SAN LUCAS 20:24-45

²⁴Ye'benon ump'e ch'oc taq'uin. ¿Caxca u jut y u c'aba' ya'an tuyac'o? Unejob u p'alijob que tuba aj César.

²⁵De ya'i u yälbijob ca'da: ―Tojbenla aj César jiq'uin lo que es tuba, y äc'benla Dios lo que es tuba Diosba.

²⁶Mach u chi trebejob u yäc'ben u säte' t'oc u t'an tu pänte' ni gente. Tajch'icwäni u jutob u yubinob cache' u p'alän, y ch'ijcäbijob.

²⁷De ya'i c'otijob yebe aj saduceojob, jini machcatac u yäle' que mach uxin tä cuxpan ajchämejobba. Jin uc'a u c'atbijob aj Jesús ca'da:

²⁸―Maestro, aj Moisés u yälbenonla tama ni jun u tz'ibiba que si chämic u yermano untu winic y u colesan jit'oc, pero mach'an u ch'ocobba, ni winic jini c'änä u ch'ämben jit'oc u c'äsi' hermano y u yäc'ben u mätan u tz'isa ni ixic tuba u tz'isben u bijch'oc, ca' a wälä tuba u yermano.

²⁹Ajni siete hermanojob. Ni hermano ajnojaba lotoji t'oc untu ixic, y ji'pat chämi y mach'an u ch'ocob.

³⁰U cha'tulib u ch'i y chämi täcä sin que ajnic u ch'ocob.

³¹U ch'i täcä u yuxtulib, y che' chich täcä upete ni sietejob u ch'ijob ni ixic, y chämijob sin que u yäctan niuntu u ch'ocob.

³²Ji'pat chämi ni ixic täcä.

³³Tu xe tä cuxpan ajchämejob, jiq'uin, ¿caxcamba de unejob u xe u ch'e' de jit'oc ni ixic jini, uc'a upete ni sietejob u cänäntijob de jit'oc?

³⁴De ya'i aj Jesús u p'albijob ca'da: ―Winicob y ixictacob pancab badaba u lotojanob y u lotojescanob.

³⁵Tu xe tä c'ote q'uin tuba cuxpac tan ajchämejob uc'a bixic tä cielo jini machcatac yäcä ayanobba, mach uni' xin tä lotojanob y mach uni' xin tä lotojescanob.

³⁶Mach u ni' ch'ä chämic tä cha'num, uc'a ca' a wälä u xe tä c'otejob t'oc ni ángelojob ta Dios. Unejob u ch'ocob Dios uc'a u xe tä cuxpanob tan ajchämejob.

³⁷Aj Moisés u tz'ibi tä jun cache' jinq'uin ajni bajca an ni chäcch'ix que ya'an tä puleba, u yäli que ni cä Yumla es u Dios aj Abraham, u Dios aj Isaac y u Dios aj Jacob. Jinq'uin u yäli ca' jini, une chich täcä u ye'i que ajchämejob u xe tä cuxpanob.

³⁸Uc'a Diosba mach jin Dios tuba ajchämejob. Uneba Dios tuba machcatac cuxuba. Uc'a unejob totoj cuxu ayanob tu jut Dios.

³⁹De ya'i yebe machcatac yuwijob ni ley u yälbijob ca'da: ―Maestro, utz chich a wäli.

⁴⁰U yälbijob ca' jini uc'a mach u ni' olijob u c'atbenob niump'e cua' más.

⁴¹De ya'i aj Jesús u yälbijob ca'da: ―¿Cache'da u ch'e' u yäle'ob que ni Cristo, jini u yaqui Dios tuba ajmandaba, es u natil ch'oc ni rey aj David?

⁴²Uc'a tama ni jun u c'aba' Salmoba aj David chich u yäle' ca'da: Cä Yumla Dios u yälbi Cajnoja ca'da: “Chumi' täc noj, bajca c'änä chumlec machca olo tä chäninteba,

⁴³ixta que mach cä'benet ta' c'äb upete machcatac que mach yo u chänenetob”.

⁴⁴Aj David u yäle' ca' jini cache' ni Cristo es u Yajnoja une. ¿Cache'da jiq'uin es u natil ch'oc täcä?

⁴⁵Upete ni gente ya'an u yubinob jinq'uin aj Jesús u yälbijob u yajcänt'anob ca'da: