Lucas 20:24-45

²⁴―Xeniechejteticö denario tomi. ¿Öqueniji ixöyac quepea, hua öquenu ihuöxca inu tlajcuelule? Yejua oquejtojque: ―De César.

²⁵Yecuöquenu oquemelfejque: ―Pos xecmacacö César tli quetocöroa César, hua xetiemacacö Deus tli tietocöroa Deus.

²⁶Hua abele tli oquejtojque amo cuale de tietlajtultzi ixtla inu puieblo. Quetietzöbejque quiene ca quennönquelejque, hua oquetzajque incamac.

²⁷Entunses ohuölajque tietlac seque de inu saduceos, öque quejejtoa nele mimejque amo yulebesque. Yejua tietlajtlanejque,

²⁸tieyelfejque: ―Maestro, Moisés otiechejcuelfe que tlö icni de sente tlöcatl meque, tli quepeaya isohua, pero amo quepeaya ipelhua, que nele icni ma case isohua para quentlöcatelelis ipelhua de icni.

²⁹Oyeya, noso, checume icnijte. Inu cachto jiebe oquepex isohua, pero omec sin quepeas ipelhua.

³⁰Hua icni omosohuajte ca yaja, hua nuyejque ejqueu ipa omochi.

³¹Hua ocsente icni ocasec, hua ejqueu mismo noche checumeme, hua innochtie omejmejque sin que amo quencöjtiejque inpelhua.

³²Sötiepa inu sohuatl nuyejque omequeco.

³³Entunses, cuöc yulebesque mimejque, ¿cötlaja de yejua iyes isohua ini nönca sohuatl? Pos innochtie checumeme oquepexque quiename insohua.

³⁴Yecuöquenu Jesús oquemelfejque: ―Tlöltecpactlöca mosojsohuajtea hua monajnömectea.

³⁵Pero niecate öque quemeresieroa para asetibe ipa inu nieca tlöltecpactle yancuec hua para yulebesque de intzölö mimejque, yejua nimpor amo mosojsohuajtea, nimpor amo monajnömectea.

³⁶Pos ayojcuele mejmequesque, pos ye cate iguöl quiename öngeles, hua cate tiepelhua Deus, pos ye onyojyulejque.

³⁷Pero que tiel mimejque yulebesque, Moisés mismo otlamachte cöne tlajtoa de tebetztle. Pos tiecuitea Tlöcatzintle Deus de Abraham, Deus de Isaac, hua Deus de Jacob.

³⁸Bieno pues, yejuatzi amo iloac Deus de mimejque, tlöcamo Deus de tli yulejtecate. Pos noche nentecate para ca yejuatzi.

³⁹Hua tienönquelejque seque tlamachtiöneme de teotlajtule. Oquejtojque: ―Maestro, cuale tli otomojtalfe.

⁴⁰Pos ayecmo öque matreviro para tietlajtlanes canajyetla.

⁴¹Hua yejuatzi oquemelfejque: ―¿Quiene mojtoa que nele inu Cristo öque Deus quixpejpenque icaca iconie de David?

⁴²Pos sie yaja David quejtoa ipa inu libro de Salmos: Tlöcatzintle tiemolfeliluc notlöcatzintle: “Xomotlöle ca nomöyecömpa,

⁴³hasta senamo ma nequentiemöcte moenemigos momötla”.

⁴⁴Ejqueu noso David quecuitea Cristo “Tlöcatzintle”. ¿Quiene noso icaca iconie?

⁴⁵Hua mientras oquecaqueya noche puieblo, oquemelfejque tiemachtejcöhua: