nɛ́ Yesuo yã kũ ò dìtɛ doka takadan kɛna yãi,
28akũ Simɛↄ a sì a ↄĩ, à Luda sáabu kpà à pì:
29Ǹ makũ n zↄ̀bleri gbarɛ aafiaa gũn sà lákũ n òmɛnɛ nà Dikiri,
30zaakũ ma wɛ́ kɛ̀ pla kũ Surabari kũ n dìtɛo,
31kũ n a yã kɛ̀kɛ buri sĩnda pínki wára.
32Anigↄ̃ de gupura ũ de à gupura kũ buri pãndenↄnɛ, à n gbɛ̃ Isarailanↄ tↄ́ bo.
33Yã kũ à ò nɛ́ pìi musu bò a de kũ a daoo sarɛ.
34Simɛↄ sa mana òńnɛ, akũ à ò nɛ́ pì da Mariamanɛ à pì: Àkũ mɛ́ anigↄ̃ de sèeda kũ Isarailanↄ ni gíi ũ, pↄsira ni n swɛ̃̀ zↄ̃ lán fɛ̃nɛda bà. Isaraila kenↄ ni kakatɛ ń kenↄ ni bo aafia a gãi, ń nɛ̀sɛɛ gũn yã ni bo gupuraa.
36Nↄgbɛ̃ annabi ke kú gwe, a tↄ́n Ana, Fanuɛli nɛ́, Asa burimɛ. Nↄgbɛ̃ pì zĩ kũ̀ yúkuyuku. À zã kɛ̀ kũ a gↄ̃kpammao wɛ̃̀ supplamɛ,
37akũ à gↄ̃̀ gyaanↄ ũ ari wɛ̃̀ basiikↄ̃ awɛɛsiikↄ̃. Àdi bo Luda ↄnnlo, àdigↄ̃ do Ludai fãnantɛ̃ kũ gwãanio kũ lɛ́yĩnaao kũ aduakɛnaao.
38Zĩ birea gↄ̃̀nↄ à nàńyĩ, à Luda sáabu kpà, àtɛn nɛ́ pì yã o gbɛ̃ kũ ń wɛ́ dↄ Yurusalɛmu bonaainↄnɛ ń pínki.
39Kũ Yusufu kũ Mariamao kɛ̀ lákũ à kú Dikiri doka takadan nà pínki ò làka, ò ɛ̀ra ò tà ń bɛ wɛ̃tɛa Nazɛra, Galili bùsun.
40Nɛ́ pìi fùtɛ à gbãna kũ̀. Ɔ̃ndↄ̃ mↄ̀a, àdigↄ̃ kú kũ Luda arubarikaao.
41Wɛ̃̀ kũ wɛ̃̀ɛo Yesu de kũ a dao dì gɛ́ Vĩnla dikpɛ kɛ Yurusalɛmumɛ.
42Kũ Yesu kà wɛ̃̀ kuri awɛɛpla, ò ɛ̀ra ò gɛ̀ɛ dikpɛ kɛ lákũ òdi kɛ nà.
43Kũ dikpɛ làka, òtɛn tá, akũ ń nɛ́ Yesu gↄ̃̀ Yurusalɛmu, ò a yã dↄ̃ro.
44Òtɛn da à kú ń gbɛ̃nↄ tɛ́mɛ. Kũ ò táa ò gↄrↄ do, akũ òtɛni a wɛtɛ ń danɛnↄ kũ ń gbɛ̃ dↄ̃nanↄ tɛ́.
45Kũ odi a ero, ò ɛ̀ra ò gɛ̀ɛ a wɛtɛ Yurusalɛmu.
46A gↄrↄ aakↄ̃de zĩ ò a è Luda ↄnn vutɛna yãdannɛrinↄ tɛ́, àtɛn sã kpá ń yãa, àtɛn yã lalaḿma.
47A yã dↄ̃na kũ a yãwemmanaao bò gbɛ̃ kũ òtɛni a yã manↄ sarɛ ń pínki.
48Kũ a de kũ a dao a è, à bò ń sarɛ, akũ a da pìnɛ: Bↄ́yãi n kɛ̀wɛrɛ lɛɛ? N de kũ makũo, ó bídi kɛ̀ n wɛtɛna yãi.
49À wèḿma à pì: À kɛ̀ dera átɛni ń wɛtɛɛ? Á dↄ̃ kũ à kũ̀ mà a De bↄkↄtɛ kɛnloo?
50Ama odi yã kũ à òńnɛ pìi dↄ̀rↄ dↄ̃ro.
51Yesu ɛ̀ra à tà kũńwo Nazɛra, à ń yã mà. A da yã pìnↄ kũna a nɛ̀sɛɛ gũn pínki.
52Yesu zↄ̃kↄ̃ kũ̀, a ↄ̃ndↄ̃ kàra, à nna kũ Ludao kũ bisãsirinↄ.
