Luk 20:24-45

²⁴“Mot in ese iau nam tu mani. In masarin osi ri, ma a tumtumus ri uni anun osi?” Det balu i lena, “Anun a Sisa.”

²⁵Ra i watungi tandet lena, “Asau ra anun a Sisa, mot in pitari torom a Sisa. Ma asau ra anun o God, mot in pitari torom o God.”

²⁶Ma ka det usobor lar pasi umatan a taro nama wasiso ra. Det kisin doko una nun a minabalu, ma katu wasiso mo anundet.

²⁷A ramano kum Sadusi, ra det ser ipul kut lena, katu nilaun melet gusun a minat, det wan torom o Iesu, ma det tingi lena,

²⁸“Tene Ususer, o Moses i tumus tari tandat lena, ra tu musano in mat pas gusun anun a ino, ma katu nutunder, o tisinolik in ben pasi ra in nolin nami, sur in ulabo tar lako kum nat una risan o tisino.

²⁹Ara kabo tisino, a wonom mawit na musano det. A mugano i nolin, ra i mat pas gusun anun a ino, ma katu nutunder.

³⁰Ra a murmur tano bulung i nolin nama ino ra, ma i bulung i mat kut gusuni.

³¹Numur a mantul nami bulung i nolin nama ino ra. I lenkutkai ra, a wonom mawit det rop, det nolin pas nami, ma det mat kut. Ikut a ino ra, ke usus tar tu nat un det.

³²Ra numur a ino bulung i mat.

³³Una nilaun melet gusun a minat, a ino ra, anun osi na pasandet mo? Uni a wonom mawit rop, det sa nolin pas nami.”

³⁴O Iesu i watungi tandet lena, “A taro tagun a kum kilalo ri det ser nolin,

³⁵ikut a taro ra det tokodos sur det in katutur melet gusun a minat, ma det in laun una nilaun numur, ka det in nolin melet mo.

³⁶Ma ka det in mat melet, uni det elar mukut nama kum ensel. Det a kum nutnutun o God, uni det sa laun melet gusun a minat.

³⁷O Moses i ese i lena a kum minat det katutur melet. Una wasiso na Buk Tabu unin nanai ra i kunabor, o Moses i watung a Labino lena, ‘A God anun o Abaram, a God anun o Aisak ma a God anun o Jekop.’

³⁸O God awu sur a God anun a kum minat, i a God anundet ra det laun, uni umatano det rop det laun.”

³⁹Ra a ramano kum tene ususer tagun a Warkurai det watungi lena, “Tene Ususer, anum a wasiso i wakak doko.”

⁴⁰Ma ka det wan melet mo toromi nam tu iting, uni det ngara.

⁴¹O Iesu i watungi tandet lena, “Ilai ra di watungi lena a Karisito i a nutun o Dewid?

⁴²Uni o Dewid ut i watungi una Buk Song una Buk Tabu lena, ‘A Labino i watungi torom anung a Labino lena, “Un kis una papor sot na lamang,

⁴³tuk ra an winim pas anum a kum ebar sur det in kis utuntudu in anum a warkurai.” ’

⁴⁴O Dewid i watung a Karisito lena, i anun a Labino. Ra i lenra, der tamano pepetlai?”

⁴⁵Ra a taro rop det longoro o Iesu, i watungi tan anun a kum nat na ususer lena,