Louk 20:24-45

²⁴“Moutwé mwen yon pyès dajan.” I mandé yo, “Fidji ki moun èk non ki moun ki anlèʼy?” Yo wéponn li, “Sa wa Ronm-lan.”

²⁵Kon sa Jézi wéponn yo, “Ében bay Wa Siza sa ki sa li èk bay Bondyé sa ki sa Bondyé.”

²⁶Yo pa té sa tjenbéʼy ka di anyen ki té kay ofwansé gouvèdman Ronm-lan douvan sé moun-an. Yo té étonnen pou tann wépons-lan i ba yo-a, kon sa yo tjenn silans yo.

²⁷La té ni yon konpanni Jwif yo kwiyé ‘sé Sadisyen-an’ ki di lè moun mò yo pa ka wésisité pou yo alé an syèl ében lanfè. Yon konpanni Sadisyen té vlé kwennen Jézi, kon sa yo vini otiʼy èk yo mandéʼy,

²⁸“Titja, an lwa Moziz-la i ékwi ban nou kon sa, ‘Si yon nonm té mayé èk i mò èk i pa té fè pyès ich èk madanm li, fwè nonm sala ni pou mayé madanm nonm-lan pou yo fè ich bay nonm-lan ki mò-a.’

²⁹Bon, la té ni sèt fwè èk pli gwan-an té mayé, i mò èk i pa fè pyès ich.

³⁰Kon sa dézyenm-lan mayé madanm-lan èk i mò osi san i fè pyès ich èk madanm-lan.

³¹Èk twazyenm-lan mayé madanm-lan, èk menm bagay-la wivé toulé sèt fwè-a. Yo mò san fè ich.

³²Èk dènyéman madanm-lan mò.

³³Bon, jou-a tout mò kay wésisité-a, madanm kilès an sé nonm sala i kay yé? Paski yo tout té mayé épiʼy.”

³⁴Jézi wéponn yo, “Mawiyaj sé pou moun ki isi-a asou latè.

³⁵Mé madanm èk misyé Bondyé pèwmité pou wésisité hòd lanmò èk alé an syèl, yo pa ka mayé.

³⁶Èk yo pa kay janmen mò ankò. Yo kay viv kon nanj. Yo sé ich Bondyé paski yo ja wésisité hòd lanmò.”

³⁷Èk Jézi kontiné ka di yo, “Èk konsèné kwèsyon-an si moun kay wésisité hòd lanmò, jik sa Moziz ékwi-a ka moutwéʼw aklè ki sa ka fèt pou vwé. Lè i ékwi listwa-a konsèné wazyé bwilé-a, i di kon sa Bondyé sé Bondyé-a Abrahanm, Ayzak èk Jakòb ka adowé-a.

³⁸Zòt ka kwè ki sé moun sala té ja mò, mé Bondyé sav ki yo ka viv toujou an syèl. Paski Bondyé sav sé pou tout tan moun ka viv.”

³⁹Yon konpanni titja lwa sé Jwif-la di Jézi, “Sa sé yon bon wépons, titja,”

⁴⁰paski yo té pè mandéʼy yon lòt kwèsyon ankò.

⁴¹Jézi tounen èk i mandé yo yon kwèsyon, i di, “Ki mannyè yo ka di ki Mèsaya-a kay yon désandan Wa David?

⁴²Paski David menm ékwi sé bagay sala an liv Samz-la konsèné Mèsaya, “ ‘Bondyé Senyè di mèt mwen, “Asid la asou koté lanmen dwèt mwen koté ou kay jwenn wèspé,

⁴³jis tan mwen mété sé lèlmiʼw-lan anba pyéʼw.” ’

⁴⁴David kwiyéʼy ‘Mèt mwen’. Ki mannyè yon moun pé gason David èk David sa kwiyéʼy ‘Mèt li’ a menm lè?”

⁴⁵Kon tout sé moun-an té ka kouté Jézi, Jézi di sé disip li-a,