Luke 20:24-45

²⁴“Ganu da eu gane. Edo ganu einda tamo da mo amenda dombu da atiti de edo jawo de ri?” Setiri ungoi mina sisera, “Amone Caesar da atiti de edo jawo de ra.”

²⁵Setero Iesu mi sisira. “Awara ro Caesar da awa uso yei itiwo edo ro Mamo da ri awa uso yei itiwo.”

²⁶Setiri ungo uso ge mina sisira awa gido kove be isera. Edo ungo ainda embo berari da diti da ungoda nganega emboro neinde kainde edo wao ari sago ae isera.

²⁷Sadducee embobo nenei ungo embo betedo sekago wasiri de eradi ae atopatido isera amimi Iesu da yei bugudo nganega isera,

²⁸“Atopatari Moses mi agodari eiawa nango embo gaisira, ‘Embo da betedo aro doadira edo aro awa kinapeina bae edo betari embo ainda aro rori awa uso namendi mi jimbadira. Awodo jimbudo awa ungoi betari embo awasedo kinapeina itadera.’

²⁹Boroko nangoda ge ingio. Nanonamendi 7 atima isera. Edo namendi bego awa jimbusira te uso aro awa ero ra.

³⁰Edo namendi awa betetiri uso namendi nei mi evetu awa sekago jimbusira te sekago umo kinapeina bae.

³¹Edo namendi awa bebetisira edo namendi nei mi evetu awa jimbusira te sekago umo kinapeina bae. Edo namendi awa bebetisira. Edo nanonamendi nenei awa dada evetu awa jimbusera edo ungo dada bebetegurisera te evetu awa kinapeina bae.

³²Edo nanonamendi berari awa bebetegetero edo ambo be amboda awa evetu awa daedo bebetisira.

³³Edo bebetegari embobo sekago wasiri de eradera ainde mo evetu amomo amenda aro ri?”

³⁴Setero Iesu mi mina sisira, “Embo de evetu de boroko busu da atera awa jimbera.

³⁵Awarate Mamo mi embo ewagaewa awa wasiri de sekago erorase sira awa embomei awa wasiri natopo budo awa ungo sekago jimbadi aera.

³⁶Ungo awa teta asisi ewagaewa betae atima era da awodo ra. Ungo awa Mamo da kinapeina. Edo ungo betedo wasiri de sekago eradera.

³⁷Edo ro Moses mi sisira awa embo betedo sekago wasiri de eradera ainda ge be awa sisira. Edo Moses mi ri ambae euse atisira ainda ge gaisira ainda sisira, ‘Mamo mi sisira na awa Abraham da Mamo edo Isaac da Mamo edo Jacob da Mamo.’

³⁸Edo uso ge da be awa eire. Embo ingodena betari kotedo era amone betae ra Mamo mi sira awa ungo awa wasiri de atera awasedo umo awa embo wasiri de da Mamo rate embo betari da Mamo ae ra.”

³⁹Setiri agodari da atopapotegari mi sisera, “Atopatari imo mina sari ewamei setesa.”

⁴⁰Setero edo ungoda nganega ari sangove isira ainda be awa ungo sekago uso yei nganega ari oju isera awasedo.

⁴¹Iesu umo averi awa ari kotorase dipapa edo ungoda yei sisira, “Ro edo ungomi sedo eri soregari embo Mamo mi sisira awa bugadira awa David da orobe ri?

⁴²Ingo ro David umo umosuka Ya da gaisira awa ajigedo awa ainda be awa tambadewa. David mi sisira, ‘Mamo mi naso Bada da yei sisira naso ingo be da einda anumbedo atio.

⁴³Atiroso nanemi iso gitopo berari awa budo iso diti da bugano inemi ungo gitijigase.’

⁴⁴Edo David awodo sedo Keriso awa Bada sisira mo rawodo edo Keriso mo David da orobe eiri?”

⁴⁵Edo embo berari Iesu da ge awa ingise atero Iesu uso ambojimbi da yei sisira,