Luke 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Keke rane si mae koe Zisu sari na tie hata takisi, meke sari kaiqa tie kaleadi pule, pude avavoso dia koa Sa, gua.

²Meke qumiqumi nia rina tie va tumatumae koasa Tinarae te Mosese meke na Parese si Asa, meke zama guahe si arini, “Sa tie hie si va tata i Sa sari na tie kaleadi, meke henahena turaṉi tugo Sa si arini,” gua si arini.

³Ke tozini Zisu sa parabolo hie koarini:

⁴“Be keke koa gamu si tagoi keke gogoto nana sipi d, meke keke ri nana sipi hire si muliuṉu, si nasa si kote tavetia sa? Kote veko paki sa sari ka sia ṉavulu sia sipi pa vasina koadi, meke la hata ia sa si asa sapu muliuṉu, osolae dogoro pulea tu sa.

⁵Pana dogoria tugo sa, si qetu hola nana, ke kokovara palekia sa pa avarana.

⁶Meke paleke pule la nia sa vasina koadi sari na sipi. Beto asa si tioko varigara ni sa sari nana baere na turaṉana, meke zama, ‘Mi mae somana qetuqetu turaṉau sina ele dogoro pulea rau sa qua sipi sapu muliuṉu,’ gua si asa.

⁷Tozini gamu Rau, sapu gua putaputa tugo asa sa qinetuqetu tadi pa Maṉauru pana keke tie kaleana si kekere pule mae, hola ni sari ka sia ṉavulu sia tie leadi saripu lopu kilu kekere si arini, gua.

⁸Meke gua pule he: Be keke barikaleqe si ka manege puta nana poata siliva, meke va muliuṉia sa si keke, si nasa si kote tavetia sa? Kote va katua sa sa zuke, meke sara hata valeania sa si asa pa korapana sa vetu, osolae kaqu vagia tu sa si asa.

⁹Meke totoso dogoria tugo sa, si tioko varigara ni sa sari nana baere na turaṉana, meke zama, ‘Mae gamu, mada qetuqetu! Sina ele dogoro pulea rau sa qua poata sapu va muliuṉia rau,’ kote gua.

¹⁰Tozi va hinokarani gamu Rau, sapu gua putaputa tugo asa, sa qinetuqetu tadi na mateana te Tamasa koa keke tie kaleana sapu kekere pule mae,” gua se Zisu.

¹¹Meke tozia pule Sa si keke parabolo, “Koa nana si keke tie sapu karua tuna koreo.

¹²Meke zama sa tuna koreo mudina koasa tamana, ‘Tamaqu, poni nau kamahire sa qua hinia koari na mua tinago,’ gua si asa. Ke hopeke paqaha poni sa tamadia koari karua tuna koreo sari nana likakalae.

¹³Meke hola ka visavisa rane, si holuholu ni mo sa koreo mudina sari doduru nana likakalae, meke vagi sa sari na poatadi, meke topue taloa nana pa keke popoa pa seu. Vasina la va murimuri pani sa sari doduru nana poata koari na maqota meke na hahanana kaleanadi.

¹⁴Meke sipu ele va murimuri beto ni sa sari doduru pu tagoi sa, si kamo pa popoa sana si keke soṉe nomana, ke ovia si asa.

¹⁵Ke la tepa tinavete si asa koa keke tie pa popoa sana, meke garunia sa tie si asa pude la kopu ni sari nana boko.

¹⁶Okoro hiva henai sa sari na ginani tana boko, ba loke tie ponia.

¹⁷Meke totoso gilae pule sari nana binalabala, si va pulepaho si asa meke zama, ‘Kei, sari doduru nabulu tanisa tamaqu si hoke soku gedi ginani, ba hie si rau korapa mate mo pa inovia.

¹⁸Maqu topue pule la mo koasa tamaqu, maqu la helahelae guahe: Tamaqu, ele va sea si rau koe Tamasa meke koa goi.

¹⁹Ele lopu garoqu pude ta pozae na tumu si rau, ba mamu guni nau mo na mua tie tavetavete,’ gua si asa.

²⁰Ke gasa turu si asa, meke taluarae pule la koasa tamana. Meke sipu lopu ele tata kamo la sa pa vetu, si dogoria sa tamana si asa, meke tataru sisigiti nia sa, ke haqala la ṉazaia na ahoa sa sa tuna.

²¹Meke zama la koasa tamana sa tuna, ‘Tamaqu, ele va sea si rau koe Tamasa meke koa goi. Lopu garoqu pude ta pozae na tumu si rau,’ gua si asa.

²²Ba zama la koari nana nabulu sa tamana, ‘Tuture paleke mae sa poko sapu tolavaena koari doduru, mamu va sage nia. Mamu va sage nia riṉi tugo sa kakarutu limana, meke va sage ni sadolo nenena.

²³Vagia sa tuna bulumakao nobonobokona, mamu va matea, mada henahena qetuqetu!

²⁴Ura ele mate sa tuqu hie, ba toa pule; ele muliuṉu si asa, ba ta dogoro pule kamahire,’ gua si asa. Ke podalae nia rini sa inevaṉa qetuqetu.

²⁵Pa totoso asa si korapa koa pa inuma sa tuna koreo kenuna. Meke sipu pule mae sa, meke tata kamo pa vetu si avosia sa sa mike na peka.

²⁶Ke tiokia sa si keke rina nabulu, meke nanasia sa, ‘Na sa si korapa ta evaṉa hoi?’ gua si asa.

²⁷Meke olaṉa sa nabulu, ‘Sa tasimu si ele pule mae, ke va matea sa Tamamu sa tuna bulumakao nobonobokona, meke inevaṉa qetuqetu, sina kamo pule valeana si asa,’ gunia sa.

²⁸Meke bugoro hola sa koreo kenuna, meke korona nuquru la pa vetu, ke vura la sa tamana, meke va mamania pude nuquru.

²⁹Ba olaṉa la si asa koasa tamana, ‘Tamaqu, ele soku vuaheni si mabo mate si arau tavetavete poni igo, gua tugo na mua pinausu, meke lopu hite sekei rau sari na mua tinarae. Ba sa si hite poni nau goi? Namu loketoṉa hokara, kekeke qoti mo pude inevaṉa turaṉi sari na qua baere, ba lokari tugo!

³⁰Ba sa tumu sana sapu va murimuri pani beto ni sari mua likakalae koari na maqota, ba kamahire pule mae sa, meke va mate ponia tuna bulumakao nobonobokona tu goi!’ gua si asa.

³¹Meke olaṉa sa tamana, ‘Tuqu, agoi si koamu mo koa rau doduru totoso, meke sari doduru gua pu tagoi rau si tamugoi mo.

³²Ba leana hola tugo pude inevaṉa qetuqetu si gita, sina sa tasimu hie si ele mate tu, ba toa pule; ele muliuṉu tu, ba ele ta dogoro pule!’ gua si asa,” gua se Zisu.