Luka 20:24-45

²⁴“Amapoo molee ko hee eligi,” diso. Osoloso yayo molee ko toloso tobudulone egeesee takaso, “Molee hamapoo agamo mudu sabolo osoloso agamo hu sabolo mololo?” diso.

²⁵Eseme diayo nei yimapoo egeesee takaso, “Sisayo mudu sabolo, osoloso o hu sabolo oso ka molo,” diso. Eseme Yesuye tobudulone dimapoo egeesee takaso, “Niba Sisayo bi ee Sisa mapoo tenee, osoloso Godeeyo bi ee Godee mapoo tenee,” diso.

²⁶Eseme diayo Yesuye to nei tekepo taka duloso diya howoogadolone to abo takele poogooso. Egeesee ma kulodu Yesuye odoo howo woola to tokenee takelega poogoome, diayo yo talai eli egele poogooso.

²⁷Osoloso Sedisi odoo aboso Yesuye badebei mapoo sibadeeso. Odoo hagee biaso takolone odoo wedia see hogoga bileime deliso. Eseme diayo sibileso Yesu mapoo egeesee takaso,

²⁸“Eligili odoo, Moseseeye imapoo kokodo takolone egeesee hoguguso, ‘Gisoso sobo huloso holo soomagelega toga, see omoloye emei ta eyo osobo bau huloso emeiyo hu maga holo soolooga magee,’ diso.

²⁹Omolo dio 7 debeiso. Esino daga emeiye sobo huloso holo soomagelega taso.

³⁰Osoloso omoloye emei ta eyo osobo bau huso. Esino holo soomagelega taso.

³¹Osoloso omolo hee domo oso bau see huloso, holo soomagelega taso. Egeesee seemelee ososee omolo dio 7 susuga holo soolooga magelega wediaso.

³²Osoloso hamameedee sobo bau yinosee taso.

³³Bei, sobo yo giso 7 oso huga, ta maga hogabilei beeame omapoo, yo agamo osobo dalaiyo?” diso.

³⁴Esino Yesuye to nei dimapoo egeesee takaso, “Epedee hagee do beeame omapoo gisoso sobo huya, osoloso soboso giso obuo dolone ka doso.

³⁵Esino Godeeye hesiga odoo oso wedia maga hogabuloso doga, diba see giso sabolo sobo sabolo huleime.

³⁶Bei, diba Godeeyo momaiye masi dobolone see wedileime. Osoloso diba Godeeyo owolo dio doloso dabalaiso. Bei, diba wedia maga hogoogadi goo oso ka eligiso.

³⁷Esiga Moseseeye daga hoogoo edebeeyo wedia maga hogoogabilei goo ee o booka mapoo hoguguso. Bei, yayo homo du douso namolome, ogoloso goo ee hogugulone egeesee takaso, ‘Lodee yo Eibalaham, Aisek, osoloso Yekob dibada Godeeso,’ diso.

³⁸Esiga Godee hagee wedia odoo dia Godeenee. Haye, odoo gie egee do dia Godee. Bei, Godeeyo howo woola odoo susuga gie doso.”

³⁹Eseme tei eligili odoo abo oso Yesu mapoo nei egeesee takaso, “Eligili odoo, nayo egee takoo tekepo,” diso.

⁴⁰Eseme ee ma kulodu odoo susuga oso see Yesu mapoo woosalai ebiaso.

⁴¹Osoloso Yesuye see odoo susuga mapoo woosali to hagee takaso, “Bei kasee maga odoo aboso takolone Keliso ee Deibidiyo amawe dee ka takeliyo?

⁴²Esino Deibidi eyo Sam booka ma kulodu egeesee takaso, ‘Godeeye mo Lodee mapoo egeesee takaso: No abolo wiligi doloso badalame mo dee deedee dokolo bie.

⁴³Esiga nayo badolone, namapoo ha teli odoo ee nama hemi debee dalaiso.’

⁴⁴Esiga Deibidiye Keliso o Lodee diso. Esino kasee maga Keliso ee Deibidiyo amawe dee ka takalaiyo?” diso.

⁴⁵Odoo susuga oso to dulone osee doboome, Yesuye o hamamee dili odoo mapoo egeesee takaso,