Luk 20:24-45

²⁴“Pathengalu umtun alavatharnga omole a tho nge. Na anga ia sei ake na iion ake i voth nge, e?”

²⁵Mako o ri ve, “Ini a nepes a Sisar ile.” Mako Jisas i ria or ve, “Ur ako ini a Sisar ile, aro thomu o sungu vengveng i a Sisar nge. Na ur ako ini a God ile, aro thomu o sungu vengveng mun i a God nge.”

²⁶Ma o kukuk nge ako i olal i a or nge. Na o pavurvur aro ole olo i avele, ako a tokokoere otheki. Ma o men porengrengaltun ol inga.

²⁷Ma ine Sadiusi pelie ako o es a Jisas nge me. Na Sadiusire ini tokokoe areko o ri ve, tokokoe areko o rin lale, o pavurvur aro o mimi werera ol avele. Na o nin a Jisas ve,

²⁸“Pamirealinga, nomenga ako Moses i wat patorong omole ako ve, aro ve toko omole i peange na i rin petetun iewo na otutun e avele, maken aro itein posnga aro i ewo werera mun itein pomnga ia basu mo aro i pavelpol wain e mo ini itein pomnga ako i rin lale ile, mo ilengare o mothong tova o vus.

²⁹Na nomenga titeinpel or limai o voth. Na otein pomnga ako ini oa tengen i ewoa tel seng omole. Ma i rin petetun iewo sengenga na otutun e avele.

³⁰Mako itein opisoinga i ewoa i, ave i velpol venen mun re aken a i nge,

³¹na otein menga i venen mun re aken, ma or alalimaipot oewo seng aken, na otutun e avele, nako o rin rin.

³²Lamako patopalalnga seng aken i rinpot mun.

³³Na lemem ninong i vene: Panen nge los wereraing, seng aken aro ini ol i kathnga iewo, eneke toko or alalimaipot o ewoa i?”

³⁴Ma Jisas i olal ole riong ve, “Na nge wop lemi ol ake, toko na sengre o peange.

³⁵Aveto toko na seng areko God i ateal or mo i apet or ini toko sivenga, aro i palos werera mun or mo o voth tomo nge i a Pen a Urvet, naro o peange ol avele.

³⁶Naro o rin ol avele ranga ve ini a God ile enselre. Na or ini a God itutunre, eneke i palos werera or nge rinong.

³⁷Na tenesing nge a Moses i pathengal it nge areko o rin, ako aro o los werera mun. Na nge tenesing ako e won pok a vutvutnga ako won sesenga i apola nge, God i ria Moses vene: ‘Ponange tho ini a God ako ini a Abraham ile, na Aisak ile na Jekop ile.’

³⁸Na ake i pathengal i a it nge ako God ini rinongare ole God avele. Ini toko mimingare ole God. Na toko na seng alavusnga o mimi a itheki.”

³⁹Na toko pamirealingare nge a Moses ile patorong pelie, o nongpol ako Jisas i ripot riong aken, mako o ria i ve, “Pamirealinga, ong olal senu ole ninong.”

⁴⁰Mako tokokoere o ngeip ol nge ninong pelie ako aro o nin a Jisas nge.

⁴¹Lamako i ria or ve, “O ri ve Krais ini pamimionga ako i velpol a Devit ikime mo aro ini nepes ranga ve ini a Devit. Na i vava ake o ri vene ake?

⁴²Eneke Devit isivenga i watu riong ake a Buk Song nge, ma i ri vene: “‘God i ria ok Pomnga ve: “Ong meno a lok seik me, a menik sivenga nge anga,

⁴³i pavurvur ako aro tho paesu ol lom ngarangre a som thewo, mo aro lom mong or.” ’

⁴⁴Na nge riong inga aken, Devit i apet a Krais ini ‘ia pomnga.’ Na ile riong ake i pathengal it ve, Krais i voth tel lale. Na i vova ake o ri ve Krais ini inga a Devit itevinga na i velpol a rumongaling nge i, e?”

⁴⁵Na toko alavusnga o nongpol ile riong na Jisas itheki lel a tokokoe areko o panes i ma i ria or ve,