Luk 20:24-45

²⁴“Ölöp silwö moneŋ (Kina 5) kun kondel niŋgigetka eki. Dagöreŋ imut aka qet mi miaŋgöreŋ ohoget ahöza?” “O, mi sisa-kiŋgöreŋ,” mewö meleŋda jiget.

²⁵Jigetka kewö jii mötket, “Mewö aiga yuai sisa-kiŋgö imutŋambuk buŋaŋi akzawi, mi mönö yaŋgöra al waŋgime. Yuai kun Anutugö buŋaya akzawi, mi mönö Anutugö buŋa qeme.”

²⁶Jisösnöŋ mewö jiyöhaŋgöra ambazip kambu yeŋgö jeŋine keugö bötaknöŋ al waŋgibingö osiba keuŋaŋgöra welipköba keu bök kinget. Mewö.

²⁷Sadyusi böhi pati yeŋön “Kömugeri, yeŋön kude wahötme,” jiba malget. Yeŋgöreŋök tosatŋan Jisösgö jeŋe kaŋgota kewö qesim waŋgiba

²⁸jiget, “Böhi, Mosesnöŋ kewö jim kutum neŋgiyök ahöza, ‘Azi kun ambi meiga nahönbörat qahö ahui kömuiga munŋan ölöp malöŋi memba mala gwölönarök qiwikŋaim waŋgiiga datŋaŋgö qet bisiba malma.’

²⁹“Mötnöŋ! Nalö kunöŋ darumun 7 malget. Datŋini mutukŋan ambi memba mala gwölönarökŋi qahö öne mala kömuyök.

³⁰Kömuiga munŋan malöŋi mi meyök.

³¹Miaŋgö andöŋe munŋi kunŋan ambi miyök meyök. Mewöŋa mewö darumun 7 pakpak yeŋön ambi mohok miyök memba gwölönarök qahö mala kömum teköget.

³²Kömugetka tekögetka qöndökŋi malöŋini mi mewöyök kömuyök.

³³Göŋön ‘Kömugeri yeŋön guliba wahötme,’ jizanmö, nini mi qahö möt narizin. Mötnöŋ, azi 7 pakpak mi öröröŋ wahötpeak ewö, ambi mohok mi anömŋina meget malöhaŋgöra aka mönö dagö anömŋa akawak?”

³⁴Mewö jigetka Jisösnöŋ kewö meleŋnök, “Nalö kewöŋe gölme kiaŋgöreŋ ambazip awanöm aka malahakze.

³⁵Mi malahakzemö, ambazip uruŋini meleŋgetka Anutunöŋ eka möri dop köliga kömupnöhök wahöta miri gölme kun euyaŋgöreŋ aŋgota malmei, yeŋön miaŋgöreŋ qahö amime.

³⁶“Miaŋgö könaŋi kewö: Mötnarip ambazip guliba kömupnöhök wahötmei, yeŋön Anutugö nahönböraturupŋi akze. Yeŋön Suep garata tandök ewö aka kunbuk qahö kömumemö, teteköŋi qahö mal öŋgöme.

³⁷Mötket! Kömugeri, yeŋön guliba wahötmegö keuŋi mi Mosesnöŋ mewöyök naŋgöba jiyök. Ip köhösönöŋ könöp bölam ahuba qahö jem kutuyöhi, yaŋön mi eka kösohotŋi ohoi miaŋgöreŋ keu kewö ahöza, ‘Nöŋön Anutu Abrahamgö Kembu, Aisakö Kembu aka Jeikobkö Kembuya mala kota maljal.’

³⁸Isik bömön karöbut yeŋön Anutubuk mala mal köhöiba öŋgöme. Körek köhöiba maljei, yeŋön mönö malmalŋini Anutugöra malje. Miaŋgöra Anutunöŋ köhömuŋi yeŋgö Kembuŋini qahöpmö, malmal köhöikŋi maljei, mönö yeŋgö Kembuŋina akza.”

³⁹Jisösnöŋ mewö meleŋniga Köna keugö böhi tosatŋan meleŋda kewö jiget, “Böhi, mi törörök jizan.”

⁴⁰Mewö jiba keu kun kunbuk qesim waŋgibingö kölköldömdöm aka mosötket. Mewö.

⁴¹Jisösnöŋ keu kun kewö jii mötket, “Kraistnöŋ Kiŋ Deiwidkö gwölönarökŋi akzawi, tosatŋan keu mi denöwögöra jimakze?

⁴²Deiwidnöŋ nanŋak keu kewö jiiga Sumbara (Buŋa liŋet, sam) Kimbinöŋ ahöza, ‘Anutunöŋ kinda nöŋgö Kembuni kewö jii mörök, Göŋön mönö kaba nöŋgö böröni ölŋe tatnöŋga

⁴³nöŋön nalö sutŋe kerökurupki tim tötala luhut al eŋgiba göhö köna tambö gwaröŋe al eŋgimam. Nalö mi kam kuŋgumawaŋgö dop mönö asakmararaŋnöŋ ki tatman.’

⁴⁴Deiwidnöŋ mewö jiba qetŋi ‘Nöŋgö Kembuni’ jiza. ‘Kembuni’ jiba mönö denöwö aka yaŋgö gwölönarökŋi mohot akawak?” Mewö.

⁴⁵Jisösnöŋ gwarekurupŋi yeŋgöra keu kewö jiiga ambazip kambu pakpak mi mötket,