1Zĩkea Yesu tɛn yã da gbɛ̃nↄnɛ Luda ↄnn, àtɛn baaru nna kpáńnɛ, akũ sa'orikinↄ kũ ludayãdannɛrinↄ kũ gbɛ̃ zↄ̃kↄ̃nↄ sù
2ò pìnɛ: Ǹ owɛrɛ, iko kpaten ntɛn yã dínↄ kɛoo? Dí mɛ́ à n gba iko dí pìi?
3Akũ à wèḿma à pì: Makũ se mani yã gbɛkaáwa. À omɛnɛ,
4Yahaya gbɛ̃nↄ da'itɛkɛnaa bò Luda kĩnaan yáa, ke bisãsiri kĩnaamɛ?
5Akũ ò yã gↄ̃̀gↄ̃ ò pì: Tó o pì Luda kĩnaamɛ, ani ó la, bↄ́yãin ódi Yahaya yã síroo?
6Tó o pì bisãsiri kĩnaamɛ sↄ̃, gbɛ̃ sĩnda pínki ni ó pápa kũ gbɛ̀ɛo ò ó dɛdɛ, zaakũ ò Yahaya annabikɛ sì.
7Akũ ò wèa ò pì: Ó dↄ̃ gu kũ à bònlo.
8Akũ Yesu pìńnɛ: Makũ se mani iko kũ matɛn yã dínↄ kɛo oárɛro.
9Akũ Yesu ɛ̀ra à yã lɛ̀kↄ̃ańnɛ à pì: Gbɛ̃ke mɛ́ à geepi líkpɛ bà, akũ à nà arukɛrinↄnɛ ń ↄĩ à fùtɛ kũ táo à gↄrↄ pla kɛ̀ gwe.
10Kũ geepizↄ̃gↄrↄ kà, akũ à a zĩ̀ri ke zĩ̀ arukɛrii pìnↄa, de ò a geepi nɛ́ pì kpáa, akũ arukɛrii pìnↄ a gbɛ̃̀, ò à gbàrɛ ↄkori.
11Akũ à ɛ̀ra à zĩ̀ri pãnde zĩ̀ dↄ, akũ ò a gbɛ̃̀ ò wé'i dàa ò a gbàrɛ ↄkori.
12Akũ à ɛ̀ra a gbɛ̃ aakↄ̃de zĩ̀ dↄ, akũ ò a kĩ̀nna ò pɛ̀a.
13Akũ burade pìi pì: Mani kɛ deramɛ sàa? Mani ma nɛ́gↄ̃gbɛ̃ mɛ̀n do yenyĩde zĩḿma. Ke oni a yã da gwɛɛ?
14Kũ arukɛrii pìnↄ a è, ò pìkↄ̃nɛ: Túbiblerin dí, ò a dɛ, a túbi ni gↄ̃wɛrɛ.
15Akũ ò bò kãao bura gũn, ò a dɛ̀. Tↄ̀! Bↄ́n burade pì ni kɛ kũńwoo?
16Ani su à arukɛrii pìnↄ dɛdɛ à bura pì na gbɛ̃ pãndenↄnɛ ń ↄĩ. Kũ gbɛ̃nↄ yã pìi mà ò pì: Òsun ero!
17Akũ Yesu ń gwá tíii à pì: Yã kũ ò kɛ̃̀ Luda yãn díkĩna de deraa? Gbɛ̀ kũ kpɛ́borinↄ pã kpài mɛ́ à gↄ̃̀ kpɛ́ kusuru gbɛ̀ mìde ũ.
18Gbɛ̃ kũ à lɛ̀tɛ gbɛ̀ɛ pìia ni wíwimɛ. Tó gbɛ̀ɛ pìi lɛ̀tɛ à sì gbɛ̃a sↄ̃, ani a ú lↄ́mɛ.
19Ludayãdannɛrinↄ kũ sa'orikinↄ dↄ̃̀ kũ ń yãin à yãlɛkↄ̃anaa pìi ò, akũ ò zɛ́ wɛ̀tɛ ò a kũ gↄ̃̀nↄ, ama ò vĩna kɛ̀ gbɛ̃nↄnɛ.
20Òtɛni a kpákpa, akũ ò zãmbade kũ òtɛni ń zĩda ditɛ gbɛ̃ mana ũnↄ zĩ̀a, de ò le ò a kũ a yã'onaa gũn, ò a kpá ń bùsu gbãnadea à gbãna mↄnɛ.
21Akũ zãmbade pìnↄ a là ò pì: Dannɛri, ó dↄ̃ kũ ndì yã o ǹ yã dańnɛ a zɛ́a, ndì gbɛ̃ wɛ́ gwao, ndì Luda zɛ́ dańnɛ kũ yãpurao.
22À zɛ́ vĩ ò bɛ'ↄgↄ kpá Sizaa yá ke òsun kpáaro?
23Yesu ń manafikikɛ dↄ̃̀ḿma, akũ à pìńnɛ:
24À ↄgↄ pì do mↄmɛnɛ mà gwa. Dí mì wãnzãn dí kũ a tↄ́oo? Ò wèa ò pì: Siza pↄ́mɛ.
25Akũ à pìńnɛ: Tↄ̀, à pↄ́ kũ à de Siza pↄ́ ũ kpá Sizaa, à pↄ́ kũ à de Luda pↄ́ ũ kpá Ludaa.
26Akũ ò fùa ò a kũ a yã'onaa gũn gbɛ̃nↄ wára. A yãwemmanaa bò ń sarɛ, akũ ò ń lɛ́ nàkↄ̃a.
27Akũ Sadusi kũ òdi pi gɛ̀nↄ dì vuronↄ sù Yesu kĩnaa, ò a gbɛ̀ka
28ò pì: Dannɛri, Musa òwɛrɛ a takada gũn à pì: Tó gbɛ̃ gà à a nanↄ tò nɛ́'isari, a dakũna gyaanↄ pì sɛ́ de à le à nɛ́ buri dato a vĩ̀ninɛ.
29Lɛmɛ dedokↄ̃nↄnↄn kun gbɛ̃nↄn suppla. Woru nↄ sɛ̀, akũ à gà nɛ́'isari.
30Akũ Sabi nↄ pìi sɛ̀ dↄ.
31Sabi gbɛra Biↄ sɛ̀ dↄ. Ò kɛ̀ lɛ ń gbɛ̃nↄn suppla ń pínki, ò gàga nɛ́'isari.
32Ń pínki gbɛran nↄ pìi gà se.
33Tↄ̀! Gɛ̀nↄ vuna gↄrↄ zĩ ń dí mɛ́ anigↄ̃ nↄ pì vĩi? Zaakũ ń gbɛ̃nↄn suppla ń pínki ò a dↄ̃̀ nↄ ũmɛ.
34Akũ Yesu wèḿma à pì: Andunia la gbɛ̃nↄ dì nↄ sɛ́ òdi zã kɛ,
35ama gbɛ̃ kũ Luda dìtɛ kũ ò kↄ̃ sìo ò bo gan ò andunia dufu lenↄ ni nↄ sɛ́ro, oni zã kɛro.
36Onigↄ̃ kun lán malaikanↄn kun nàmɛ, oni ga doro. Onigↄ̃ de Luda nɛ́nↄ ũmɛ, gàavunↄ ũ.
37Bee Musa à gɛ̀nↄ vuna yã bìriańnɛ, gu kũ à tariankpã yã òn à pì, Dikirimɛ Ibrahĩ kũ Isaakuo kũ Yakubuo Luda ũ.
38Dikiri dì kɛ gɛ̀nↄ Luda ũro, gbɛ̃ bɛ̃nɛnↄ Ludamɛ, zaakũ gbɛ̃ sĩnda pínki bɛ̃nɛ Ludanɛ.
39Akũ ludayãdannɛri kenↄ fùtɛ ò yã ò ò pì: Dannɛri, n yã mana ò.
40Akũ odi sù ò yãke làa doro.
41Yesu ń lá à pì: À kɛ̀ dera òdi pi Dauda burin Arumasihu ũu?
42Zaakũ Dauda pì Zabura takada gũn: Dikiri pì ma dikirinɛ à vutɛ a ↄplai
43ari àgↄ̃ a ibɛrɛnↄ kɛnɛ tìntin ũ.
44Kũ Dauda a sìsi Dikiri, à kɛ̀ dera anigↄ̃ de a buri ũ dↄↄ?
45Kũ gbɛ̃ sĩnda pínki tɛni a yã ma, akũ à pì a ìbanↄnɛ:
46À laakari kɛ ludayãdannɛrinↄi. Òdigↄ̃ ye ògↄ̃ kure kũ uta zↄ̃kↄ̃nↄo dana, de ògↄ̃ fↄ kpákpaḿma ɛtɛnↄa. Òdigↄ̃ ye ò vutɛ aduakɛkpɛ vutɛki mananↄn kũ pↄnna pↄ́ble vutɛki mananↄo.
47Òdi adua gbã̀na kɛ de gbɛ̃nↄ ń e yãi, akũ òdi gyaanↄnↄ kpɛ́ síḿma. Ń wɛ́tãmmana nigↄ̃ pãsĩ de gbɛ̃ sĩnda pínki pↄ́la.
