Luka 20:24-45

²⁴Hage denari esega au heitagu. Eai ana ao, eo eai ena uriuri ede meta?” Arinana se heuio, si ene, “Kaisara enana.”

²⁵Abo i ribalau aridi eai, i ene “Kaisara ena ginauri au laei Kaisara arinai, eo ena Eaubada ena ginauri au laei Eaubada arinai.”

²⁶Ena riba nige se hepilipilidi tatao matadi eai: ena riba se noonooei: nige ariarinadi.

²⁷Sadukea tataodi headi abo se laoma ia arinai, edi nuatu si ene, tatao nige mate eai se torouio, ia se oimurini

²⁸si ene, “Tanuagamai e, Mose ena uriuri arimai eai i ene, tau esau, ena doga i tawasorao ie mate nige nanatunayao, ena doga abo ena wabu i hai tumadiyao abo i hetubudi ena doga wa enana.

²⁹Boga esau tataodi haligigilabui, taubaguna i tawasora, ie mate, nige natuna.

³⁰Helabuina hinage sine wa ie hai, ia hinage ie mate eo nige natuna.

³¹Hehaionana hinage sine wa ia abo ie hai; hehaligigi‐labui edi laulau nei doha mo: gamagaridi se mate, nige nanatudiyao.

³²Abotai abo hinage sine wa ie mate.

³³Torouio huiana sine wa eai abo monena? tatao haligigi‐labui ia se hai.”

³⁴Iesu arinadi i heuioidi, i ribalau aridi eai i ene, “Ina tanoubu tataodi se tawasora, eo se hetahetawasoraedi.

³⁵Isi si ene se lolo bena nei huia ne abo se hearo, eo mate eai se hetorouioidi, taba nige se tawasora, eo hinage nige se hetahetawasora:

³⁶hinage taba nige se mateuio paana isi eo aneru gonogonoadi; isi Eaubada nanatunayao, eo torouio nanatunayao.

³⁷Taumatemate abo se torouio wa, Mose oeagi gagirina eai i hemasarahayama, Guiau esana i ribaei Aberahama ena Eaubada, eo Isaako ena Eaubada, eo Iakobo ena Eaubada.

³⁸Paana ia nige taumatemate edi Eaubada: na taumaumauri mo isi edi Eaubada: paana tatao gamagamagari ia debana eai se mauri.”

³⁹Tauuriuri tataodi headi ia arinana se heuio si ene, “Tanuagamai e, em riba se lolo.”

⁴⁰Arinai abo se hesiolautom, nige se oimuriuio.

⁴¹Ie ribalau aridi eai, i ene, “Ie saha si ene Keriso ia Davida natuna?

⁴²Wana bukana eai Davida hinage i ene, ‘Guiau i ribalau egu Guiau arinai, i ene, U bawabigabiga nima‐tutugu eai.

⁴³I lau e am waiunuyao ea hetorodi abo se hemala aem adi bou.’

⁴⁴Davida ia i awaguiauei, ie saha ia natuna?”

⁴⁵Tatao gamagamagari matadi eai i ribalau ena heaheatayao aridi eai,