1Faiꞌ fo Yesus nanori-nafada nai Uma Mamaso Ina a, Ana nita lahenda kamasuꞌi ara mai tuꞌu doi kolete leo peti doiꞌ daleꞌ neu.
2Ana nita ina-falu hata taꞌ esa, tuka mai hule-haradoi boe. Ana tuꞌu doiꞌ sen dua leo peti ria daleꞌ neu. Doiꞌ sira beli nara baianaꞌ.
3Basa boe ma Yesus dedea no ana mana tuka dea nara nae, “Nenene matalolole! Ina-falu hata taꞌ ia tuꞌu noi doiꞌ sen duaꞌ a, tehuu ana fee desi lena heni basa lahenda ra.
4Lahenda fekeꞌ ara tuꞌu kolete neme sira doi lena nara mai. Tehuu ina-falu ia, ana fee nabasa doi nara katemaꞌ. Sekonaa te, ana nasoda neniꞌ doiꞌ sira.”
5Tepoꞌ ria, Yesus ana mana tuka dea nara dedea io Uma Mamaso Ina a rae, “Papa! Mete masudi Uma ia dei malole na seli! Ara tao ni pake batu mana sapiꞌ kabaꞌuina ra, basa de ratutuleꞌ raa si tama rede-rede. Ma hapu lahenda fee hata mabeli de parong neuꞌ Manetualain Uman ia!” Tehuu Yesus nataa nae,
6“Tebe uma ia malole a. Tehuu ta dooꞌ a soꞌ, te lahenda rarerefaꞌ heni batu ia ra katemaꞌ, losaꞌ natetu no dae a.”
7Basa boe ma Yesus ana mana tuka dea nara ratane rae, “Papa Mesen! Hata fo bisinaꞌ a Papa mafada a, neuꞌ ko fai hidaꞌ, dadi? Maneniko ledo-fai na naneneaꞌ, sona tanda nara leo beaꞌ?”
8Boe ma Yesus nataa nae, “Sadi emi manea matalolole fo bosoꞌ hapu eedi-fufuleꞌ a. Huu fo neuꞌ ko lahenda rupaꞌ ara mai fo fapa ara nara rae, ‘Au ia, nana Kristus.’ Ruma bali rae, ‘dae-bafoꞌ a nonoe na naneneaꞌ mamaiꞌ a so!’ Tehuu bosoꞌ mamahere!
9Maneniko emi mamanene rae, lahenda ra ratati-rapau ao ma musu a nai basa mamanaꞌ ara boe, sona bosoꞌ bii-mamatau. Tebe basa sira muste dadi raꞌuluꞌ. Tehuu dae-bafoꞌ a nonoe na bei ta losa fa.
10Neuꞌ ko leo esa natati soaꞌ leo fekeꞌ. Nusaꞌ esa natati soaꞌ nusa fekeꞌ.
11Neuꞌ ko daeinaꞌ a natakeko naan seli. Laa-roe ma hedi-raus nai basa mamanaꞌ ara. Neuꞌ ko lahenda rita hihii-nanauꞌ fo riꞌ tao na ao bulu nara rapadei ma tanda kahereꞌ ara rai lalai.
12Basa hihii-nanauꞌ ia ra bei ta dadi fa, tehuu neuꞌ ko lahenda homu ra emi ma ese-rumu emi, nana huu mamahere neuꞌ Au. Ma hela roo emi meu mataa nai malaka uma mamasoꞌ fo urus emi ma ena emi nai bui daleꞌ. Basa nana, ara roo emi meu mataa nai maneꞌ ara ma gubenor asa, nana huu emi tuka Au.
13Tehuu emi muste pake lelaꞌ ria fo mafada si Au Tutui Malole ka.
14De bosoꞌ duꞌa-afi maꞌuluꞌ mae, emi masalaꞌe tao ao-ina mara leoꞌ bea.
15Huu fo neuꞌ ko Au fee emi dedea-nafada rolu-malelaꞌ. No ria na, emi musunoo mara ta sefi emi dedea-nafadam fa.
16Neuꞌ ko lahenda dodouꞌ eteꞌao nara ro emi, huu no emi tuka Au. Ruma reme emi kileoboboki mara mai, leo-leoꞌ ina-ama, aꞌa-fadiꞌ, toranooꞌ ara, ma tia-lai ra. Neuꞌ ko neme sira mai ruma saka enoꞌ fo seꞌo heni emi, losaꞌ ara raisa emi ruma.
18Tehuu emi bosoꞌ biiꞌ, huu fo Manetualain ta nafarene heni emi fa. Laka dooꞌ esa boe ta ono henin neme emi laka mara mai, kalu Ria ta hihi-nanaun fa.
19Maneniko emi matetea-mamepe dale, tantu Manetualain fee emi sodaꞌ a.”
20Yesus dedea tamba nae, “Maneniko emi mita musu a eo na kota Yerusalem, emi bubuluꞌ mae, ana sakaꞌ nalulutuꞌ ria so.
21Lahenda Yudea ra mita leoꞌ na, sona malai leo leteꞌ a meu. Lahenda fo rai kota daleꞌ boe malai leo. Ma lahenda fo rai koroꞌ a bosoꞌ masoꞌ leo kota daleꞌ meu bali.
22Huu fo Manetualain fee fai susa-lela sira mai ela huku lahenda fo, ta nau ramanene neuꞌ Ana. Basa sira dadi laꞌe fai hata fo Manetualain mana nesi mata nara duiꞌ memaꞌ ana neme uluꞌ mai so a.
23Tepoꞌ ria te, lahenda fo kasian naan seli a, nana riꞌ ina kairus ara, ma anutu muriꞌ ara. Tepoꞌ ria te katemaꞌ dae-bafoꞌ a hapu susa, ma lahenda Yahudi ra basa si doidoso raan seli, nana huu Manetualain namanasa no si.
24Neuꞌ ko musu a naisa ruma, ma heke roo ruma, fo dadi ata leo basa mamanaꞌ nai dae-bafoꞌ ia. Boe ma lahenda mana mai fo ta nalelaꞌ Manetualain, mai momolo-tatabu rakekeo kota Yerusalem a, ma ara pareta kota a oe-isi na, losaꞌ sira ledo-fain ria, basa ni.”
25Boe ma Yesus nafada laꞌeneuꞌ natafali mai Na nae, “Maneniko Ana Lahenda a sakaꞌ natafali mai, hapu tanda kalua nai ledo a, bulaꞌ a, ma nai ruuꞌ ara. Nai dae-bafoꞌ a boe hapu tanda, riꞌ tasiꞌ a nahoo ma nafa-ani lua dodopo. Basa ia ra tao ra lahenda bii ma roi ramakokoaꞌ a losaꞌ ara ta bubuluꞌ rae tao ubeaꞌ soꞌ.
26Basa kuasa rai lalai ratakeko taohiro-taohari. Lahenda ra rita leoꞌ na, boe ma ara bii mamateꞌ, huu fo dae-bafoꞌ a sakaꞌ soe!
27Basa ria, besaꞌ ko lahenda rita Au, ‘Ana Lahenda, onda mai o oaꞌ a’. Au onda o basa kuasa ma marela-masaꞌak.
28Maneniko basa tanda ia ra sakaꞌ dadi, sona emi botiꞌ laka mara leo, huu fo losa Manetualain ledo-fain fo nau poꞌi-tata na emi.”
29Basa ria boe ma Yesus tui nasasamaꞌ esa nae, “Emi bebesa matalolole ai huuꞌ ara.
30Maneniko doo nara mulai mofa, ria dadi tanda nae, fai fanduꞌ a mamai na naneneaꞌ so.
31Leoꞌ na boe fai susa sira. Maneniko ara toda mai, ria dadi tanda nae, Manetualain pareta na mamai na naneneaꞌ so.
32Au afada memaꞌ! Neme basa lahenda fo rasoda nai besaꞌ ia, neuꞌ ko ruma bei ta mate fa, te fai susa sira toda mai so.
33Leo mae lalai no dae-bafoꞌ a sapu-lolo, tehuu Au Hara-dasik ta mei-mesa.”
34Basa boe ma Yesus dedea naroo nae, “Manea, huu fo kekeneu te Au toda mai so! Bosoꞌ losa emi ta afi no matetuꞌ soꞌ, basa boe ma masoda nai nininu mafuꞌ a daleꞌ, ma masaliu saka noi lole-napu dae-bafoꞌ a. Boso losa emi ta mala tanda na, huu no masapute malisu fekeꞌ a.
35Maneniko Au atafali mai, ta hapu lahenda esa bisa nafuni nala ao na neme Au mata ka mai boeꞌ.
36De, manea maroo. Hule-haradoi bosoꞌ namaetun, ela emi bisa manenete nai basa susa sira talada. No ria na, maneniko Au atafali mai, sona emi ta maeꞌ mapadei nai Ana Lahenda mata na.”
37Tuka-tuka faiꞌ Yesus neu nanori-nafada nai Uma Mamaso Ina a. Tehuu maneniko hatuꞌ, sona Ana kalua neme Yerusalem mai, fo neu suku nai koroꞌ manai lete Saitun a.
38Bei balahaa anaꞌ, te lahenda dodouꞌ mai rabua so, fo nau ramanene Ni nanori-nafada nai Uma Mamaso Ina a.
