LUKA 20:24-45

²⁴“Ndagusileni ihela. Twaga na kihanga kino kili muno cha munhu yalihi?” Walonga, “Va mkulu wa undewa wa Loma.”

²⁵Avo Yesu kalonga, “Vinoga. Avo muliheni mkulu wa undewa wa Loma vija vili va mkulu wa undewa wa Loma, na muliheni Mulungu vija vili va Mulungu.”

²⁶Hawadahile kumnamata mmbuli ziyalongile haja hameso ga wanhu, avo wanyamala, wakanganya nyidikilo yake.

²⁷Abaho, Masadukayo wayagwe, waja wolonga kamba wanhu hawazuka, weza ha Yesu na mbuza,

²⁸walonga, “Mkulufunzi, Musa katwandikila tweye lagizo dino, ‘Kamba munhu yahadanganhika na kaleka mwehe ila halelile nayo mwana, mdodo ama mkulu wa munhu hiyo kolondigwa yamsole ija ikizuka yamulelele wana ndugu yake yadanganhike.’

²⁹Avo kukala na wandugu saba. Imkulu kasola mtwanzi, kadanganhika halekile mwana.

³⁰Abaho, waikabili kamsola ija imtwanzi, na heyo kadanganhika bila kuleka mwana,

³¹na waikadatu kamsola. Galawilila gagaja mbaka wose saba wadanganhika bila kuleka wana.

³²Hakimambukizo, ija imtwanzi vivija kadanganhika.

³³Avo kuna dizua da kuzuka kwa wanhu wadanganhike, kowa mtwanzi wa yalihi? Kwavija wose saba wakala wamsolile.”

³⁴Yesu kawalongela, “Wanhu wa kipigiti kino wosola na kusoligwa,

³⁵ila wanhu waja walumbile kwingila muulumwengu uja, na kuna umzuso wa kulawa mkudanganhika, hawasola ama kusoligwa,

³⁶na hawadanganhika, wowa kamba wasenga wa Mulungu wa kuulanga. Wao wowa wana wa Mulungu, kwavija wazusigwa.

³⁷Ila mmbuli ya kuzuka kwa wanhu, hata Musa kalagusa mbuli hiyo Mzinyandiko Zing'alile muna imbuli ya kitutua kikwaka, aho komulonga Mndewa kamba ‘Mulungu wa Ablahamu, na Isaka, na Yakobo.’

³⁸Heyo hali Mulungu wa wadanganhike, ila Mulungu wa wagima, kwavija kumwake heyo wose wana ugima.”

³⁹Wafundiza wayagwe wa Malagizo ga Musa walonga, “Kulonga goya, Mkulufunzi!”

⁴⁰Na haduhu munhu yagezile kumuuza tena mbuli iyagwe!

⁴¹Yesu kawauza, “Vodahikaze wanhu kulonga kamba Kilisto Mkombola kowa mwana wa Daudi?

⁴²Kwavija Daudi mwenyego kolonga mkitabu cha Zabuli, ‘Mndewa kamulongela Mndewa wangu, Kala kumkono wangu wa ukulume

⁴³mbaka vondaniweke wadumuka zako wawe kamba kigoda cha kwikila magulu gako.’

⁴⁴Kamba Daudi kamkema heyo Mndewa, abaho, Kilisto Mkombola kowaze mwana wa Daudi?”

⁴⁵Wanhu wose viwakalile wotegeleza, Yesu kawalongela wanahina zake,