SAN LUCAS 20:24-45

²⁴Quinextilijque. Cuaquinon quinmilic: —¿Aqui unca in itzontecon huan itoca pan in tomin? Yehuanten quilijque: —Unca iyaxca in hué César.

²⁵Cuaquinon Jesús quinmilic: —Pampín, anquipía pa anquilaxlahuis in tomin pa in hué César ilahueliltilisli, huan anquipía pa anquimacas César mochi hual unca iyaxca César. Huan jan yoje anquipía pa anquimacas Dios mochi hual unca iyaxca Dios.

²⁶Yojque amo huil quijtuloaya nindeno amo cuali ca quinami quinnanquilic Jesús, pampa moxtin yehuanten hual nepa moqueztataloaya quicaquiloaya Jesús huan quimatiloaya pampa amo moixpoluc ca innojen lajtomes hual quinnanquilic. Huan mocahualoaya moizticate lapolultili in lacames hual quilajlanijque inon. Mocahualoaya yoje pampa quinnanquilic Jesús ca ilajmatilisli hué.

²⁷Cuaquinon hualajque capa Jesús sequin saduceos, yehuanten quimaxtilo pampa amo yulisqui oc sejpa yehuanten hual miquilo. Huan quilajlanijque Jesús, quilijque:

²⁸—Lamaxtini, Moisés hual yulini pa yina techijcuiluilic inon: Sinda se lacal miqui, quipía isihua huan amo quinpialo xolomes, cuaquinon icni in lacal hual miquic canas isihua icni hual miquic. Cuaquinon yehuanten quinpiasi xolomes huan quintocayaltisi quinami motocaya icni hual miquic.

²⁹Axan, cataloaya chicome icnían. Canac se sihual se inmicni, amo quinpiaje xolomes, cuaquín miquic in lacal.

³⁰Canac isihua ihuían oc se icni, cuaquinon miquic, amo quinpiaje xolomes.

³¹Huan umpa canac in sihual ihuían oc se icni, miquic. Yojque panuc ca moxtin in chicome, amo quinpialoaya xolomes ca in sihual, moxtin miquije.

³²Huan cuaquín miquic in sihual noje.

³³Axcan, sinda yulisi oc sejpa yehuanten hual miquilo, ¿pa calía innojen chicome yes in sihual? Pampa moxtin in chicome lacames quipialoaya in sihual.

³⁴Jesús quinnanquilic: —Jan yehuanten hual yulilo pin lalticpan monamictilo.

³⁵Ma yoje, quiman lamis in lalticpan hual axan unca, amo monamictilo yehuanten hual Dios quinlajtultic pa yulisi oc sejpa capa yihual unca pin cielo.

³⁶Noje yajmo huil miquilo, cayasi quinami in lanahuatinijmes pin cielo. Yehuanten amo monamictilo huan amo miquilo. Quema, cate ixolomes Dios yehuanten hual yulisi capa yihual quiman miquisi.

³⁷Huan neli unca pampa yehuanten hual miquilo yulisi oc sejpa. Moisés anmitzmachiltía inon, pampa quijcuiluc len in Tata Dios quilic nepa quilaquetzilijtataya ca ilajtol quistataya pin huitzcuajtzindi. Quilic: “Nehual iDios Abraham huan iDios Isaac huan iDios Jacob”, quilic.

³⁸Dios amo unca inminDios in mijquimes, yihual inminDios yehuanten hual yulticate, pampa Dios quinmita moxtin quinami yulticate.

³⁹Cuaquinon sequin ca ilamaxtinijmes inminlajtol in judíos quilijque: —Lamaxtini, tilajtuc cuali.

⁴⁰Inon quilijque pampa axan momajtiloaya pa quilajlanilosquiaya oc se lajtol.

⁴¹Cuaquinon Jesús quinmilic: —¿Quinami huil quijtulo pampa in Cristo ja unca san imiahuil David?

⁴²Yihual David quijtúa pa iamal in Salmos yoje: In Tata Dios quilic noTata, quilic: “Xihueliti ca nehual timolalijtica pa noma cuali.

⁴³Huan ajsis in tonali hual niquinchihuilis moxtin molacocolinijmes pa mitzneltocasqui.”

⁴⁴Yoje, David quitocayaltic “noTata.” Pampín, in Cristo unca niman hué huan David amo unca hué quinami yihual. Cuaquín, ¿quinami unca in Cristo imiahuil?

⁴⁵Cuaquinon Jesús quinlaquetzilic imonextilinijmes huan moxtin in oc sequin noje quicaquiloaya len quinmilijtataya, quinmilic: