1Mada ꞌahogano Iesu'a Galilea duꞌura ḡenaḡano edauꞌenaꞌa, Badiꞌa ḡoere haraminu. Ebu vaze ḡuḡuvaḡaꞌe ani haramo abitoga veize bibitite onamiro.
2Iesuꞌa duꞌura ḡenaḡano ḡasi ꞌaheu horoniro, u ḡasi azaḡaꞌe buanadu re'evaze vuzuꞌe radiunu.
3Iesu'a Simona ḡasio tiradu niro, raena'a, “Tahiḡa duine buno'i!” Ebu Iesuꞌe ḡasi zamaḡano ehoradu vaze ḡuḡuvaḡa haramo ziniro.
4Ani harame hauḡirotene, Simona niro. “Hoeꞌa mone onamoꞌi, ebu reꞌeva feunadu ḡozone reꞌevanoꞌi!”
5Simonaꞌa naenaeniro, raenaꞌa, “Eme ohere faḡa gau boro haḡaeꞌenaꞌa reꞌeva rehano, mene maneha. Rehano e ḡa ḡoere mae ḡihinadu reꞌeva feuniꞌuma.”
6Ebu zeꞌa reꞌeva feunirotene, reꞌeva zamaḡanoꞌe ḡozone ḡehaḡaniꞌa oḡanadu reꞌevaꞌe zigaro.
7Eꞌanoꞌo danazoga veize ḡasi ꞌahoḡano nabudize huze zaveziro. Ebu ze aradu ḡasi ꞌaheuꞌe ḡozone hina irivaꞌonadu ariga zuburiro.
8Simona zu ane teite radiroteꞌe azaḡa niduꞌa ḡozone ḡehaḡa eꞌe horonirotene, ze zaguzagau rudaro. Zebedi ubuga ꞌaheu nize Iakobo zu Ioaneꞌe Petero teite gauinu, eꞌanoꞌo zeḡe zuni zaguzagaro. Ebu Simona, niḡa ꞌahogaꞌe Petero, aniꞌa haḡai ꞌuguḡa horonadu Iesu oda babaḡano higau bauriro. Ebu raenaꞌa, “Zuhiꞌa Boro! E'e sauꞌa vazeḡa, eꞌanoꞌo eḡe mazaonoꞌo vaḡinoꞌi!” Iesuꞌa naenaeniro. “Ago rihanoꞌi! Izidionoꞌo onamo mada nidua ḡaꞌe vaze reꞌevaziꞌuma.”
11Ebu ze hebeti onaadu ḡauze niduꞌa modadu ane hegote onamiro.
12Iesuꞌe neḡa 'ahogano radiroteꞌe zamaḡano, lefera vaze 'ahoganiꞌa ane vaḡe onairo. Ani'a Iesu horonadu ane zamao rahao ḡuḡuriro, ebu uminiro, raena'a, “Zuhiꞌa Boro, ḡa uratoꞌidene, faihoꞌi!”
13Ebu Iesuꞌa ꞌevoꞌa einadu vaze eꞌe oboniro, ebu raenaꞌa, “E urateꞌohe. Ḡae manoroꞌi!” ꞌOugadu lefara eꞌeꞌa zogone dauḡiro.
14Ebu Iesuꞌa ḡoere riḡa hina niro, raenaꞌa, “Naginiꞌa ḡae mazao fureranataꞌaꞌe vaze ꞌahoga ago noꞌi! Rehano Badiꞌa dibuꞌo hauꞌeteꞌe vazeḡa vaḡe onamadu ahiriḡo ihonoꞌi! Ebu leferaonoꞌo manoreha rouga veize, Moseꞌa reiroteꞌe dibuꞌoḡa Badiꞌa hanoꞌi! ꞌOugine vazeꞌa ḡa ꞌai manore huneha rae ederiꞌuma.”
15Rehano Iesu hariꞌe ḡarihe bororu onamiro. Ebu vaze ḡuḡuvaḡaniꞌa Iesu ḡoere abitoga zu ugizeꞌa manoroga radu ane vaḡe onairo.
16Rehano mada rae rae Iesu ane daꞌo vazeḡa oꞌoꞌa habaꞌa onamadu eꞌea kuraudo.
17Mada ꞌahogano Iesuꞌa harameꞌeteꞌe zamaḡano, Farisea azaḡa zu Mose goro ḡoeꞌa ihozeꞌeteꞌe azaḡaniꞌa Iesu uhiḡano ehore radiunu. Zeꞌe Galilea habaꞌa zu Iudea habaꞌano neḡa ꞌahoga ꞌahogaꞌonoꞌo ebu Ierusalema habaꞌaonoꞌo onairo. Ebu Zuhiꞌa Boro gigiꞌa inaraḡaꞌe Iesuꞌa vaze faizoga veize ane rana reiro.
18Eꞌe madaḡano vaze nuꞌe ahiꞌa mene haganeꞌeteꞌe vazeḡa farata hina herate onamadu Iesu zamao bazune tihi reiro.
19Rehano zeꞌa vaze ḡuḡuvaḡa ꞌahine, ibihetaonoꞌo odohe diuoga mene idararo. Eꞌanoꞌo ze binu hitaga itadu binu mae bohaniro. Ebu vaze ḡuḡuvaḡa boꞌaḡano farata mini hina ovoe dabanadu Iesu zamao bazune tiro.
20Zeꞌa Iesu mazao fieꞌeteꞌe Iesuꞌa horonirotene, ani raenaꞌa, “Vazehe, ḡa sauꞌa ꞌai rae modeha!”
21Farisea azaḡa zu Mose goro ḡoeꞌa ihozeꞌeteꞌe azaḡaꞌe zeḡeꞌa bare zamariro, raenaꞌa, “Aniꞌe nagi vazeḡa? Nougadu Badiꞌa sausaune ḡoereꞌohe? Badiꞌaꞌa daꞌo vaze sauꞌa rae modeꞌohe!”
22Iesu ani zeḡeꞌa nouge rae zamarirota ꞌai ederadu naenaeziro, raenaꞌa, “Za nougadu eḡe ḡoere ꞌadi zamareꞌohe?
23Ani mazao nougenouge nine, ḡoeꞌaꞌe ufiḡa? 'Ḡae sauꞌa ꞌai rae modeha' rae niꞌeteꞌe ga 'Iḡunadu onamoꞌi' rae niꞌeteꞌe?
24Rehano e ani manoniꞌuma ebu ani sauꞌa zu rae modiꞌuma, mazaḡa eḡe, Vaze Ubuḡaꞌe raha ꞌadao vaze sauꞌa rae modeꞌeteꞌe gigiꞌaḡa meiroteꞌe zuni za ihoziꞌuma.” Ebu Iesuꞌa ahiꞌa mene haganeꞌeteꞌe vazeḡa eꞌe ninaꞌa, “Eḡeꞌa ḡaꞌohe. Iḡunoꞌi ebu farataḡo odohadu neḡo onamoꞌi!”
25Ebu vaze eꞌeꞌa zogone zeḡe zamabeꞌanoꞌo iḡune edanadu farataḡa meiro ebu Badiꞌa ni mae ḡihineꞌenaꞌa neḡa onamiro.
26Vaze niduꞌaꞌe zaguzaganadu rihau radaro. Ebu Badiꞌa ḡihiniro, raenaꞌa, “Eme izidi haḡai nu badeḡa horoneha!”
27Eꞌe enogano Iesuꞌe haba eꞌe mode iḡunirotene takesi vazeḡa ꞌahoga, niḡaꞌe Levi horoniro. Aniꞌe takesi habaꞌano ehore radiunu. Ebu Iesuꞌa niro, raenaꞌa, “Eḡe hegotoꞌi!”
28Ebu Levi ani ḡauḡa niduꞌa modadu ani hegotiro.
29Leviꞌa ane neo Iesu veize ogomu boro haḡairo. Eꞌea takesi azaḡa ḡehaḡa zu vaze nunu zeḡe teite ogau tiburaunu.
30Rehano Farisea azaḡa zu zeḡe moneo Mose goro ḡoeꞌa ihozeꞌeteꞌe azaḡaniꞌa Iesu tahiꞌatahiꞌa mazao maḡune ḡoeriro, raenaꞌa, “Zaꞌe nougadu takesi azaḡa zu sauꞌa azaḡa teite ogau tiburuꞌohe?”
31Ebu Iesuꞌa naenaeziro, raenaꞌa, “Ugi oꞌoꞌa azaḡaꞌe gohe vazeḡa mene vaḡeꞌohe, rehano ugi azaḡaniꞌa ani vaḡeꞌohe.
32Eꞌe teige, eꞌe duduḡa rae zamareꞌeteꞌe azaḡa huzoga radu mene onairo. Rehano haḡai sauꞌa rae zamareꞌeteꞌe azaḡa huzadu zeḡe sauꞌanonoꞌo ḡihuroga veize onairo.”
33Ebu hena vaze nuꞌa Iesu niro, raenaꞌa, “Ioane bapatizo tahiꞌatahiꞌaꞌe ogomu moneo mada ḡehaḡa zaḡozaḡeꞌohe zu kurauꞌohe. Farisea azaḡa tahiꞌatahiꞌa zuni ꞌouge haḡaeꞌohe. Rehano nougadu ḡa tahiꞌatahiꞌaꞌe iḡaiḡa ogauꞌohe?”
34Ebu Iesuꞌa ziro, raenaꞌa, “Hahureꞌeteꞌe madaḡano, ohoze hahu iziganiꞌa huzeꞌeteꞌe azaḡaꞌe ane teite ogau tiburaune, ze mene zaḡozaḡiꞌuma.
35Rehano zeḡe mazaonoꞌo ohoze hahu izigaꞌe mae vaḡiniꞌuma madaḡaniꞌa onaine, zeꞌe vetuḡa ranadu zeḡeꞌa zaḡozaḡiꞌuma.”
36Ebu Iesuꞌa bare hari ꞌahoga idaniro, raenaꞌa, “Vaze ꞌahoganiꞌa dabua iziga variꞌe madu dabua amahiḡa mene baniniꞌuma. Baninine, dabua izigaꞌe mae zigi borofiꞌuma, ebu dabua izigaꞌe amahiḡa teite horone tibunoga zuni mene manoḡa reꞌuma.
37Ebu vaze ꞌahoganiꞌa vaini vuḡa baige amahiḡa zamaḡano vaini vuḡa iziga mene beꞌune ufiꞌuma. Beꞌune ufine, vaini vuḡaniꞌa baige eꞌe iriꞌavadu beꞌutiꞌuma. Ebu vaini vuḡaꞌe sore rururanadu baige amahiḡa sausauniꞌuma.
38Eꞌanoꞌo vaini vuḡa izigaꞌe, baige izigano beuꞌe ufiꞌuma.
39Rehano vaini vuḡa amahiḡa gagidoteꞌe azaḡaꞌe vaini vuḡa iziga mene urateꞌohe, mazaḡa zeꞌe raenaꞌa, “Amahiḡaꞌe ufeta manoḡa!”
