San Lucas 20:24-45

²⁴—Gul liuu nare tuby mɨly. ¿Tú lon cá loc, ne tú láng cá loc? Laadeb cuaibdeb: —Xte rey César.

²⁵Chiy raipy Jesús laadeb: —Guldeed César ni ná xte César, ne guldeed Dios ni ná xte Dios. Ax quɨt xi dixúti bdxialdeb nicuaquiadeb laany pur de ni guniiny nez lo irate bniety.

²⁶Rdxalotisdeb zec ni cuaibny lodeb, ax quɨtru xi guniitideb.

²⁷Chiguld tuby tiop de bɨny saduceu güeguiaadeb Jesús. Ne de saduceuqui quɨt reldilaaztideb dec sbány de bɨnguty stuby. Pur ningui raipdeb Jesús:

²⁸—Maistrɨ, ley xte Moisés rnii dec belati gaty tuby bniety nguiu ne isáanbɨ chialbɨ sin quɨt niactideb de family, chiy bets bniety ni gutyqui ná par guchnaab viudqui par gacdeb de family xlat betsbɨ ni gutyqui.

²⁹Ne guu tuby family rut gucdeb gadz bets. Ni ná guloqui bichnaab, per gutybɨ sin quɨt niactib de family cun chialbɨ.

³⁰Chiyru ni rrop betsbɨqui bichnaab viudqui per quɨtiac guctideb de family.

³¹Chiyru bichnaa ni rionqui cun viudqui, ziytec xquel bichnaa viudqui cun irate gadzdeb, ne iratedeb gutydeb sin quɨt niactideb de family cun viudqui.

³²Pur lúltmɨ ax guty gunaaqui.

³³Pur ningui dxi ni ibány de bɨnguty, ¿de lo ira gadz betsdeb tú rac chial gunaaqui te pur iratecdeb bichnaa gunaaqui?

³⁴Chiy raipy Jesús laadeb: —Lo guɨchliuré ruchnaa bniety ne rdeedzadeb lliindeb guchnaa.

³⁵Per de ni riáld gap stuby guelnabány cuby de ni ibány stuby, zeclɨ nguiu ne zeclɨza gunaa aquɨtru guchnaatideb.

³⁶Te pur aquɨtru gatytideb, sino que laadeb agacdeb zec de ánglɨ xte Dios, ne anágacdeb de lliin Dios pur agubánydeb stuby.

³⁷Dunnɨ nánnɨ dec sbány de bɨnguty stuby. Te pur axt Moisés gunii ziy tuby lat lo xquiits Dios rut rnii dec gunáb yag ni cayaaicqui. Ax ruy rnii dec Xtadnɨ Dios, laany nány Dios xte Abraham, xte Isaac, ne xte Jacob.

³⁸Ne Dios quɨt nátiny Dios xte de bɨnguty, sino que xte de ni nabány, te pur par laany irate bniety nabány.

³⁹Chiy nuu de maistrɨ ni nán ley raipdeb laany: —Güenquɨ guniibiu Maistrɨ.

⁴⁰Ax aquɨtru xi nialltideb ninabdiidxdeb laany.

⁴¹Per laany raipny laadeb: —¿Xínii rnii bniety dec Crist rac lliin rey David?

⁴²Ne lagac David guniib lo librɨ xte Salmos: Dios raipny Dad ni rnabee naa: “Guri lad naldí xtena

⁴³axtquɨ gúna gan inabiiu lo de ni rdxichné liú.”

⁴⁴Pur ningui belati Crist rac lliin David, ¿xínii raipy David laany, Dad?

⁴⁵Irate de bniety cacuadiag, ax raipy Jesús de xpɨnny: