Lukas 20:24-45

²⁴“Oupwe pwäri ngeniei eföü föün moni silifer. Liosun iö me iten iö ei won ei moni?” Ra pölüeni, “Liosun Sisar me itan.”

²⁵Iei mine Jesus a üreniir, “Mi pwüng. Oupwe ngeni Sisar mine än Sisar, nge oupwe ngeni Kot mine än Kot.”

²⁶Iwe, resap tongeni särei Jesus won met a apasa me mwen ekewe aramas, iei mine ra fanafanala, nge ra ing ren mine a pölüeniir won.

²⁷Mürin, ekoch Satusi ra feito ren Jesus, ir chokewe mi apasa pwe aramas resap manausefäl seni mäla. Iwe, ra üreni Jesus,

²⁸“Sense, Moses a makkei ei allük fän itach: ‘Are eman mwän a mäla, nge esap wor nöün me won pwülüan, pwiin ei mwän epwe fokun pwülüeni ei fefin, pwe epwe wor nöün fänäsengesin mwirimwirin pwiin we mi mäla.’

²⁹Mi wor füman pwipwi. Ewe mwänichi a pwülüeni eman fefin, nge lupwen a mäla, esap wor nöün.

³⁰Mürin ewe aruomanün a pwülüeni ewe fefin,

³¹pwal mürin ewe aülümanün. Pwal ina chök usun mine a fis ngeni ekewe lusun tori ewe afümanün. Ra mäla, nge esap wor nöür.

³²Lesopolan ewe fefin a mäla.

³³Iwe, lon ewe ränin, lupwen ekewe sotup repwe manausefäl, iö me leir epwe pwülüeni ewe fefin? Pun ir me füman ra pwüpwülü ngeni.”

³⁴Jesus a üreniir, “Lon ei fansoun mwän me fefin ra pwüpwülü,

³⁵nge ekewe mwän me fefin mi fich ngeni ar repwe manausefäl seni mäla o manau lon ewe fansoun epwe feito resap pwüpwülü.

³⁶Repwe wewe ngeni ekewe chon läng, nge resap chüen tongeni mäla. Ir nöün Kot, pun ra manausefäl seni mäla.

³⁷Pwal mwo nge Moses a pwärätä lon ewe pworaus usun ewe iräfölüföl mi pulopulen ekkei, pwe ekewe sotup repwe manausefäl. Pun ikenan a aita ngeni ewe Samol än Apraham Kot, än Isaak Kot me än Jakop Kot.

³⁸Kot än ekewe mi manau Kot, nge sap än ekewe mi mäla, pun ren i aramas meinisin ra tongeni eäni manau.”

³⁹Iwe, ekoch me lein ekewe Sensen Allük ra apasa, “Sense, a fokun mürina om kapasen pölüen.”

⁴⁰Pun ra niuokus le sopwela ar repwe kapas ngeni won och.

⁴¹Iwe, Jesus a aisiniir, “Ifa usun, pwota repwe tongeni apasa, pwe ewe Kraist epwe eman mwirimwirin Tafit?

⁴²Pun Tafit a püsin apasa lon ewe puken Kölfel, ‘Ewe Samol a kapas ngeni ai Samol: Kopwe mot lepelifichi,

⁴³tori üpwe anomu chon oputom fän pecheöm.’

⁴⁴Tafit a püsin aita ngeni ‘Samol’, ifa usun chök än Kraist epwe tongeni pwal eman mwirimwirin Tafit?”

⁴⁵Iwe, lupwen ekewe aramas meinisin ra aüseling ngeni Jesus, a üreni nöün kewe chon kaiö,