Luuk 20:24-45

²⁴“Faxalitau pana saxa faat. A xaxaalua xuvul pana xakalayan siseꞌ taxa waan xuluna?”

²⁵Ri suie, “Si Sisaa.” E nane xuus nari, “Lavaxa, tavai na Sisaa pana maana mo sina e tavai a Piran pana maana mo sina.”

²⁶Ri pife fexaxaas sena familunge pana ferawaian sina la matana rabuna. E ri ipul sena susuaa sina e ri fexanakut.

²⁷Saxano Sedusi ri maa savat si Yesus. (Nari, ri fuuna kuus o piau ta to faꞌulaian ti la maatan.) E ri kuus,

²⁸“Mataa ina Fepitaa, na Moses fo xalei a vuputkai aanabeꞌ xataara: tamo mataa a maat tapin a tefin e piau ta rafulak, a tina aava taxa to lunai, i taa tamai sina tefin aave e i taa fasavat a lak xa tina aava fo maat.

²⁹Lavaxa, a toxan a fetinan pisiguak e saxa a tamai sina saxa tefin. Nane maat tapine pana piau ta lak.

³⁰A fataraguiaana tina a tamai sina tefin aave e nane vaxa a maat pana piau ta lak.

³¹A fatalatulaana tina vaxa a maat tapine e malaan seri pisiguak xapiak ri maat e ri piau ta lak.

³²E mui a tefin naang xo a maat.

³³Lavaxa, lana yaan ina to faꞌulaian ti la maatan a tefin aave i taa naasaseꞌ tuuna? Nari pisiguak xapiak aave ri tamai sina.”

³⁴Na Yesus a sui nari, “A mu rabuna ti tanin ri taxa tamai.

³⁵Taasaxa nari aava Piran a lamon faroxo pari xena fatatoi faꞌuli nari ti la maatan lana yaan i taa savat, ri taa pife tamai.

³⁶Nari, ri malaan sena mu angelo senaso ri taa pife maat taasaxa ri mu rafulak sina Piran senaso ri fo to faꞌulaa ti la maatan.

³⁷Na Moses a faxaalit famatavas pana to faꞌulaian ti la maatan. Lana xuuskuus ina latan i taxa raam, nane ferawai pana Piran malaan: ‘Nane ve a Piran si Abrahem, a Piran si Aisaak e a Piran si Yaakop.’

³⁸Nane pife Piran sina mu mamaat, piau. Nane ve a Piran sina mu rabuna aava ri taxa to e la matana Piran a mu rabuna xapiak ri taxa to.”

³⁹Saxano rabuna ina fepitaa pana vuputkai ri kuus, “A susuaa roxo, Mataa ina Fepitaa!”

⁴⁰E pi ta saxa a fine panꞌ ta mo fulaa.

⁴¹E na Yesus a kuus xe siri, “Malaafaa a rabuna ri kuus o a Mataa Failai a lak si Devit?

⁴²Senaso lana mu Yanganan, na Devit xa a kuus: ‘A Memai a kuus xe sina Memai siak, “Nai suꞌ la pamuaan siak

⁴³fefexaxaas a yaan ne timin a mu xaiyaas siim lapaana kaam malaan sena vena vaapaas.” ’

⁴⁴Na Devit a xalie pana ‘Memai’. Malaafaa nane a lak si Devit?”

⁴⁵Layaan a mu rabuna taxa langai, na Yesus a xuus a mu yaamut sina,