1Eꞌe ḡarugano Iesu Zuhiꞌa Boroꞌa vaze 72 zamaziro. Ebu aneꞌa onamihi reinuteꞌe neḡa niduꞌa zu habaꞌa niduꞌano ꞌaheu ꞌaheu ibite tuḡuziro.
2Ebu Iesuꞌa ziro, raenaꞌa, “Hiriviꞌuma ḡauḡaꞌe ḡehaḡa bagaḡa, rehano gauḡa azaḡaꞌe mene ḡehaḡa. Eꞌe teige, Badiꞌa ederihi raꞌeteꞌe azaḡaꞌe ḡehaḡa bagaḡa, rehano ani ḡoere haramoga veize gauḡa azaḡaꞌe oꞌoꞌa. Eꞌanoꞌo gauḡa azaḡa nu tuḡuzadu ani ḡoere haramozoga veize hiriveꞌeteꞌe Zuhiꞌaḡa, Badiꞌa uminoꞌi!
3Onamoꞌi! Butu ḡuniḡa boꞌaḡano mamoe tuḡuzeꞌeteꞌe teige, e za agire azaḡa boꞌaḡano tuḡuzeꞌohe.
4Moni, nihara ga tamaka ꞌahoga ago mae odohoꞌi! Ebu ibio vaze ꞌahoga hidoꞌidene mada hauḡenaꞌa ago ḡorenoꞌi!
5Vaze ꞌahoga neo diuḡoꞌidene ibite ꞌahige roꞌi, 'Badiꞌaꞌa zama roḡeḡa ziniꞌuma!'
6Ne eꞌe zamaḡano vaze ꞌahogaꞌe zama roḡeḡa vazeḡa reine, zaꞌa rateꞌe zama roḡeḡaꞌe ani rana radiꞌuma. U mene reine, zama roḡeḡa eꞌe zae bare vaḡiꞌuma.
7Diuḡeꞌeteꞌe neḡano daꞌo radoꞌi! Ebu zeḡeꞌa ziniꞌeteꞌe ogomuḡa anoꞌi zu gagoꞌi, mazaḡa gauḡa azaḡaniꞌa naeḡa maꞌeteꞌe teige, zae zuni ogomu ziniꞌuma. Ne ꞌahoga ꞌahoganoꞌe ago edau ragavoꞌi!
8Neḡa ꞌahoga onamadu mae ḡihizoꞌidene, nagi ogomuḡa ziniꞌeteꞌe anoꞌi!
9Ebu eꞌea ugi azaḡa faizadu haramozenoꞌi, raenaꞌa, 'Badiꞌaꞌa ibitoziniꞌeteꞌe zae uhiḡano feureha.'
10U neḡa ꞌahoga onamadu mene mae ḡihizoꞌidene, ibi boro onamoꞌi!
11Ebu zoꞌi, raenaꞌa, 'Badiꞌaꞌa zae sauꞌa ederifine, zae haba konoḡa odafeo kadaranateꞌe ꞌada zauhe mode manaheꞌohe. Rehano ederoꞌi, Badiꞌa ibitoziniꞌeteꞌe zae uhiḡano feureha!'”
12Ebu Iesuꞌa bare ziro, raenaꞌa, “Ḡianoꞌi, e hube hune ziꞌohe! Ibite Sodoma habaꞌa azaḡaꞌe sauꞌa boro uꞌano, Badiꞌaꞌa ruiziro. Rehano Badiꞌaꞌa sauꞌa manoḡa rovoniꞌuma madaḡa meine, zae mene mae ḡihizeꞌeteꞌe neḡa azaḡaꞌe ufeta aduga boro vitine hidiꞌuma.
13Korasini azaḡa zu Betesaida azaḡa, za fase vetuḡaḡa, aduga boro hidiꞌuma! Zae mazao haḡai gigiꞌaḡa haḡainutaꞌaꞌe Turo zu Sidona azaḡa mazao haḡaifone, zeꞌe sauꞌaonoꞌo garihe zamare ḡihurifo. Ze dabua ḡuꞌa vidau ehoradu vega vadinizeo ase ḡuzuheꞌenaꞌa, zeḡeꞌa zamare ḡihurifo.
14Kota madaḡano, zaꞌe Turo zu Sidono azaḡa aduga vitine hidiꞌuma.
15Zae Kaperanauma azaḡa, zaeꞌa zamareꞌetene za Badiꞌa habaꞌao gubaziꞌuma raꞌehe? Mene! Zaꞌe rune habaꞌano mae feuziꞌuma.
16Iniuꞌa zae ḡoere egozinine, aꞌe eḡe egoniꞌohe, zu iniuꞌa za hezahozinine, aꞌe eḡe hezahoniꞌohe. Ebu iniuꞌa eḡe hezahonine, eḡe tuḡuhiroteꞌe Badiꞌa hezahohauꞌohe.”
17Ebu Iesu tahiꞌa 72 onamadu aneꞌa ziroteꞌe gauḡa haḡairo. Ze barirotene, matuꞌuzeta feuriro. Ebu Iesu meꞌodoharo, raenaꞌa, “Zuhia Boro, eme ḡa niḡano vine saua hegozatene, ze eme ḡoere egadu feraneha!”
18Iesuꞌa ziro, raenaꞌa, “Oꞌe, vazabu adureonoꞌo agaru ovaoga teige, Sataniꞌa ḡarihe fase vaḡinateꞌe horoneha.
19Ḡianoꞌi! Mohe ga asiasi edeze ruzoga teige, emeḡe agire Satani gigiꞌa vitinifine, eḡeꞌa inara gigiꞌaḡa ziniro. Ḡau ꞌahoganiꞌa mene sausauziꞌuma.
20Rehano vine sauꞌa sauꞌaniꞌa za ḡoere egateꞌe veize ago matuoꞌi! U matuoꞌi, mazaḡa Badiꞌaꞌa za niꞌe ane habao mirihiro.”
21Eꞌe madaḡano Iesuꞌe Vine Zaḡoḡaniꞌa ragano radu matuꞌe rudaro. Ebu Badiꞌa kurau niro, raenaꞌa, “Mama, ḡaꞌe adure zu raha Zuhiꞌaḡa! E niguꞌeꞌohe, mazaḡa ḡaeꞌa edaꞌeḡa zu edeḡa boro azaḡa mazao hube hune haḡaiḡa ꞌahi uꞌuꞌrutiro. Rehano tahiꞌa teige, edeḡa oꞌoꞌa rae zamareteꞌe azaḡa mazaoꞌe fureniro. Mama, a hube! ꞌOuge haḡirotaꞌe ḡaeꞌa urateꞌeteꞌe ḡauḡa.”
22Ebu vaze zinaꞌa, “Eḡe Mamaꞌa ḡau niduꞌa eḡe iniro. Vaze ꞌahogaꞌe eꞌe aḡuꞌa, rehano eḡe Mama daꞌo edeḡa. Ebu vaze ꞌahogaꞌe eḡe Mama aḡuꞌa, rehano eḡe, Ane Ubuga daꞌo edeḡa. Ebu e eḡe Mama moneo ihozoga veize ohoteꞌeteꞌe azaḡa daꞌo eḡe Mama edeḡa.”
23Ebu Iesuꞌa ane tahiꞌatahiꞌa tehe ḡiazadu sifu ziro, raenaꞌa, “Za, matuꞌoꞌi, mazaḡa naginiꞌa fureruꞌeteꞌe haḡaiḡa horoneꞌohe.
24Eḡeꞌa ziꞌohe. Peroveta zu kini azaḡaniꞌa, zaeꞌa horoneꞌeteꞌe haḡaiḡa ꞌadi ḡianihi reinu, rehano mene horoniro. Ebu zaeꞌa igiꞌeteꞌe hariḡa ꞌadi igihi reinu, rehano mene igiro.”
25Mada ꞌahogano Mose goro ḡoeꞌa ihozeꞌeteꞌe vazeḡa ꞌahoganiꞌa iḡunadu Iesu tuhune nurihi rae zamareꞌenaꞌa, ḡadiniro, raenaꞌa, “Ihore vazeḡa, e nougenougine, ḡabone tuḡutuḡu hidiꞌuma?”
26Ebu Iesuꞌa naenaeninaꞌa, “Goro ḡoeꞌanoꞌe nouge rae mirihiro? Ḡaꞌa nouge meꞌode horoneꞌohe?”
27Ebu vaze eꞌeꞌa naenaeninaꞌa, “Goro ḡoeꞌa ꞌahige raꞌohe, 'Ḡae Badia Zuhiꞌa Boroꞌe, zamaḡo niduꞌa hina, vineḡo niduꞌa hina, inaraḡo niduꞌa hina zu zamaroneḡo niduꞌa hina zamaroꞌi! Ebu ḡaeꞌa ḡae bare zamareꞌeteꞌe teige nabugo zu zamaroꞌi!'”
28Ebu Iesuꞌa ninaꞌa, “Oꞌe, a hube. Ḡa ꞌouge haḡaine, ḡabone tuḡutuḡu hidiꞌuma.”
29Ebu vaze eꞌeꞌa, Iesuꞌa ani mazao 'Ḡaꞌe duduḡa,' raꞌeteꞌe uratiro, eꞌanoꞌo Iesu bare ḡadiniiro. “Iniuꞌe eḡe nabudihe?”
30Ebu Iesuꞌa hari ꞌahoga idane naenaeniro. “Mada ꞌahogano Iuda vazeḡa ꞌahogaꞌe Ierusalema habaonoꞌo Ieriko neḡa boro ovoinu. Ebu ibi nemao ḡonore azaḡa hidiro. Ze dabuaḡa ni fuhiꞌadu ḡauḡa niduꞌa meiro. Ebu bouneꞌenaꞌa ariga mau runiro, zu eꞌea bazune mode feraro.
31Eꞌe madaḡano, Badiꞌa dibuꞌo hauꞌeteꞌe vazeḡa ꞌahoganiꞌa eꞌe ibiḡano ovoiro. Ebu omatiroteꞌe vazeḡa eꞌe horonirotene, ḡenaḡano teiḡe vitaro.
32Vesu kuru neḡano gaueꞌeteꞌe Levi iduꞌu vazeḡa ꞌahoga zuni eꞌe ibiḡano ovoadu vazeḡa eꞌe horoniro, rehano ani zu ḡenaḡano teiḡe vitaro.
33Eꞌe enoḡano Samaria vazeḡa ꞌahoganiꞌa eꞌe ibiḡano ovoiro ebu vaze eꞌe horonadu vetuḡani runiro.
34Ebu ane vaḡe onamadu ḡabonihi radu dehoro zu vaini vuḡa hina idiriḡa rana beuꞌadu ꞌumiro. Ane doniki rana mae ohonadu iꞌudo neḡa tutune onamadu eꞌea taufe radiro.
35Ebu baze irarirotene, aniꞌa ne izema mode rafogano, moni nu madu iꞌudo neḡa vazeḡa haro. Ebu ninaꞌa, 'Ani taufe radoꞌi! Moni ꞌahiꞌe mene idaḡa roꞌidene, eḡeꞌa barine, ragate bare ḡaniꞌuma.'”
36Iesu hari eꞌe hauḡirotene, Mose goro ḡoeꞌa ihoziꞌeteꞌe vaze eꞌe ḡadiniro, raenaꞌa, “Vaze uḡidu ꞌadi boꞌaḡano, ḡae zamaroneꞌe iniuꞌe ḡonore azaḡa hidiroteꞌe vazeḡa nabuga?”
37Aniꞌa Iesu naenaeninaꞌa, “Ane vetuḡaniroteꞌe ebu dananiroteꞌe vazeḡa.” Iesuꞌa ninaꞌa, “Oꞌe, izidi onamoꞌi, ebu ḡae zu ani teige ꞌouge haḡaoꞌi!”
38Eꞌe ḡaruḡano Iesuꞌa ane tahiꞌatahiꞌa teite aune onamadu ne ꞌahogano feuriro. Ebu roḡae niḡa Maretaꞌa neḡano mae zouziro.
39Ebu negoḡa niḡa Maria, aniꞌe Zuhiꞌa Boro oda babaḡano ehoradu nagini reinuteꞌe igi radiunu.
40U Maretaꞌe iꞌudo vazeḡa veize ruhibeꞌenaꞌa, zamaḡa ḡugine radiro. Eꞌanoꞌo Iesu vaḡe onaadu ninaꞌa, “Zuhiꞌa Boro, negoheꞌe reꞌoreꞌadu mene danaheꞌohe. Eḡe daꞌo gaueꞌohe! Ḡa eꞌe mene zamareꞌehe? Ane danahoga veize noꞌi!”
41Zuhiꞌa Boroꞌa naenaeniro, raenaꞌa, “Mareta, eḡe vaze, ḡaꞌe gau ḡehaḡa uꞌano zamaḡoꞌe aduduꞌohe zu ḡunuḡunuꞌeꞌohe.
42Rehano gau boroꞌe tiba daꞌo, aꞌe eḡe ḡoere igiꞌeteꞌe! Mariaꞌa eꞌe ederadu eḡe babaḡano ehoreꞌenaꞌa abiteꞌohe, eꞌanoꞌo vaze ꞌahoganiꞌa ani mene gararohaꞌuma.
