Luka 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Iesuꞌa ane tahiꞌatahiꞌa hari ꞌadi idaniro. “Maꞌora vazeḡa ḡau niduꞌa taufeꞌeteꞌe vazeḡaniꞌa radiunu. Mada ꞌahogano maꞌora vaze eꞌeꞌa ane ḡau taufeꞌeteꞌe vazeḡaniꞌa ani moni au hauḡinuteꞌe igiro.

²ꞌOugadu maꞌora vazeḡaꞌe ani hunadu niro, raenaꞌa, 'Ḡae moneo hari egataꞌe hubehehe? Ḡaꞌa eḡe moni hina nougenouge gauinuteꞌe faine meꞌodonoꞌi, mazaḡa ḡaꞌe eḡe ḡau mene bare taufiꞌuma!'

³ꞌOuge nirotene, aniꞌa ane bare reiro, raenaꞌa, 'Eḡe zuhiꞌaꞌa gauonoꞌo mae vaḡiheha. E izidi nougiꞌuma? E ahiri gauḡa moneo inarahe ꞌoꞌoꞌa zu moni umidoga mazagaroheꞌohe.

⁴O, e nougiꞌumaꞌe edereha! ꞌAhige haḡaine, gau ꞌahi modiꞌuma rehano, vazevazeꞌa zeḡe neo huhe zouhiꞌuma.'

⁵ꞌOugadu aniꞌa ane zuhiꞌa ḡau meiroteꞌe azaḡa tiba tiba huziro. Ebu aniꞌa zeḡe boꞌaḡano vaze tiba ḡadiniro, raenaꞌa, 'Ḡaꞌa eḡe zuhiꞌa ḡauꞌe nugu meiro?'

⁶Vaze eꞌe naenaeninaꞌa, 'E olive dehoroḡa 800 galeni meiro.' Ḡau taufeꞌeteꞌe vazeꞌa niro. 'Ḡaeꞌa meiroteꞌe umine meiroteꞌe soꞌaḡa moꞌi, ebu ehoradu 400 galeniḡa rae bare mirihe toꞌi!'

⁷Ebu hena vaze ꞌahoga ḡadiniro. 'Ḡa eḡe zuhiꞌa ḡau nugu meiro?' Vaze eꞌeꞌa naenaeninaꞌa, '100 vuidi baige boro meiro.' Aniꞌa niro. 'Ḡae soꞌa madu 80 baige rae bare mirihe toꞌi!'

⁸Maꞌora vazeḡaniꞌa ani ḡau taufeꞌeteꞌe vazeḡaniꞌa nagini haḡairoteꞌe igirotene, ani ḡuriro vazeḡa rehano, niguniro, mazaḡa haḡaiḡaꞌe huhuzaḡa.” Iesuꞌa reiro, raenaꞌa, “Eꞌe teige, raha adao Badiꞌa aḡuꞌa azaḡaꞌe zeḡe veize gauoga ufeta huhuzaḡa. Agaḡa azaḡa vitizeꞌohe.

⁹Eḡeꞌa ziꞌohe, zaꞌe raha ada ḡau madu vaze danazoꞌi zu ze teite vazetitoꞌi! Ḡauḡo niduꞌa hauḡadu zae zu rudaune, zaꞌe tuḡutuḡu habaꞌa mae zouziꞌuma.

¹⁰Iniuꞌa gau komeḡa veize ane zama hina faine haḡaine, gau boro zuni ꞌouge haḡaiꞌuma. U iniuꞌa gau komeꞌano ḡuririne, gau boro zuni ḡuririꞌuma.

¹¹Ebu zaꞌa rahao ada ḡau mene faine odohe gauine, Badiꞌaꞌonoꞌo vine maꞌoraḡa huga mene meꞌuma.

¹²Za vaze nu ḡau mene faine odohe gauine, zae ḡauḡa mene meꞌuma.

¹³Tuḡure vazeḡaꞌe zuhiꞌa ꞌaheu veize gauoga mene idaḡa. ꞌOugine ani ꞌahogaꞌe zamariꞌuma, u ꞌahogaꞌe heꞌeheꞌeniꞌuma. Ebu ꞌahoga veize faine gauiꞌuma, u ꞌahogaꞌe turuniꞌuma. Eꞌe teige, zaꞌe Badiꞌa ebu moni veize gauoga mene idaḡa.”

¹⁴Farisea azaḡaꞌe moni zamare borofeꞌeteꞌe uꞌano, Iesu ḡoere igirotene, ze Iesu eḡofoharo.

¹⁵ꞌOugadu Iesuꞌa ziro, raenaꞌa, “Vaze ubumao zaꞌe zaeꞌa bare duduḡa raꞌohe, rehano Badiꞌaꞌe zae zamaꞌe sauꞌa rae edeḡa. Vazeꞌa ḡau boro raꞌeteꞌe ḡauḡaꞌe, Badiꞌaꞌa agirohauꞌenaꞌa mene urateꞌohe.

¹⁶Ioane Babatisoꞌa izema onairoteꞌe madaḡano, Mose goro ḡoeꞌa zu peroveta azaḡaniꞌa mirihiroteꞌe ḡoeꞌa vaze ibitoziniro. Eꞌe ḡarugano Badiꞌa hari manoḡaꞌe eḡeꞌa harameꞌohe, ebu vaze ḡehaḡaꞌe Badiꞌaꞌa ibitohauꞌeteꞌe habaꞌa diuḡoga veize inareꞌohe.

¹⁷Adure zu rahaꞌe dauḡiꞌuma, rehano Mose goro ḡoeꞌa komeꞌa hune zuni mene dauḡiꞌuma.

¹⁸Mose goro ḡoeꞌa ꞌahoga idaniꞌuma. Hahu ohozeꞌa inuga modadu roḡae ꞌahoga teite hahurine, aniꞌe daroꞌeꞌohe. Ebu ohoze ꞌahogaꞌe iꞌaniꞌa modiroteꞌe roḡaeḡa teite hahurine, ani zuni daroꞌeꞌohe.”

¹⁹Iesuꞌa hari ꞌahoga idaniro, raenaꞌa, “Maꞌora vazeḡa ꞌahoganiꞌa radiunu. Ani dabua miriḡa manoḡa vidaunu zu mada niduꞌa ani ogomu manoḡa aunu ebu ne manoḡa huneo radiunu.

²⁰U ani ne ḡabiriḡa ibihetaḡano zahara vazeḡa niḡa Lazaroꞌa radiunu. Ani ahiriꞌe idiri ḡunuḡa.

²¹Ani maꞌora vazeḡaniꞌa fatao oganadu mumuḡaniꞌa rururaudoteꞌe ufe atihi reinu. Rehano ḡuniꞌa aradu ane idiri ubidinu.

²²Ḡonagano Lazaroꞌa rudarotene tuḡure vigaꞌa ovadu Aberahamo vaḡe zamahu itiro. Ebu maꞌora vazeḡa zuni rudanadu guriro.

²³Maꞌora vazeḡa vigaꞌe rune habaꞌa onamadu ani eꞌea huau ḡaniḡanauꞌenaꞌa ite ehamaro, ebu faḡano Aberahamo babaḡano Lazaro horoniro.

²⁴ꞌOugadu aniꞌa huaro, raenaꞌa, 'Aberahamo, mama! Eḡe vetuḡahoꞌi! Lazaro tuḡunadu ane ꞌevoꞌa huduꞌa vuo taradu mazanehe amunanoꞌi! E ire roga duhuḡa zamaḡano gigiꞌa boro hideꞌohe!'

²⁵Rehano Aberahamoꞌa naenaeniro, raenaꞌa, 'Ubude, ḡa ꞌahi zamaroꞌi! Ḡaꞌa rahao ḡabode radiudoteꞌe madaḡano ḡau manomano hidinu, u Lazaro ani aduga hidinu. ꞌAhine Lazaro ani izidi ahao matuꞌe rudauꞌohe, u ḡaꞌe gigiꞌa hideꞌohe.

²⁶Ḡau ꞌahoga zuni ꞌahi eꞌe, emeḡe boꞌaḡanoꞌe dofara boro. Vaze ꞌahoga ahanoꞌo ḡa mone fare amoga mene idaḡa, ebu eme none fare aroga mene idaḡa.'

²⁷ꞌOuge reirotene, maꞌora vazeḡaniꞌa naenaeniro. 'Mama Aberahamo, e ḡa umiꞌeꞌohe. Lazaro eḡe ne tuḡune onamoꞌi!

²⁸E negohe niduꞌa fuꞌo. Ze rudaune aduga hideꞌeteꞌe habaꞌa ꞌahi mene aroga veize, Lazaro ane onamadu eḡeꞌa ahao gigiꞌa hideꞌeteꞌe ihoziꞌuma.'

²⁹Rehano Aberahamoꞌa ninaꞌa, 'E ꞌouge mene haḡaiꞌuma, mazaḡa Mose zu peroveta azaḡa mirihoꞌe eꞌe radiuꞌohe. Ze uratine mirihoḡa eꞌe meꞌodiꞌuma ebu eꞌe moneo ederiꞌuma.'

³⁰Ebu ani ninaꞌa, 'O mene, mama Aberahamo! Vaze ꞌahoga runeonoꞌo zeḡe vaḡe tuḡunine, zeꞌe haḡai sauꞌanonoꞌo ḡihuriꞌuma.'

³¹Rehano Aberahamoꞌa niro. 'Ze Mose zu peroveta azaḡa mene egozinine, runeonoꞌo ḡabode iḡuneꞌeteꞌe vazeḡa zuni mene hune egohaꞌuma.'”