Luk 20:24-45

²⁴“Kosaiki erau nele, mati re nange pite minemple so min pipaitei?” “Pe pite moli ili lite Rom.” Pe namti pirpowo Jisas.

²⁵Liso Jisas lirpepe lolpepei, “Menemple pite moli ili lite Rom le pele, ise ma pele watowo, le menemple pite Ma Ili pele, ise ma watowo Ma Ili pele.”

²⁶Jisas lirpei il men wanketei ma pe penglei pile lutepe pite mete wuru wuso pile pepe, olo, le lirpei poporotei. Le mete wuso pemtetei peletei pepe pe pinlele potei pire il pele le pe pos pile yaupeye.

²⁷Mete ilepe pite Sadyusi, pe pau falowo Jisas. (‘Pe mete piti pirpei polo mete wuso pa pepe, pe ma nou peilo kolo.’) Pe peletei Jisas polpepei,

²⁸“Ye metine liti eptalo mete, Moses laptouku lope il lipi pepei lirpei lolo, ‘Wuso metine la taniene moto, le eple olo, winke lite metine wuso la lepe, le ma namti laisene towa moto nepe, le me roum soma milape eple pite metine wuso la lepe.’

²⁹Sungoi ilim winkem nemple, pe pire eti plen poungo te twinges, pe pratei lepei. Line oru lepe le laisene moto wolo lilape eple kolo, la yawiye.

³⁰Leye lo winke piti luwol lepe le namti laisene moto nepe,

³¹leye lo winke nele piti nimin. Pe yeflipiye pa yaupeye, eple olo pilape kolo.

³²Fei, moto nepe ne na ningli.

³³Le piti mete wuso pa pepe, wuso pe ma nou peilo, moto fei nepe ne ma pite minele lelpe? Pe pire eti plen poungo te twinges, pe yeflipiye wuso paisene nepe.”

³⁴Jisas namti lirpepeye, “Nimoure mete re piti wem fei lepei lepe, pe paitenemple.

³⁵Wolo nimoure mete wuso pa le Ma Ili nou leilape piti ma nou nampir pratei pepe, pe ma paitenemple kolo olo.

³⁶Pe ma fale watafei ririm pite yuwei pepe le pe ma pa kolo olo. Pe eple pite Ma Ili pele, wuso pe pa wolo Ma Ili nou leilape.

³⁷Le Moses kosaise alepe nimin lolpepei, mete wuso pa pepe, Ma Ili nou leilape nampir pratei. Il paitei yousi wuso pirpei pire weli wuso loli nimpe natungo lepe, le lirpei lire il lirpolo, ‘Le Ma Ili lite Abraham, le Ma Ili lite Aisak, le le Ma Ili lite Jekop.’

³⁸Fei pepei pato polpepei, mete paye wolo pe pa pelengi kolo olo, wusoli Ma Ili lirpei le Ma Ili lelpe. Wuso pe pa pelengi le ma wala Ma Ili lelpe kolo. Wolo le lirpei le wala Ma Ili lite pe, leso ku ma retai mete wuso pa pe ma nou peilo.”

³⁹Mete ilepe piti peptalo mete pire il lipi pite Moses pepe, pe nempe nemi pirpeiye, “Metine liti eptalo mete, ye irpei il teingipe poporotei.”

⁴⁰Le minemple re nou peletei pire il men re kolo, oloye.

⁴¹Jisas lirpepe lolpepei, “Polomen so pe pirpei polo Krais, le ninge palyene lite Devit?

⁴²Devit lotei laptei il lirpei paitei yousi pite Sam, lirpei lolo, ‘Ma Ili lirpowo Ili leiki, ifei etei tilpi leiki lepei,

⁴³ungari wem ki ma kaptei mete eringi peiye pratei ire yepe peiye tef.’

⁴⁴Devit linawo le ‘Ili’, le polomen ma Krais le ninge palyene lite Devit?”

⁴⁵Wem mete yeflipiye pile pingitowo, le lirpepe pupam pele lolpepei,