Luka 20:24-45

²⁴“Ngenge moneng monic edalicnubong nganibe! Iluc nga hibi yago male?” Uwayeleme miibong, “Yogo Sisale.”

²⁵Inguc mibong yedi yanguc edocebawec, “Ilec ngenge Sisale wiyac, yogo Sisa lacnodaing. Nga Wapongte wiyac, yogo Wapong lacnodaing!”

²⁶Inguc mime yenge kwatackelu ngic-ngigac yengele haicka micka lolo aicnolu ye banogale aibibiyebong yowangineng ameine inguc bafaliyewec. Ilec kwatackelu yowa monic mi miibong.

²⁷Aime Sadyusi yenge homackacni gboliyelu fangke-fangke monic mi fagac, inguc micaigaing, yengelacni gocnedi Yesula wele uwacnolu miibong,

²⁸“Wewedu, Mosesdi yowa yanguc kwelengkenolewec. ‘Ngic monic ye ngigac balu gboliine mikac gacgu homame, ngic yele gbainedi haeinele hosec balu gboliholec ailu haeinele wac bafangkelu gadaicte.’

²⁹Dameng monicka hae-gba 7 gaibong. Aime haengineng molic-molicti ngigac balu gboli mikac moc gacgu homawec.

³⁰Homame gbainedi haeinele hosec balu

³¹moc gacgu homawec. Aime gbanginecti hosec yogo balu inguchac gboli mikac gacgu homawec. Homame hae-gba 7 yenge ngigac yogohac balu gbolifocngineng mikac gacgu homayackeibong.

³²Homayackebong ngigac ye inguchac homawec.

³³Homame ngic 7 yenge ngigac yogohac baibongte ailu, gacgu homackacni gboliyelu fangkedaingte, dameng iwa ngigac yogo ye male ngigacbenang aidaicte?”

³⁴Inguc mibong Yesudi bafaliyelu yanguc edocebawec, “Himong yagolec gaga damengka ngicti ngigac bagaing. Nga mamac yenge migaing ‘Na adune ngic lacnodacte.’

³⁵Aime ngic-ngigac yenge homackacni gboliyelu fangke-fangke, nga gaga-sanang banogale aidaingte, dameng yogowa ngic-ngigac yenge mi banagudaingte. Aime mamac monicti ‘Na adune ngic lacnodacte,’ yogo nalic mi midaicte.

³⁶Yenge homackacni gboliyelu fangke-fangke, yogolec fungine aigaing. Yenge Wapongte adu-madecfocine ailu angelo ingucne galu hatacmac nalic mi homadaingte.

³⁷Aime homackacni gboliyelu fangke-fangke fagac, yogo Mosesdi inguchac kwelengkelu mime yegengkeyelewec. I yangucte, yoc kpisicna dac-ubilang fikeme nganilu yogowa lelu Sugucnele yanguc miwec, ‘Ga Abraham nga Aisak ailu Yakobo yengele Wapong gagichac.’

³⁸Ailu ye ngic homaicne yengele Wapong miyac. Ye ngic gbolicne gagaing, yengele Wapong. Yele ngage-ngagewa sasawadi gaganginengkolec aigaing.”

³⁹Aime Wapongte yefe-yowale wewedu ngic gocne yengi yanguc miibong, “Wewedu, yowa madicnebenang migic.”

⁴⁰Aime yogolec lobeina hatacmac uwacnoningte hangocebame hegileibong.

⁴¹Inguc aime Yesudi miwec, “Ngenge yowa yanguc ngagesidaing, ailu yowa yanguc fagac, ‘Mesia ye Dawidile fikesaweckacni.’

⁴²Aime Dawidi ye yeuctihac Miti geewa yanguc miwec fagac, ‘Sugucnedi nale Sugucne edowec, “Ga folenapec ngiyeengka

⁴³gacgu ngabafocgone locebabe higegone bageina muki ingucne aidaingte.” ’

⁴⁴Ilec Dawidi ye Mesia ‘Nale Sugucne’ wackewec. Aime Mesia ye wenucka Dawidile fikesaweckacni aigac? Ye Dawidile Sugucne.”

⁴⁵Aime Yesu ye ngic-ngigac sasawa yengele haicka mic-tengtengfocine yanguc edocebawec,