Lucas 20:24-45

²⁴“Kotam benid ti pilak a dinaryo. Kándeya a rupa sakay ngaran i kedid ti pilakidi?” “Ten Emperador ti Roma,” kagi di.

²⁵Kaya kinagi ni Jesus dikodi, “Ni konahud ay iyatád moy ten Emperador en para ten Emperador. Sakay en para ten Diyos ay iyatád moy bi ten Diyos.”

²⁶Awan ti nangyari ten planu di a madikáp ti Jesus ten pággupos na ten atubengán nen tolay hidi. Sakay awan hidi ti nakagi gapu nabigla hidi ten intábbig na.

²⁷Nadid, tehud a sangan a Saduseo a ummangay kánni Jesus. Hidi iyád en grupu nen Judio hidi a awan maniwala a mabiyag a ruway en nágkatay dán a tolay.

²⁸Kinagi di, “Maistu, insulat ni Moises ten kautusan en kona háddi, ‘Ni matay en essa a lállaki a awan hidi ti anak ay ten kabinga na ay kailangan a pakasalan nen wadi nen lállaki en bilu tánni magkahud hidi ti anak para ten natay.’

²⁹Nadid, tehud a pittu a matátkaka a lállaki. Nákkabinga en kaka peru natay siya a awan ti anak.

³⁰Káttapos ay pinakasalan nen wadi na en bilu, peru natay bi a awan bi ti anak.

³¹Kona bi hud en nangyari ten katállu hanggan ten kapittu. Naessa-essa a nakabinga nen bábbi en pittu a matátkaka. Peru nágkatay hidi a atanan a awan ti anak.

³²Ten katapusan ay natay bi en bábbi.

³³Nadid, ten kákkabiyag a ruway, ay deya ten pittu i tenggiyánnid nen bábbi a kabinga na ta hidi a atanan ay nakabinga na?”

³⁴Tinábbig hidi ni Jesus, “Ti biyagid a iddi ay mákkabinga en tolay hidi.

³⁵Peru en tolay hidi a karapatdapat a mabiyag a ruway ay awan dán mákkabinga.

³⁶Kumán dán hidi a en anghel hidi a awan matay, sakay anak hidi nen Diyos gapu kabilang hidi ten nabiyag hidi a ruway.

³⁷Maski ti Moises ay pinatunayan na bi a mabiyag a ruway en nágkatay dán hidi. Gapu ten nangyari a tungkul ten maggerab a marenggád a kayu, ay nginaranan na en Panginoon a Diyos ni Abraham, Diyos ni Isaac sakay Diyos ni Jacob.”

³⁸Kaya en Diyos ay bakán a Diyos nen patay hidi, nan Diyos nen biyag hidi, gapu ten Diyos en atanan a tolay ay biyag.”

³⁹Kinagi nen sangan a tagapagtoldu nen Kautusan, “Maistu, mahusay en intábbig mu!”

⁴⁰Kaya awan dán ti nangahas a magtanung a ruway.

⁴¹Káttapos ay nagtanung ti Jesus dikodi, “Konya a makagi nen tolay a en Cristo ay anak ni David?

⁴²Ti David dán a mismu nagkagiyid ten Libru nen Kansiyon hidi a, ‘Kinagi nen Panginoon ten Panginoon ku, “Mággetnud ka ti kawanan kuwiday,

⁴³mentras awan ku mapasuku dikomu en atanan nen kalaban mu hidi.” ’

⁴⁴Nadid, ti David dán en nangdulaw ten Cristo a Panginoon, konya a makagi nen tolay a siya ay anak ni David?”

⁴⁵Mentras a mágsanig en tolay hidi kánni Jesus ay kinagi na ten disepulus na hidi,