1Iesuꞌa ane tahiꞌatahiꞌa 12 huze nuꞌoziro. Ebu vine sauꞌa niduꞌa uhize buzeꞌeteꞌe zu ugi azaḡa faizeꞌeteꞌe gigiꞌaḡa ziniro.
2Ebu Badiꞌaꞌa ibitohauꞌeteꞌe habaꞌa moneo vaze ihozoga zu ugi azaḡa faizoga veize tuḡuziro.
3Izema aniꞌa ze tuḡuzogano, raenaꞌa, “Zae ragavo zamaḡano oꞌoꞌa huga ago moꞌi! Tuḡu, tunahu, ogomu, moni zu dabuꞌa ꞌahoga zuni ago odohoꞌi!
4Noꞌe habaꞌano ne ꞌahoga diuḡoꞌidene, eꞌea daꞌo radoꞌi! Ebu zaeꞌa haba eꞌe modeꞌeteꞌe madaḡa roꞌidene, ne eꞌe mode iḡunoꞌi!
5Haba ꞌahogano ne azaḡaniꞌa zae mene mae zouzadu ne eꞌe modoꞌidene, odaze huꞌuruḡa zauhe mode manahoꞌi! Aꞌe zeꞌa mene ḡihurine, aduga hidiꞌuma rae ihoziꞌuma.”
6Ebu Iesu tahiꞌatahiꞌa 12 neḡa neḡano ragavadu hari manoḡa haramiro zuni ugi azaḡa manoziro.
7Heroda Antipasi, Galilea habaꞌa kiniḡaꞌe Iesu hariḡa igirotene, aniꞌe zamaḡa ꞌadaꞌadiro, mazaḡa vaze nuꞌa raenaꞌa, “Iesuꞌe Ioane Babatiso. Aniꞌa ibite rudanadu bare ḡabodeha.”
8U vaze nuꞌe raenaꞌa, “Aniꞌe peroveta vazeḡa, Elia. Aniꞌa bare fureraneha,” ebu vaze nuꞌe raenaꞌa, “Aniꞌe peroveta ibiꞌaḡa vazeḡa ꞌahoga, ebu bare ḡabodeha.”
9Rehano Herodꞌa ꞌahiḡe reiro, “Ahiꞌe mene Ioane, mazaḡa aniꞌe goruniro. Nougadu vazeꞌa 'Aniꞌe Ioane,' rae ḡoaneꞌohe?” Eꞌanoꞌo ani Iesuꞌe iniu vaze rae ḡianihi reiro.
10Apostolo azaḡaniꞌa Iesu vaḡe bare onairo. Ebu zeḡeꞌa nagini haḡairoteꞌe niduꞌa Iesu meꞌodo haro. Ebu Iesuꞌa sifu zeḡe teite vaḡinadu Betesaida habaꞌa onamiro.
11Rehano vaze ḡuḡuvaḡa ze aniꞌe noꞌe onameꞌetaꞌe ederadu zeḡe niduꞌa ani hegotiro. Ebu Iesuꞌa ze mae ḡihizadu Badiꞌaꞌa ibitohauꞌeteꞌe habaꞌa ziro zu ugi azaḡa faiziro.
12Ḡorava rarotene, Iesu tahiꞌatahiꞌa 12 ani vaḡe aradu niro, “ꞌAhiꞌe haba bohaꞌa. Ogomu vaḡoga ebu ohere bazoga veize, vaze niduꞌa ne uhiḡa uhiḡano tuḡuzoi!”
13Rehano Iesuꞌa reiro, raenaꞌa, “Zaeꞌa ogomu zenoꞌi!” Ebu ze ani naenaeniro. “Mene idaḡa! Eme mazaoꞌe beredi fuꞌo ebu ḡozone ꞌaheu daꞌo. Vaze ḡehaḡa ꞌahi ḡubuzoga veize, ogomu ḡehaḡa hoitine manoḡa!”
14Eꞌea vaze niduꞌa boꞌaḡano ohoze daꞌoꞌe niduꞌa 5,000 radiunu. Iesuꞌa ane tahiꞌatahiꞌa ziro, raenaꞌa, “Ze ꞌahige zoꞌi, '50 rovonerovone ehoroꞌi'”
15ꞌOugadu Iesu reiroteꞌe idunaḡano vaze niduꞌa ehoriro.
16Eꞌe ḡarugano Iesuꞌa beredi fuꞌo zu ḡozone ꞌaheu madu adure ḡianeꞌenaꞌa, Badiꞌa mazao manoḡa tauḡi reiro. Ebu beredi zu ḡozone tahi tahe vaheḡe ane tahiꞌatahiꞌa zinadu ze ḡahuḡe ḡemiro.
17Zeḡe niduꞌa au ubararo ebu Iesu tahiꞌatahiꞌa ogomu ḡahaꞌa ḡahaꞌaꞌe tunahu niduꞌa 12 irivaꞌoniro.
18Mada ꞌahogano Iesuꞌe ane daꞌo kurau radiro, ebu ane tahiꞌatahiꞌa daꞌo ane teite radiro. Ebu Iesuꞌa ze ḡadiziro, “Vazeꞌa eꞌe iniu rae raꞌohe?”
19Zeḡeꞌa naenaeninaꞌa, “Nuꞌe 'Ioane Babatiso', nuꞌe 'Elia,' raꞌohe. Nuꞌe raenaꞌa, 'Amahi rudaroteꞌe peroveta vazeḡa ꞌahoganiꞌa ḡabode iḡuniro.'”
20Ebu Iesuꞌa ḡadiziro, raenaꞌa, “U zaꞌa raꞌetene eꞌe iniu?” Peteroꞌa ninaꞌa, “Ḡaꞌe Badiꞌaꞌa tuḡuꞌiroteꞌe vazeḡa, Keriso!”
21Iesuꞌa ḡoere riḡa ziro, raenaꞌa, “ꞌAdi ḡoeꞌa vaze ꞌahoga ago zoꞌi!”
22Ebu ani raenaꞌa, “Eḡe, Vaze Ubuganiꞌa aduga ḡehaḡa hidiꞌuma. Vaze boroboro, Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu Mose goro ḡoeꞌa ihozeꞌeteꞌe azaḡaniꞌa heꞌeheꞌehiꞌuma zu uḡuhiꞌuma. Rehano mada uḡidu zamaḡano bare ḡabode iḡuniꞌuma.”
23Ebu Iesuꞌa zeḡe niduꞌa zinaꞌa, “Iniuꞌa eḡe ḡaruna hegotiꞌuma roꞌidene, ane ura haḡaiḡa niduꞌa modadu, mada niduꞌa ane satauro odoheꞌenaꞌa, eḡe hegotoꞌi!
24Mazaḡa iniu vaze ane ḡabone obone giganine, ani ḡabone tuḡutuḡu mene hidiꞌuma. Rehano iniu vaze ane ḡabone eḡe ꞌuano ahetine, ḡabone tuḡutuḡu hidiꞌuma.
25Vaze ꞌahoganiꞌa haba niduꞌa madu ḡaboneḡa mae vaḡinine, nagini manoḡa hidiꞌuma?
26Vazeꞌa eḡe zu eḡe ḡoere oꞌonine, eḡeꞌa eḡe agaḡano, mamahe aḡaḡano ebu tuḡure viga zaḡoḡa aḡaḡano bare ovaine, eḡe, Vaze Ubuga zu ani oꞌoniꞌuma.
27E hube hune ziꞌohe, faifaine egoꞌi! Izidi zae boꞌaḡano vaze nunuꞌa, izema rudanogano, Badiꞌaꞌa ibitohauꞌeteꞌe habaꞌa horoniꞌuma.
28Mada fuꞌo uḡidu fare ḡarugano Iesuꞌa Petero, Iakobo ebu Ioane zamaze maḡa rana kuranoḡa radu itiro.
29Ani kurauꞌeteꞌe zamaḡano, iraḡaniꞌa nufiro zu dabuaḡaniꞌa uranadu vazavazahiro.
30Eꞌe madaḡano vaze ꞌaheu, Mose zu Eliaꞌa fureradu ze Iesu teite ḡoaniro.
32Petero zu Iesu tahiꞌa ꞌaheuꞌe baze rudaro. Zeꞌa evatirotene Iesu agaḡa zu ani uhiḡano vaze ꞌaheu edanoga horoziro.
33Mose ebu Eliaꞌa Iesu muhinoga madaḡa meirotene, Peteroꞌa Iesu niro, raenaꞌa, “Zuhiꞌa Boro, eme ꞌadama radiuꞌeteꞌe manoḡa tauḡi! Emeḡe uḡiduꞌa nugo taruha uḡidu ogoratihi, tibaꞌe ḡae veize, tibaꞌe Mose veize ebu tibaꞌe Elia veize.” Petero aniꞌa nagini raꞌetaꞌe aḡuꞌa.
34Ani ꞌouge reirotene ḡozeꞌa ovadu ogoziro, eꞌanoꞌo ze rihau rudaro.
35Ebu ḡoze zamaḡanonoꞌo Badiꞌa ago ꞌahoga igiro, raenaꞌa, “ꞌAhiꞌe eḡe Ubude, eḡeꞌa ohotiroteꞌe vazeḡa. Ani ḡoere egohanoi!”
36Agoꞌa hauḡirotene Iesu ane daꞌo horoniro. Zeḡe uḡiduꞌa nagini horoniroteꞌe vaze ꞌahoganiꞌa mene rae fureniro.
37Mada eꞌe ḡarugano Iesu zu ane tahiꞌatahiꞌa teite maḡanonoꞌo ovairo, ebu vaze ḡuḡuvaḡa hidiro.
38Vaze ḡuḡuva zamaḡanonoꞌo vaze ꞌahoganiꞌa Iesu huniro, raenaꞌa, “Ihore vazeḡa, e ḡa umiꞌeꞌohe. Eḡe ubude tibuhuga ꞌadi ḡabonoꞌi!
39Vine sauꞌaniꞌa ani agatohauꞌetene, tabara huau ḡaniḡanaꞌenaꞌa, beroꞌude ḡemeꞌohe zu hena hebeꞌanonoꞌo busureꞌohe. Vine sauꞌaꞌa mada niduꞌa ani zamao radiuꞌenaꞌa, ahiꞌa sausauneꞌohe.
40Eḡeꞌa ḡae tahiꞌatahiꞌa mazao vine sauꞌa eꞌe hegone bunoga radu umizeha, rehano ze mene idaraneha.”
41Iesuꞌa vaze ḡuḡuvaḡa eꞌe naenaeziro, raenaꞌa, “Zaꞌe Badiꞌa mazao mene fiꞌeꞌeteꞌe zu veꞌoreꞌeteꞌe azaḡa! E mada faḡa zae teite zamahe gigane mene obone tiꞌuma!” Ebu tahiꞌa eꞌe moga ninaꞌa, “Ubugo odohe ꞌadi aroꞌi!”
42Moganiꞌa tahiꞌa eꞌe tutune onaꞌeteꞌe zamaḡano, vine sauꞌaniꞌa ahiꞌa rana radu higau bauriro zu beroꞌude ḡemiro. Ebu Iesuꞌa vine sauꞌa roniro, raenaꞌa, “Tahiꞌa ahiꞌaꞌonoꞌo buanoꞌi!” ꞌOugadu vine sauꞌaꞌe zogone buanadu tahiꞌa eꞌe manoriro. Iesuꞌa ani moga bare haro.
43Ebu vaze niduꞌa Badiꞌa gigiꞌaḡa boro horonadu zaguzagaro. Vaze niduꞌa Iesuꞌa haḡairoteꞌe haḡaiḡa horonadu zaguzagarotene, Iesuꞌa ane tahiꞌatahiꞌa ziro, raenaꞌa,
44“Ḡoere ꞌadi faifaine zamaroꞌi! Eḡe, Vaze Ubuḡa, agirehe ꞌevorao riꞌihiꞌuma.”
45Rehano ane tahiꞌatahiꞌaꞌe aniꞌa nagi raꞌetaꞌaꞌe mene zamariro, mazaḡa zeꞌa mene ederoga veize huga eꞌe uꞌuruḡa. Ebu zeꞌe aniꞌa raꞌetaꞌe moneo bare ḡadimanogaꞌe riharo.
46Iesu tahiꞌatahiꞌa boaḡano iniuꞌe niḡa ḡihiꞌaḡa radu zeḡeꞌa bare tairotitiro.
47Iesuꞌa ze nagini zamareꞌeteꞌe horonadu tahiꞌa komeḡa zamahu ane babaḡano ohoniro.
48Ebu ziro, raenaꞌa, “Iniuꞌa eḡe uꞌano tahiꞌa komeḡa ꞌahiguḡa mae ḡihinine, aniꞌe eḡe mae ḡihiheꞌohe. Ebu iniuꞌa eḡe mae ḡihihine, aniꞌe eḡe daꞌo mene mae ḡihiheꞌohe, rehano eḡe tuḡuhiroteꞌe Badiꞌa zuni mae ḡihineꞌohe. Zae boaḡano iniuꞌa ane bare niḡa mae ovoine, Badiꞌa ubumao aniꞌe niḡa ḡihiꞌaḡa rae raꞌohe.”
49Ioaneꞌa Iesu niro, raenaꞌa, “Zuhiꞌa Boro, vaze ꞌahoganiꞌa ḡae niḡano vine sauꞌa sauꞌa hegoze buziroteꞌe emeḡeꞌa horoniro, ebu emeḡeꞌa ani garariro, mazaḡa aniꞌe emeḡe teite mene tiburuꞌohe.”
50Rehano Iesuꞌa ziro. “Ani ago gararoꞌi! Za mene agireꞌeteꞌe vazeḡaniꞌe, zae mone vazeḡa.”
51Iesuꞌe adure itiꞌuma madaḡaniꞌa hanitirotene ani Ierusalema habaꞌa onamoga radu inare zamariro.
52Ebu ani vaze nu ibite tuḡuziro. Zeꞌe Iesu veize ruhibifine Samaria neḡa onamiro.
53Rehano ne azaḡaniꞌa Iesu mene mae ḡihiniro, mazaḡa aniꞌe Ierusalema habaꞌa onaminu.
54Iesu tahiꞌa ꞌaheu, Iakobo zu Ioaneꞌa horonadu Iesu ḡadiniro. “Zuhiꞌa Boro, ḡa uratine, emeꞌa Badiꞌa uminadu adureonoꞌo ire roga tuḡuniꞌuma ebu ze hufi haoziꞌuma!”
55Rehano Iesuꞌa tehadu roziro. “Ago ꞌouge roꞌi!”
56Ebu ze ne ꞌahoga onamiro.
57Ze ibio onameꞌenogano, vaze ꞌahoganiꞌa aradu Iesu niro, raenaꞌa, “Ḡaꞌa noꞌe onamine, e ḡa hegotiꞌuma.”
58Iesuꞌa naenaeninaꞌa, “Butu ḡuniḡaꞌe bazuni habaꞌazeta, ebu hitana niniḡaꞌe nezeta. Rehano eḡe, Vaze Ubuḡaꞌe bazunihe habaꞌaꞌe oꞌoꞌa.”
59Ebu Iesuꞌa vaze ꞌahoga huniro, raenaꞌa, “Eḡe hegotoꞌi!” Rehano vaze eꞌeꞌa raenaꞌa, “Zuhia Boro, e geno mamahe guri onamihi raꞌohe.”
60Iesuꞌa ninaꞌa, “Vine ruga azaḡaꞌa rune azaḡa guriꞌuma. U ḡaꞌe aradu Badiꞌaꞌa ibitoziniꞌeteꞌe moneo harame ragavoꞌi!”
61Ebu vaze ꞌahoganiꞌa raenaꞌa, “Zuhiꞌa Boro, e ḡa hegotiꞌuma. Rehano e ize ibite nabudihe uhizi onamihi.”
62Iesuꞌa naenaeneninaꞌa, “Mene. Iniuꞌa teheꞌenaꞌa mebaḡa afidaune, mene faine afidaꞌuma. Eꞌe teige, iniuꞌa eḡe hegotadu tehe gau nunu zamarine, aniꞌe Badiꞌaꞌa ibitohauꞌeteꞌe habaꞌa veize gauoga mene idaḡa.”
