Luka 20:24-45

²⁴Avat, a ve tar tika na denaria tagu. A malalar i to ia tana? Ma kai ia bula ra tutumu tana? Ma dia biti: Kai ra Kaisar.

²⁵I biti ta diat: Avat a tul tar tai ra Kaisar ra lavur magit kai ra Kaisar, ma avat a tul tar tai God ra lavur magit kai God.

²⁶Ma dia mama vagu pa ia ta nam ra tinata ta ra mata i ra tarai; ma dia kaian ta kana tinata na balbali, ma dia ki mut uka.

²⁷Ma ta ra umana ta diat ra Sadukaio, diat dia varpuai ta ra nilaun mulai, dia tadav ia; ma dia tir ia dari:

²⁸Tena Vartovo, Moses i ga tumu tar ia ta dat, ba ra tutana i mat kan kana taulai, ma pa ta natuna, turana na ben kana vavina, ma na vangala ta umana bul upi kai turana.

²⁹Io, a lavurua na tutana dia turana; a luaina i ben pa ra vavina, ma i mat, ma pa ta natuna;

³⁰ma ra vauruana damana, ma ra vautuluna bula;

³¹damana bula diat par ra lavurua dia mat, ma pa ta natu i diat.

³²Ma ra vavina i mat mur ta diat.

³³Ta ra nilaun mulai, kai ia ta diat nam ra vavina? Tago ra lavurua par dia ga taulai me.

³⁴Iesu i tatike ta diat: A tarai ra pia dia varvarbean, ma dia tulatulai ta ra varbean;

³⁵ma diat da kure boko ba na topa diat nam ra nilaun ma ra nilaun mulai kan ra minat, pa dia taulai, ma pa dia tulatulai ta ra tinaulai;

³⁶tago pa diat a mat mulai; tago dia vardada ma ra umana angelo; diat a umana natu i God, ma ra umana natu i ra nilaun mulai.

³⁷Ma ra lavur minat dia laun mulai, da Moses i ga vaarike ure ra Davai, ba i ga vatang ra Luluai dari: A God kai Abaraam, ma ra God kai Isak, ma ra God kai Iakob.

³⁸God, vakir a God kai ra umana minat, kai ra umana launa iat; tago dia laun par ta ra matana.

³⁹Ma ta umana tena tutumu dia tatike: Tena Vartovo, i boina kaum tinata.

⁴⁰Tago pa dia valar mule ma ta tinir.

⁴¹Ma i biti ta diat: Dia biti dave ba ra Kristo ia ra natu i David?

⁴²Tago David iat i tatike ta ra buk na Kakailai dari: “Ra Luluai i tatike tai kaugu Luluai: Una ki ta ra limagu tuna,

⁴³Tuk tar ina vadiop kaum lavur ebar upi a ruarua na kakim.”

⁴⁴David i vatang ia ba Luluai, ma dir tamana dave?

⁴⁵Ma ra tarai par dia valongore i tatike tai kana tarai na vartovo dari: